4766 418
20.02.2020
Убагында ооба, кыйла курчудум
Кылыч болуп тиле чаап турчумун
Көкүрөктү тосуп ташкын дайрага
Көлмөк кылчум, нугун анын бурчумун
Сенсиредим сулуулукту сиз дебей
Салкын жүрдүм, жылуулукту издебей
Кесирликпи, жолдон көрсөм кызыл гүл
Өтүп кетчүм, жыпарын бир искебей
Мөмө жесем, бышканынан тандадым
Байлык эмес элди гана жандадым
Ырдан башка, акырына өмүрдүн,
Билбейм чыны мен эмнени камдадым
Көп ыр жаздым, көбү калды чийилбей
Кээде жатты көп чапандар кийилбей
Жалпы өнөрдүн намысы үчүн болгондур
Кечир досум - койгон болсом ийилбей
Суу сеппедим кээде жерге сиңгиче
Күтпөй койдум кээсин акыл киргиче
Акыйлашсам өмүр өтүп кетпейби
Ал өнөрдү сыйлаганды билгиче
Аттан атты, күлүк жорго ылгадым
Асман эмес эл турмушун ырдадым
Четке чыктым, чектен чыктым, а бирок
Кыргыз деген атты уят кылбадым
Шүгүр деймин, атым, жашаар турак бар
Билбейм канча кудай берген убак бар
Бул ырды окуп кубанбагын душманым
Дагы ушундай жыйырма жылга кубат бар
Билбейм неге, мунун баарын козгодум
Талант сүрөп, шыгы жогун кошподум
Дасторконду жыйнаганга али эрте
Дагы далай уча жейбиз досторум
Убагында ооба, кыйла курчудум
Тикелерге - мен да тике турчумун
Селкинчекте шыңкылдашып ойногон
Селкилердин сезимдерин бурчумун
Антип жүрүп, билип билбей күн өттү
Толду окшойт күнөө салчу куржунум..)) #обонсуз#ыртүрмөк#
