Декабрь 2018 Ой-Ордого чакырылып, инвесторлор тууралуу сөз башталганда ой-пикиримди кыскача белгиледим эле. 8 ай өттү, азыркы убакытка чейин жүздөгөн (миңдеген?) компанияларга берилген лицензияларды кайра карап чыгып, жергиликтүү эл менен бир сыйра макулдашып алсак болмок. Эки ай мурда Чаткалга коллегам менен барганда, 28000 калкы бар кичинекей райондо кенди иштетүүгө 150 (!) лицензия берилип, аркасында айыл өкмөттөн баштап, Жогорку Кеңеш, Ак үйдөгүлөр, кримчөйрөнүн өкүлдөрүнө чейин башкарып отурганын эл ачык эле айтып берди. Ал сапарыбыз боюнча фейсбукка пост илип, парламенттин жыйынынан да айтып чыкканмын. Бүгүн нарындык Солтон-Сарыдагы окуяларды угуп, зейним кейиди - региондордогу өнүгүү максатында ачылган компаниялардын болочок пландарын, кыска/узун мөөнөттөгү кадамдарын жергиликтүү элге башынан тааныштырып, ачыкталса болмок. Лицензияларды көзөмөлдөгөн жетекчинин наамындагы банк ячейкасында декларацияланбаган 900000 $ бекер табылган эмес да- кең байлыктарыбызды коррупцияга батырган 28 жылдык адат токтой элек. Кытай инвесторлоруна "все будет ок, кайгырбагыла" деген жетекчилер азыр кайда? Өкмөтүбүз бул маселенин түпкү тамырынан бери оңторуп, кылдаттык менен карап чыкмайын, ызы-чууну басып жүргөн өрт өчүргүчтөрдөй - "пожарник" болуп жүрө беришет. Элдин ачуусун түшүнөмүн, туугандар. Бара тургандай жолу деле алыс эмес, бирок алдын ала айтыла турган күмөндөр бар. Бул Кытай ишканасын ачтыртканда, лицензия берип, кандай келишимдерге кимдер кол койду экен? Бекеринен алар кетпейбиз деп өжөрлөнгөн жок да. Аны расмий кагаз жүзүндө тактап, элге маалыматты кеңири таратуу парзбыз. Эртеңки күнү, эл аралык соттон арыз жазышып, келишимге макулдук берген Кыргызстан аткарбай койду деп миллиондогон долларга доо коюп мамлекетибизди жыксачы? 2021-23 жылы кайрып бере турган Тышкы карыздын санына ТЭЦтин жарым миллиард карыз кредиттин үстүнө түшкөн, желкебиздеги дагы бир жүккө айланып кетээрине капаланган жерим. Туура түшүнгүлө, болгонду болгондой, жагынам дебей, элге маалыматты ачык айтып көнүп баштасак - эртеңки өнүгүүнүн жолун ачаарбыз.. #СолтонСары #БарБолгула