..... Мезгил тынбай азайтса да кубатты, Адам улам болоюн дейт кубаттуу. Күндөй өмүр байкалбастан жок болот, Нуру өчүп батып кеткен сыяктуу. ⠀ ..... Олтурганча телефонду кармалап, Куран үйрөн окусаң да тамгалап. Кыпындай бир жакшылыгың унутпа, Жаннаттагы жашооң үчүн арналат. ⠀ ..... Мүрзөм кийин толсун десең нур менен, Намаз оку сырдаш болуп түн менен. Өлүм даамы кылыч менен бөлгөндөй, Эчен кыйын тер агызып сүрдөгөн. ⠀ ..... Кечээги күн эми келбейт кайрылып, Берешен бол көңүлдөрдү таң кылып. Сараңдыгың сызга айлантат денеңди, Кетсең дагы алтын кабыр салдырып. ⠀ ..... Оо, көңүлүм кейибечи анчалык, Кереги эмне болбос ишке чаң салып. Акмактардын мамилесин акырын, Ыргытып сал таштандыга алпарып. ⠀ ..... Периштедей жашасаң да күндө сен, Пенделерден чыгат билгин сүйбөгөн. Кек сактабай чөлдү гүлгө айлантып, Кетериңде жылмайып кет дүйнөдөн. ⠀ ..... Пенде өмүрдө сүйөт жана сүйүлөт, Бирде күлүп, бирде туруп күйүнөт. Бирок билгин кандай адам экениң, Кимге ашык болгонуңдан билинет. ⠀ ..... Кир дүйнөдөн көңүл кургур булганды, Ким каалабайт түбөлүктүү жыргалды. Жашай бер деп акыретке аттанып, Жакшы адамдар кетип калган турбайбы. ⠀ ..... Карай калсам бир кылчайып артыма, Кайгы салган өкүнүчтөр бар тура. Кечээги күн батпачудай көрүнүп, Кечир ата жетпептирмин баркыңа. ⠀ ..... Күнөөбүз көп көбүгүндөй деңиздин, Күндө эстеп жан дүйнөмдү кейиттим. Алла Таала бирок чексиз мээримдүү, Ал кааласа берет төрүн бейиштин. ⠀ ..... Өмүр мынча кыска экенин карачы, Өлүм менен бир карыштай арасы. Баласына Азирейил келгенде, Пайгамбар да боло албаптыр арачы. ⠀ ..... Ачуу тагдыр кимдин келсин көргүсү, Сыноолорго чыдап жашайт эр киши. Бүгүн тарткан кыйынчылык түшүнгүн, Эртең келчү бакытыңдын белгиси. ⠀ ..... Кейибегин сонун күндөр алдыда, Жетиш үчүн басуу керек алдыга. Сабыры жок алсыз жандын канчасы, Тура алышпай жаткан жерде калды да. ⠀ Жеңишбек Жумакадыр