Келгиле окуйлучу. Үч сөздү ушак кылбай, Үмүткө тузак курбай. Шал баскан денебизди, Шайтанга учак кылбай. Уйкудан качалычы, Ууз сөз таталычы. Эселек мээбиздин, Эшигин ачалычы. Бал китеп тандайлычы, Барактап жандайлычы. Караңгы көңүл менен, Кабырда калбайлычы. Сотканы таштайлычы, Сонундан баштайлычы. Жан чыкса сынактар бар, Жанбаштап жатпайлычы. Көр намыс ороңдойбуз, Көп билсек жоголбойбуз. Эч китеп тааныбасак, Эч качан оңолбойбуз. Тоокчо чокуп алып, Төө десең өзүнө алып. Аалымчик болуп бүттүк, Алты сөз окуп алып. Көөнүндө жаштык кулап, Көбүндө карттык турат. Бир күнгө бир адамга, Бир китеп аздык кылат. Китеп бул деңиз экен, Китепсиз кейиш экен. Ошончо китеп билсең, Ошончо жеңиш экен. Кыргызды айайлычы. Кыйнабай тайайлычы. Эч десе окуганга, Экөөбүз жарайлычы. Китепти өбөлүчү, Китепке чөгөлүчү. Билигин сурап жүрбөй, Билимдүү өлөлүчү. Сөз берсек туралычы, Сөз баалап угалычы. Келгиле китеп менен, Келечек куралычы. Жеңишбек Жумакадыр.