Басайын десем, бутум баспай, кыйкырсам, үнүм чыкпай кыйналдым. Адаттагыдай кара кишилер келди. Кыткылыктап улам каткырат. Жатаканадамын. Жанымда уктап аткан кыздар бар. Жок дегенде кыйкылдап чыгып аткан үнүмө бирөө жарым ойгонуп, мени ойготсо дейм. Көзүмөн өтөт тим эле. Болгон күчүм менен алыштым. Чоң энем үйрөткөн чала бучук келимесин айтам, жардам бербейт. Кара терге түшүп алышып атып, шайым ооду көрүнөт. Бир кезде ак кийинген бир апа келди. - Балам, антип жеңе албайсың. Жүрөгүңдү тазала! - деди. Мен таарынткандын, мени таарынткандын баарынын аттарын атап, бирөөнөн кечирим сурап, бирөөнү кечирип, Жаратканга жалбарып, көкүрөгүмдү тазалап берүүсүн өтүнүп, билип - билбей кетирген айыбымды кечиришин тилендим. "Көралбастык, кызганычты алып сал"- дедим. "Жан дүйнөм таза, жүрөгүм таза, көңүлүм таза" дей бердим. Бир кезде менден ак бууга окшош нерсе чыкты , караларды алгачкы ирет жеңди. Болбосо, тээ балачагыман бери басып, кыйнашаар эле. Андайда байкап калган чоң энем мени ойготуп, макисин алып чыгып, өзүнчө кобуранып, башыма жаздайт. Чоң энем да а түгүл үнү чыкпай, кыйналып атып, бир кезде кыйкырып ойгонот. Жакасын карманып, сүйлөнүп, албарсты басты деп коер эле. Студент болуп келип, араң жеңдим. Андан кийин мени антип кыйнабай калды. Кийин турмуш курганда дагы басты. Баягылар эле. Кадимкидей келбети бар, сүйлөшөт, каткырат, капкара болгон немелер. Демим чыкпай энтигип, дагы күрөшөм. Алым жетпей, эми мына деп кол түшүрөөрдө ак кийинген апа дагы келди. Жолдошум мн уулум уктап аткан. Апа уулумду көрсөтүп, - Уулуңдун көкүрөгүн карачы! Кандай таза? Көкүрөгүнүн тазалыгын көкүрөгүңө сал!- деди. Кочуштап уулумдун актыгынан алып, көкүрөгүмө салып, - Баламдын жүрөгүндөй жүрөгүм таза! Адалым көп. Кечир мени, Жараткан! Мен да көңүлүмдө калгандын баарынан кечирдим. Көңүлүн оорутсам, кечирим сурайм. Жан дүйнөм таза"- дей бердим. Актык чыгып менден дагы бир жолу караны жеңдим. Адам баласы үчүн көкүрөктүн тазалыгы маанилүү экен. Жакшылык чакыргыңар келсе жашооңорго, башыңа келген кырсыкты жеңгиң келсе, жүрөгүңдү тазала! Кыргыз элим көңүлүн, көкүрөгүн тазаласа эле көлүбүзгө ак куу конгондой, качырып жиберген касиетибиз кайтып келчүдөй сезилет. #жөнэлеойлор