1136 66
29.06.2020
ДУШМАН – СТИМУЛ “Өзүӊө каалабаганды, бөлөккө да каалаба”,- деген сөз бар. Албетте баарыбыздын өз деӊгээлибизде душманыбыз болот. Бул табигый көрүнүш. Маселе сиз душман болбоӊуз, өзүӊүзгө каалабаган жамандыкты башкага каалабаӊыз. Бул кадам бизди көрө албаган, бизди сындаган, бизге жамандык жасаган адамдарга болгон көз карашты өзгөртүүгө арналат. Жаман мүнөз адамдардан келген энергияны өзүӊүздүн акыл казаныӊызга салып, иштетип туруп өзүӊүздүн өнүгүү жолуӊузга болуп көрбөгөндөй жагымдуу стимул кылып алууга болот. Душмандарыӊыз сөзсүз сиздин кемчилдигиӊизди сөз кылат биринчи, алгач ошол кемчилдиктер менен курөшүӊүз. Кийин алар сиздин жакшы сапаттарыӊызды да жаман деп атай башташат, каралашат. Ал учурда сиз алардан алда канча бийик экениӊизди билип сүйүнүп коюӊуз. Себеби жашоосу кызыктуу адам бирөөнү сындабайт, бирөөнүн кемчилигин сүйлөгөнгө убактысы жок. Кудум азыркы экөөбүз сыяктуу. Негизинде сиз жашоодо жеӊе турган бир кокунучтуу душман бар. Ал сизсиз! Калган душмандар маселе эмес. Бирок сиз мага азыр толук түшүнө албай жатканыӊыз үчүн бир окуяны мисал тартайын. Бир диндар адам айыл- айылдарды кыдырып, адамдарды жакшылык кылып, Кудайга кайтууга үндөп жүрөт. Аны уккан ошол айылдын жашоочусу диндар адамга келип аябай жаман, акаарат сөздөрүн айтат. Элдин башын айлантып жатасыӊ деген өӊүттө сөз айтып, түрткүлөп кууйт. Баягы диндар маӊдайында сөгүнүп аткан немени угуп туруп, - Айтып бүттүӊүзбү,- деп сурайт. Тиги, - ооба, дейт. Диндар унчукпастан басып кетип калат. Аны көргөн тиги неменин ичине от түшүп, үйүндө түнү менен ойлонуп, эртеси кайра диндар адамга келет. Бирок ал жолу кечирим сурайт. Колуна гүл берет. – Сен чын эле Кудайга берилген адам экенсиӊ, мен сага жаман сөз айттым, кечээ. Мени кечир,- дейт. Диндар адаттагыдай айтып бүттүӊбү,- деп сурайт да басып кетет. Ошондо эч бир сөзү мааниге турбай калган тиги адам кыйкырып жиберет. – Эй, мен кечээ сөктүм унчукпадын, бүгүн кечирим сурадым унчукпадыӊ!- деп. Анда диндар жай гана бурулат да, - Кул адам гана кожоюндун маанайына жараша абалын өзгөртөт. Мага сенин маанайыӊдын кандай зарылдыгы бар? Себеби мен сенин эмес, бир Кудайдын кулумун!- деп жылмаят.
