5240 407
24.02.2020
Бизге бөлүнүп - жарынган аябай жагат. Сөзсүз бөлүнүп алып, бири бирибизге акаарат келтирип, эки - экиден согушуп турбасак, чай ичпегендей башыбыз ооруйт. Тээ ата - бабалар уруу - уруу, бай - кедей, коммунист, социал, кызылдар - актар....дагы түрдүү - түрдүү бөлүнүшчү. Түндүк - түштүк эски тема. Дин темасы да эскирип баратат. Болбосо, "Мен мусулман, сен теңирчи" темасынын да жакшы эле үнү чыкты. Азыр шайлоого карата партияларга бөлүнүү модасы жакындап келе жатат. Күзүндө хайп болот. Бир саясатчы үчүн анын атын коруш үчүн бири бирибизге жугунду куябыз, каргайбыз, уу тилибизди агызабыз. "Сыдыман элди бөлдү!" деп чалкаңардан кетип, көзүңөр аңтарылып, "шоковое состояние " болуп атканыбызга өлө таң калып атам. Биз күндө эле бөлүнүп, бири бирибизди ашатып эле жүрбөйбүзбү дейм да. Балким бул тема көкүрөктө жарыла албай турган жара болгон үчүн анын сөзү козготуп жибергендир? Ынтымактуу, биримдиктүү эл болгонубузда маани деле берилмек эместир. Чачырап, бири бирибизге душман болуп жүргөндө Манас ата жыйып, бир түндүктүн алдына башыбызды бириктирбеди беле?! Биз сырттан душман келгенде гана биригип, душман жокто " скучно" болуп кеткенде өз ара бөлүнгөндү жактырат окшобойбузбу?! Кандагыны тазалоо, гендегини кетирүү мүмкүн болду бекен? Ойлонуп көрсөм, ар ким өзүн тыйып, өзүн оңдоп, өзүн тарбияласа эле болот деген тыянак келип чыгып жатат. Башканы тыйып, башканы сөз кылып, башканы соттоонун кажети канча анда?? Башкага келгенде эле акылдуубуз. Мээбиз өлө иштеп кетет. Прокурорбуз. Өлүм жазасына тартып жиберебиз. Өзүбүзгө келгенде сүттөн аппак, кашка суудан тазабыз. Адвокатпыз. Сыдыманды эмне кылабыз? Оболу өзүбүздүн оозубузду, арам оюбузду тыйып алалы. #жөнэлеойлор
