3737
17.09.2019
ШЕЙИТТИН КАНЫ
(Чекарада курман болгон баатыр мекендешим Равшан Муминовго...)
_
Бейпилдиги үчүн элдин, мекендин,
Ортосунда көйгөйү көп эки элдин.
Ак кызматтуу, аска-зоодой баатырга,
Ушул экен акыретке кетер күн....
_
Жүрөк сыздайт... Жеңилдетип кейишти,
Көк жал эрге буюр, Алла, бейишти.
Мээлеп туруп аткан жанды акыры,
Куткарбайт го каны кайран шейиттин..
_
Өтөт баары: атылган да, аткан да,
Түшпөс жан жок ажал койгон капканга.
Кан төккөндөр кантер экен суракта,
Күнү бүтүп, өлүм даамын татканда.
_
Желбирешкен эки өлкөнүн желеги,
Чекарада көйгөй толо береги.
Мекенимдин ыйык чымчым ылайы,
Башка жердин кымындай жок кереги.
_
О, Жараткан, тынчтык, сабыр, акыл бер,
Ортобузда болгой сүйүү, асыл мээр.
Кан төккөнгө тообо кылып токтойлу,
Коюнуна ала электе такыр жер....
_
Карган апа, күткөн жубай, үч бала...
Кайран баатыр эми аларга түш гана.
Алар үчүн дуба кылам жалбарып,
Өмүр, ыйман, оомат тилеп шүк гана....
_
Көөдөндөрдө ыйман, намыс, ар болсун,
Кыргызымдын кыйырлары шаар болсун.
Жанын тиштеп четте турган чеп сымал,
Чек аранын баатыр эли бар болсун!
Нуржигит Кадырбеков
17-сентябрь, 2019-жыл
#чекара
#равшанмуминов
