13.08.2020
Бир окуу жайда жүрүп, жолугуша албай калдым. Мен студент болгон алгачкы эле айда залкар обончу акыретке аттанып кете берди. ОшМУнун чоң азем залында мемиреп жаткан денесине муңая карап, түбөлүккө коштошкон күнүм дале эстен кетпейт. Бейиши болгой, ылайым.

08.08.2020

02.08.2020

31.07.2020
Ушул Курман Айт майрамында курмандыкка чалынган жандыктардын баары, ылайым, калкка каран түн болгон касиетсиз апааттын алыстап, артын карабай кетишине чабылган садага, арналган түлөө болгой. Бүгүнкү өзгөчө майрам - эл-жерибиз үчүн аза-муңду аз да болсо унуткарып, көңүл-сезимдерге жакшылыкка карата үлкөн үмүттүн үрөнүн сепкен, бакытка, бейпилдикке жана сак-саламатыкка карай бурулуштун ак жолтой учуру болуп калгай. Айтыңыздар маарек болсун! НК, 31.07.2020

30.07.2020
Аза күнү... Ылайым, артынан рухий тазаруу жана ийгилик жылоолгон кез келсин. Буюрса, эртеңки кылчу курмандыктарыбыз бүгүнкү күткөн аза туманын таркаткан керимсел шамал сыяктуу болгой... Апааттан сабак алалы. Ансыз да ачышып турган көңүлдөрдү, муңканып турган жүрөктөрдү жаралабай, бири-бирибизге арка-бел болуп, баштарды, жүрөктөрдү бириктирип, ынтымак менен сыноо тоскоолдуктарын сындырып өтөлү. Белди бекем бууйлу! Оңололу! Жаман адаттарды таштап, жакшы амалдарды баштайлы! Элибиз адептүүлүгү, уяттуулугу, бекем ынтымагы жана күжүрмөн эмгеги менен ааламга атагы чыксын. Балким, маркумдарга ошонун сообу тиер. Ошону менен алардын арбактарын ыраазы кыларбыз... 30-июль, 2020-жыл

27.07.2020
Элим, жерим - демим! Ооматың артсын, Кыргызстаным!

25.07.2020
“Бир адамды куткарган, бүткүл адам баласын куткарганга барабар” 🔅 “Бир адамдан - бир китеп” элдик долбоорунун уюштуруучулары жалпы журттун башына түшкөн кыйын кырдаалдан чыгууга салым кошуу максатында «Элибиздин саламаттыгы үчүн» акциясын баштап жатабыз. Сизди дагы салым кошууга чакырабыз!!! #БиргеЖеңебиз 🔅 Чогулган акча каражаты кайда жумшалат: 🔹COVID-19 илдетинен жабыркагандарга керектүү дары-дармектерди алууга; 🔹Дарыгерлерге коргоо каражаттарын, зарыл жабдыктарын алып берүүгө; 🔹Абалга байланыштуу кыйналып жаткан муктаж үй-бүлөлөргө жардам көрсөтүүгө; 🔹Зарылчылыкка жараша шаар, регион, айылдарга тиешелүү жардамдар бөлүнүп берилет. 🔅 Долбоорго чогулган акча каражаттар боюнча ачык-айкын фото-видео отчёту Фейсбук, Инстаграм баракчабызга байма-бай жарыяланып турат. Сыркоонун сыноосун бирге жеңебиз! Ден-соолукта болуңуз!!! #БиргеЖеңебиз✊🏼

21.07.2020
Бул ыр жыйырма жыл мурда жазылган. Ушул апаат күндөрү кайра кайталап окуп, омиин деп алакан жайып турам... Буюрса, баары сонун болот! ТАҢДАГЫ ТИЛЕК Тилеймин амандыгын адамдардын, Тилеймин кенендигин кадамдардын. Тилеймин иши илгери болсо экен деп, Мээнети, кылгандары адалдардын. Тилеймин бейпилдигин замандардын, Түзөлүп-оңолушун жамандардын, Тилеймин аткарылып ишке ашуусун, Түбү түз, адилеттүү таламдардын. Тилеймин эркиндигин жарандардын, Бактысын, ырыскысын аман жандын. Башкысы, адамдыгы сакталса экен, Бай-кедей, падышанын, чабандардын. Тилеймин кыргызымдын өнүгүшүн, Таалайдын шооласына көмүлүшүн. Көп улут, көп өлкөнүн арасында, Түндүгү бийик болуп көрүнүшүн. Тилеймин ар бир жанга көңүл куунак, Карыга – ыйман, жашка – өмүр-кубат. Ынтымак, ырыс күткөн ата журттун, Ыргыткан ташы турсун өйдө кулап. 23.10.2000

20.07.2020
Кыргызстанда канча адамды карате менен машыктырып, чемпиондорду чыгарып, элдин чың ден-соолугуна себеп болгон урматтуу Мирлан сенсейибиздин уулу Жараткандын ушундай сыноосуна туш болуп, операцияга каражат издөөгө аргасыз кылууда. Кайрымдуулук балээден коргон, ооруга шыпаа. Аз-көп дебей колдон келген көмөгүңүздү көрсөтүңүз, бир тууганым. Жакшы адамдардын өмүр-жакшылыгына себеп бололу. Алла элибизди апааттан куткарып, бири-бирибизге мээримдүү кылсын

15.07.2020
Караңгыдан кийин күтүп таң турат, Капалыктан кийин күтүп шаң турат. Туман таркайт, кара булут жазылат, Аркасынан Ай, Күн тиет жаркырап. Аары чагат, чаккан менен бал сунат, Нанга айлантыш үчүн буудай жанчылат. Эртең бышып, шилекейди агызчу, Мөмө бүгүн көкмөк, ачуу – кам турат. Кар кеткен соң байчечекей баш багат, Каптабаса жалын бышпайт аш-тамак. Суктандарган сулуу сарай тургузуу – Чалчык кечип, жер көөлөөдөн башталат. Сынактардан мээнети жок өтпөйсүң, Ашыгыңа азап тартпай жетпейсиң. Ашуу ашып, кезермейин чөл кезип, Көксөп жүргөн көркөм жайга көчпөйсүң. Жазда келген чабалекей кушундай, Жакшы күндөр келет бизди утурлай. Жакут, алтын жатат ылай астында, Жашообуздун мыйзамы дал ушундай! Курсагы ток баркын билбейт машактын, Сабырсыздык башаты бүт чатактын. Түшүндүргөн көп нерсенин кадырын, Сабагы мол, балким, келген апааттын. Көрүп жатып бешенеге жазганды, Унутпайлы чилдеден соң жаз барды, Ыйман сактап, сабыр кылсак, буюрса, Жакшы күндөр келерине аз калды! Нуржигит Кадырбеков 14.07.20, 14.29 .

14.07.2020
Баарыңар балдарыңардын, жакындарыңардын маңдай-кашына аман-эсен барсаңар экен... Силер оору, коркунуч, ажал менен бет келип, адам өмүрүнө калкан болуп баатырдык кылсаңар, биз коңулда отуруп, интернеттен силерди анан бири-бирибизди катыра сындап, кылдан кыйкым таап баатыр болуп жаткандайбыз. Көңүл чөгөрчүү көп сөздүн ушул азыр кымындай кереги жок эле! Буюрса, жакшы күндөр алыс эмес... Оо, Жараткан, баарыбызга ыйман, адеп жана нысап бер. Биримдик, ынтымак ырооло.

13.07.2020