09.11.2019
КӨПӨЛӨК ТИРҮҮБҮ? Шакирт колуна көпөлөк кармап, алаканына абайлап артына бекитип барат. Устатына жымыңдап барып: "устат, айтыңызчы, менин колумдагы көпөлөк тирүүбү же өлүүбү?" - деп суроо узатат да, өзү ойлонуп "азыр тирүү десе колум мынын мычкып салып өлтүрүп көрсөтөм, өлүү десе тирүү бойдон көрсөтөм" - деп даярданып турат. Шакиртинин жылмайып турганын карап устаты ушинтип жооп кайтарат: "БАЛАМ, КОЛУҢДАГЫ КӨПӨЛӨКТҮН ТИРҮҮ ЖЕ ӨЛҮҮ ЭКЕНДИГИ САГА БАЙЛАНЫШТУУ" Урматтуу өкүл балдарым, жашооңордун таттуу же ачуу болуусу эң биринчи орунда ӨЗҮҢӨРГӨ БАЙЛАНЫШТУУ. Шылтоону сырттан издебегиле. ҮЙ-БҮЛӨ БИРИМДИК МЕНЕН БАШТАЛАТ, ЫНТЫМАК МЕНЕН САКТАЛАТ!!! 09.11.2019 ИДРИС АКЫН

09.11.2019
ЭЧ КИМГЕ КУЛАК САЛБА!!! Бийик тоого жүздөгөн курбакалар секире баштаса, миңдеген курбакалар эки четте карап турушат. Мелдеш башталар замат тоонун бийиктигин көрүп, эки капталдагы бакалар: "БЕЧАРАЛАР, БАЙКУШТАР, ЖЕТЕ АЛБАЙСЫҢАР!" - деп бакыра башташат. Чындап эле жарым жолдон курбакалар кулай башташат. Баары кулай берип, акырында бир гана курбака бийик чокуга жетет. Башка курбакалардын баары жетип барып: "азаматсың, бир гана сен жеттиң. Кантип жеттиң, сыры эмнеде? "-деп суроо узатат. Баарын карап турган жеңүүчү курбака СӨӨМӨЙҮ МЕНЕН 2 КУЛАГЫН КӨРСӨТҮП, КУЛАГЫ УКПАГАНЫН ТҮШҮНДҮРӨТ. Көрсө ал курбака ДҮЛӨЙ экен. ЖЫЙЫНТЫГЫНДА Баарына кулак сала берсең эч нерсе кыла албайсың. Тескерисинче депрессияга кабылып, психигиң чыгып, эрте эле өлүп каласың. Көздөгөн бийик максатыңа бекем кадамыңды таштап бара бер. Көңүлүңдү калтыра турган бир да сөздү укпа, андайларга ДҮЛӨЙ кейпин кийип ал! Жакшы жашоо кааласаң Жакшы кеңеш - билип ал Көңүл бурбай ар кимге Жинди чалыш болуп ал 09.11.2019 Идрис акын

08.11.2019
ҮЙ-БҮЛӨ 1. Курулуш өтө кыйын, бирок бузулушу өтө оңой болгон ҮЙ-БҮЛӨ деген ыйык мекеменин кадырына жетүү керек! 2. Үйлөнүү оңой, ҮЙ БОЛУУ КЫЙЫН 3. ЭРИҢДИ ЖАМАН КӨРСӨҢ ДА (аялыңды жаман көрсөң да) жакшы көргөнгө аракет кыла бер, шайтандын же напсиңдин жаман көрсөткөн кишисинде Аллах жакшылыкты катып койгондур.... 4. Эрлерин адам кылып тарбиялап алган АЯЛДАР көп, бирок АЯЛДАРЫН АДАМ КЫЛЫП ТАРБИЯЛАП АЛГАН ЭРКЕКТЕР АЗ! 08.11.2019 ИДРИС АКЫН

08.11.2019
БАЙКУШ БҮРГӨ же БАЙКУШ БАЛА (Ата-энелердин эсине) Бүргө 2 метр ашык секире алат. Бийикке секирген бүргөнү 5 см кутуга салып ЭКСПЕРТТЕР карап отурушат. Секирген сайын башы катуу урулган бүргө, акыры башы ооруп секирбей калат. Бир канча убакыт күзөтүп караса, башынын оорушунан коркуп калган бүргө бир да секирбей калат. Ал бүргөнү кутудан чыгарып койо бергенде да секирбей койот. Боштондукта жүрсө да көнүп калган адатын таштабайт... ОШОНДУКТАН Мындан улам, балдарыбызды да бүргөдөй кылбай, аракеттерин буубай, жөн отур, кылба, нетпе дей бербей, тескерисинче багыт берип, дем берип, кубаттап туралы... (Керек болсо окугула, болбосо башымды оорутуп жаман комментарий жазбагыла. Бир китеп окуп бир макала жазасын, жаманын өчүрүүгө бир күн, мээңден өчүрүүгө бир ай коротуп жатам!) 08.11.2019 Идрис акын

07.11.2019
ТЕМИР ТАПКА КЕЛГИЧЕ КӨМҮР БҮТӨТ АДАМ АКЫЛГА КЕЛГИЧЕ ӨМҮР БҮТӨТ. НЕГИЗИ 1.Менин макалаларым мага да жакпайт.. 2.Башымда балакет жок туруп башкаларга акыл айтканым үчүн өзүмдү-өзүм жек көрөм.. 3.Жазган макалаларым үчүн жеке баракчама байланышып кээлери "рахмат" - деп айтса, кээлери "акмак" - деп айтышат... 4.Рахмат-дегендер ыраазы богула, акмак-дегендер кечирип койгула... 5.Силер мени жек көргөндөй мен да өзүмдү өзүм жек көрөм... Сабагымды койбой, башкаларга окшоп жеген тамагымды койсом балким мындай болбойт эле... 6." Акын - элдин уулу" - деп койсо чокчоңдоп, элдин көйгөйүн менин көйгөйүм-деп жаза берип, элдин кыжырына тийип алдым кошойт... 7. Битке өчөшүп көйнөгүңдү отко салаба - дегендей, бизге өчөшүп бир - экөөң башыңды оорутпа... ЖҮРӨК ЖҮКТҮҮ САНДЫК: ЭП КӨРГӨНҮН ДА, ЖЕК КӨРГӨНҮН ДА БАТЫРА БЕРЕТ ЭКЕН. ЖҮРӨГҮҢӨР ООРУБАСЫН. КОШ БОЛГУЛА. БАКЫТКА БАЛКЫП, БИР-БИРИҢ ТАРТЫП ЖАШАЙ БЕРЕЛИ...

07.11.2019
Жөн эле эсте калган МАКАЛДАР 1 Ар бир адам менсинет, куурай гүлгө теңсинет... 2 Баарына жагамын десең, бирине да жакпайсың... 3 Жемди көргөн бөдөнө торду көрбөйт... 4 Амалкөйдү адашып ашынам деп жүрбөгүн, ач көз байды адашып кошунам деп жүрбөгүн... 5 Биттүү конок батат, иттүү конок батпайт...

01.11.2019
КЕЧИНДЕСИ КЕЛГЕН ОЙ 1. Тууган болуп кирип алып койнуңа Жылан болуп оролгон көп мойнуңа Идрис акын ...... 2. Досуң болуп алдап тутуп колуңду Доңуз болуп булгаган көп жолуңду Идрис акын ...... 3. Кээ бир адамдар үстүнө кийген кийиминен да арзан болушат. Идрис акын ...... 4. Жашоодо жаңылып кетүүгө жарым эле секунд жетишет. Идрис акын ...... 5. Сулуулугуң менен мактанба-аны Кудай жараткан. Улуулугуң менен мактанба-аны да Кудай тандаган. Мактансаң бир гана КӨРКӨМ АДЕБИҢ менен мактан. Анткени бир гана ушуну өз өмүрүңдө өзүң табасың. Идрис акын 01.11.2019

01.11.2019
КӨК АСМАНДА ЖАРКЫРАСА ЖЫЛДЫЗДАР ЖЕР БЕТИНДЕ КӨБӨЙҮШСҮН КЫРГЫЗДАР ... Аалам билет кыргыздыгым кийимден Кылымдардан кылым ашып кийилген Ушул күнү кыргыз муну кийбесе Урпактарга кантип айтам кийин мен 01.11.2019 Идрис акын

01.11.2019
ЭЛ ЭМНЕ ДЕЙТ?! 1. Эл эмне дейт экен? - деген суроону жакшы ишти аткарып бүткөндөн кийинкиге таштап үйрөнөлү. Антпесек, эмне дейт экен- деп отуруп, эч кандай ЖАКШЫЛЫК ЖАСАБАЙ ЖАТАБЫЗ. 2. Ал эми жаман иштерди болсо, тескерисинче: эл эмне дейт, кокуй уят, эл караган жүзүм жерди карап турбасын, "Алланын каарына калбайын, элдин каргышын албайын" - деп, эл менен эсептешип туруу керек. Анткени калк айтса калп айтпайт - деген кеп бар кыргызда. 3. Пикирди ар кимден ук жакшыдан да, жамандан да, достон да, душмандан да, жаштан да, улуудан да, аялдан да, эрден да, бирок ЧЕЧИМДИ ӨЗҮҢ ЧЫГАР. Анткени өзүң үчүн озуң гана жооп бересиң. Эл оозуна элек тутсаң, ар нерсени айта берет. Жаңылбоонун бир гана жолу Жараткандын буйругуна бекем болуу! ЭЛ СУУ БОЛСО, МАМЛЕКЕТ СУУ ҮСТҮНДӨГҮ КАЙЫК. КАЙЫКТЫ СҮЗДҮРГӨН ДАГЫ СУУ, ЧӨКТҮРГӨН ДАГЫ СУУ. Конфуций (Элден уялууну билбеген элиталарга жана элитаны өзү шайлап өкүнүп отурган элге жаздым) 01.11.2019 Идрис акын

01.11.2019
ГҮЛ Гүлгө чымын-чиркейдин баары конот, бирок аары гана анын балын соруп алат. Иоганн Вольфганг Фон Гете Дарактагы мөмөнүн пайда болушу үчүн анын гүлдөрү солуйт. Иоганн Вольфганг Фон Гете Кээ бир адамдар жаңгак сыяктуу. Сыртынан караганда катуу көрүнгөнү менен, ичиндеги маңызын билгенден кийин кеткиң келбейт. Идрис акын Дарактарды эч ким жалбырагы үчүн сатып албайт, анын мөмөлөрү үчүн сатып алышат. Адамдарды да кийиминен баалабай, билиминен баалашты үйрөнөлү. Идрис акын Адамдардын жашоодогу орду, жалбырактардын дарактагы орду сыяктуу. Бири ылдый, бири жогору жайгашканына карабай баары бирдей болушат. Жогорудагы адмадар ылдыйдагылардан айырмаңар бир гана ээлеген ордуңарда, адамдык даражада бирдей экениңерди унутпай, баш көтөрбөгүлө... Идрис акын Жума маарек болсун, достор 01.11.2019 Идрис акын

31.10.2019
ОЙЛОНУП ОКУГУЛА! ТАМШАНЫП ТИКТЕГИЛЕ! Ош шаарындагы "УММУ МУХАММАД" медресесинде мамлекеттик тилдин 30 жылдыгына карата өткөрүлгөн чакан иш чарага катышып келдим. Балдардын ар тараптуу өнүгүшүнө өзгөчө көңүл буруп жаткан устаттарга урматым ашып кайттым. Келчектин аалымдарына батаа берип фото баянга көз салыңыздар, достор.... ------------------------ Атасы: -мен сизге баламды шакирттикке алып келдим Киши: -кечиресиз менин өнөрүм жок. Идриске окшоп акын да эмесмин Атасы: -өнөрүңүз болбосо да мейли. Мен сизди көптөн бери күзөтүп жүрөм. Менин балам сиздин жаныңызда жүрүп, АДАМДАРГА ЖЫЛМАЙЫП КАРАШТЫ ҮЙРӨНСӨ болду... ---------------------------------- Урматтуу ата-энелер, балдарыңарды телефон же техникага байлап бербей, жакшы адамдарга байлап бергиле ---------------------------------- 1 апта үйдө отурбай айылга барып туугандарга эгин жыйнап талаада иштеп келсин, эмгекке тарбиялансын ----------------------------------- 31.10.2019 Идрис акын

31.10.2019
Сүрөттөгү сөздү карагыла, акындагы көздү карабай... Ата-энелер, мугалимдер жана окуучулар үчүн өткөрүлгөн семинардан фото- баян.. Араван районунун борбордук маданият үйүндө болдум, уюштуруучулардан Аллах ыраазы болсун. Келгендердин баарын Кудай сүйсүн. Келбегендер келээркиде көрүшөлү буюрса. БҮГҮНГӨ ЧЕЙИН ЭЧ КИМ КИТЕПТИ ЧЫНЫГЫ НАРКЫ МЕНЕН САТЫП АЛГАН ЭМЕС, ЖАЛГЫЗ ГАНА БАСМАКАНАНЫН БААСЫНДА САТЫП АЛГАН. (Ральф Уолдо Эмерсон) 31.10.2019 Идрис акын

30.10.2019
ЖАМАН КӨРБӨЙ, ЖАКШЫЛАП ОЙЛОНОЛУ ЖАЛКООЛОНБОЙ ЭРТЕРЭЭК ОЙГОНОЛУ! Билим алуу мектеп бүткөндөн кийин токтошу мүмкүн, бирок сабак алуу өмүр бою уланат... Университетте окуп жатканда да чоң сумкамын бир четине нан салып барчу элем. Бир аптада бир жолу сумкамдын ичин нандын ушагынан тазалап турчумуп,анткени китептердин арасында ушаланып кетчи кээде... Бугун мектептерде ушул сумканы көтөрүп калган балдар, эртең университетке бир дептер менен сабакка барып жатышат... Оор да болсо айтайын! Бугун партада уктаган балдар, эртең парламентте укташат! Урматтуу ата-энелер, балдардын сумкаларын жана кийим - формаларын көзөмөлгө алыңыздар! Илгери биз ата-энебизден 3 эле учурда: 1-сентябрда, жаңы жылда жана акыркы конгуроодо гана акча алчубуз. Берген акчасынын жарымын ашырып келчүбүз. Азыр жакын жерде жашаган окуучу жок дегенде 20 сом менен келип, сабакта эмес столовойдо тойго келгендей сабак менен иши жок отурат... Мектептен талап кылган формалар, ушул балдар кийип бараткан кийимдерден эки эсе арзан.... Урматтуу ата-энелер 2-чейректен башынан баштайлы анда... Эчтен көрө кеч жакшы! 30.10.2019 Идрис акын

29.10.2019
КЕЛИН КӨЙНӨК (келин фата) Арендага алынган бул кийимди кимдер гана кийбеген... Бул кийим ушинтип сүйрөлүп кай жерлерге чейин кирбеген... Эмнелер гана тамчылап, эмнелер гана тийбеген... Арендасынын өзү паланча сом... Ошол акчага он түрдүү кийим алса болот... КЕЛИН КӨЙНӨК кийдирбесең эрге тийбейм - деп тойду токтотуп койгон кыздарды да укканмын... Келин болуп бара жаткан күндөн баштап жерге этегиң тийип сүйрөлбөсүн, кызым... Өзгө жердеги жашооңду жүдөп баштаба! Салондон чыккандан бери жерди чийип келген кир көйнөктү ак никеңелү ак өргөгө кийип барбагыла кыздар... Ушул кийим менен той кананын дарат канасында курбулары менен жүдөп жаткан көрүнүштү элестетип көр, балким көргөн да чыгаарсын, кызым... Кийимдин жукалыгынын айынан ички кийиминин баары көрүнүп турган бул кийимди алып берген эркекке да таң калам... Өзүңдүн махрамыңды ортого алып, денесин көрсөтүп, карап турба... УЯТЫ ЖОК ДЕГЕНИ - ЫЙМАНЫ ЖОК ДЕГЕН МЕНЕН БАРАБАР! 29.10.2019 Идрис акын

29.10.2019
Бир айдан соң коштошом Адамга эң туура тартылган нерсе АКЫЛ болсо керек. Себеби эч ким өз акылына нааразы эмес... Өрнөк берүү оңой, ӨРНӨК БОЛУУ КЫЙЫН... Соцтармактагы сайттын ээлери, өздөрүн чоң бир телеканалдын директорундай сезишет... Жазган макалаңды көп болсо миң адам окуйт. Миллиондогон элди башкарып жаткандай башкачабыз... Башкаларды артынан сындап атып, ошолордун артында калып кеткенибиз менен ишибиз жок... Адамдын жакшылыгын көрө албаган КӨРЛӨР көбөйүп баратат, аттиң... Бала кездеги үйдөгү ФОТОАЛЬБОМдон өтөрү жок... Ал альбомду жакындар гана көрөт эле. Азыр СОЦБАРАКЧА ошол альбомдун ордун басып, анын ичин иттер да аралап кетти... Бирөөнүн арманын, бирөөнүн жалганын, бирөөнүн тамагын, бирөөнүн сабагын, бирөөнүн көйгөйүн, бирөөнүн көйнөгүн, бирөөнүн ыйын, бирөөнүн сыйын, бирөөнүн тообасын, бирөөнүн модасын... Айтор жакшы менен жамандын ортосунда аралашып калган АКМАК болуп жатабыз... Жакында соц тармак менен коштошом. Баары ушул жакта жүргөнүнөн, аз да болсо пайдалуу макала киритип турайын деп кирген элем. Бул жакта баары акылдуу, артта калып калган адам сыяктуу уяла баштадым. Эсим барда этегимди жыйып кетип калайын... 29.10.2019 Идрис акын

29.10.2019
Биздин мекен Биздин мекен - бабалардан калган жер Биздин мекен - көптөрүнө арман жер Биздин мекен - жер бетинин жаннаты Биздин мекен - жан дүйнөгө дарман жер Биздин мекен - жанды берип сактайбыз Биздин мекен - бүт ааламга данктайбыз Биздин мекен - башка сендей таппайбыз Биздин мекен - кадырлайбыз-барктайбыз 29.10.2019 Идрис акын