17.02.2020 Bishkek, Kyrgyzstan
"Неберелериме" Өлчөөсүз жарпым жазып кубантаарым! Өмүргө өмүр көчүн улантаарым! Өпсөм да, канча ирээт кумар канбай, Өзүңөр кайра-кайра сурантаарым! Өрнөгүн чын жашоонун багынтканым,, Өмүрдүн таттуулугун таанытканым, Өзүңөр теңдеши жок бул ааламда, Өмүргө өмүр кошкон жарыктарым! Билбеймин кандай сыйкыр, сырлар барын, Билемин силер барда жыргал барын! Бир күнүм - миң күн азап силер жокто, Бириңен бириң өткөн жыргалдарым!

30.10.2019
Неберелерим Эртай менен Нуртай. Дзюдо боюнча чемпиондор. Быйыл Америкада, Польшада, Казахстанда, Кыргызстанда эл аралык турнирлердин жеңүүчүлөрү. Экөө тең биринчи, экинчи, үчүнчү орундар. Көзүмдөн алыс көрөөр каректерим! Өзүмдөн артык көрөөр жан эттерим! Кең болсун келечегиң, кем болбосун, Кемтигим түзөөр асыл данектерим!

15.04.2020
"Врачтарга" Жер шарында билбейм канча врач бар? Статистика тактап аны ырастаар? Деген менен: Жараткандан кийинки, Ден соолуктун сакчылары врачтар! Бизге кандай көп болсо да сынактар, Билбейм канча биз билбеген сынак бар? Бир билгеним, оору менен алышып, Бизди дайым сактап келет врачтар! Элдик врач, эл багына ырас бар, Эл ичинде, "Эл" деп жашайт врачтар! Элди кырмак эгер врач болбосо, Эч бир жанга көрүнбөгөн жыластар! Апааттарда үйдө жатып албастан, Ар бир күнүн адам үчүн арнашкан, Ак халатчан врачтарга рахмат, Ажал бүрккөн оору менен кармашкан! Бирин карап, бирин бөлүп-жарбастан, Бир күн дагы эс алууга барбастан, Биз деп жүргөн врачтарга рахмат, Бизди аңдыган ажал менен арбашкан!

02.12.2019
Үшкүрүк Сүймөнкулду тарткан Ороз байкенин, Сүрөтүндөй окшоштурсак айкелин, Кандай жакшы болмок кыргыз мактанаар, Калпы болсо, калыстыгың айт элим!... Уяты жок ар кимдерди туурабай, Ушунчаңда кайра өзүңө кайт элим!

10.11.2019
Гүлжигит иним менен. Жолугуп Бектин тоюнда, Жорголоп түшүп оюнга, Эстелик болсун деп түштүк, Ээрчишип барып соңунда...

24.12.2019
Тилекгүл карындашым. Бир атадан, бир энеден каны бир, Бири-бирин жандай көргөн жаны бир, Бир тууганың күйгөн өңдүү жан тартып, Бир да киши күйбөйт экен баары бир!

02.11.2019
Тома, Бурул, Назгүл. Өнөр багып, өзөгүндө жалындаш бар, Өмүрдөн өтсө кайра табылбастар! Өргө чаап, өлбөс-өчпөс из калтырып, Өлбөгүлө, кагылайын карындаштар!

03.12.2019
Үчөөбүз. Үчөөбүздү көргөндөр, Үйрүлүп көңүл бөлгөндөр, Үч жолу түшсүн төлгөңдөр, Үч бөлүп чачын өргөндөр. Үч бурчтук болуп үчөөбүз, Үн созсо эжем төнгөндөр. Үн коштоп аккордеондо, Үлгүсүн бузбай өнгөндөр. Үйрөтүп байкем обонун, Үйүндө ырдап көнгөндөр!

12.03.2020 Bishkek, Kyrgyzstan
Сыймык иним менен Ага-инилер сыйлашкан, Акылдашып, сырдашкан, Калган кезде жолугуп, Катарлаша бир баскан. Ойлорунда орошон, Ой-тилеги бир баштан, Аткарылаар кезеги, Акааратын кылбастан!

08.03.2020 Bishkek, Kyrgyzstan
"Каалоо" Кагылайын касиеттүү айымдар! Кагылгыдай, жагынгыдай жайым бар! Кабыргадан жаралган деп силерди, Качантадан берки кеп бар, айың бар? Силер менен ырысым бар, багым бар! Силер менен жүрөгүмдө жалын бар! Силер менен жаралгамын жашоого, Силер менен Жараткандан жарым бар! Өзүңөр бар - мен сагынаар айым бар! Өзүңөр бар - мен жагынаар "кайын" бар! Өзүңөр бар - кирпигиме кир жукпай, Өзүңөр бар - каалаганым дайын бар! Көпкөн эрге - өзүң берээр "дарың" бар, Көпкө кимдин "шиши" кантип жарылбаар?... Көз тийбесин көппөйм такыр, тфу! Тфу! Тфу! "Көк жөтөлгө" менде кандай зарыл бар? Куттуу болсун майрамыңар асылдар! Куттук айтат ар адамда асыл жар! Куттук айтпай Күкөңдүн да мындайда, Кудуңдаган кубанычы жазылбаар? Бар бололу силер менен ар дайым, "Бакыт кушу" үйгө байыр алмайын! Бак тилеймин, сыйлап өтөм баарыңды, Башым ийип, "кара жерге" бармайын!

31.08.2019
Атакелеп, куттук айтса неберем, Анан кантип толкунданбайм, неге мен? Туура келип калганы жөн эместир, Туулган күндүн эртесинде Эгемен?!...

26.04.2020
Урматтуу калайык! Бүгүн кеч кирип таң атса, Элмирбектин бул жарыкчылыкты таштап кеткенине бир апта болот экен. Сыймык Бейшекеев иним үч-төрт күн мурун Элмирбек жөнүндө элге сунуш айтып жатканын кулагым чалды эле. Мен: "Ал сунушту айта турган убак да келээр" - деп, көп көңүл бурган эмес элем. Эми ойлосом, бул маселени туура эле, убагында козгоп жаткан экен. "Жер суутат" демекчи, убагында айтып, чечилип калбаса, бара-бара унутулбаса да, кызуу колдоп жаткан элдин каалоосу сууп калчудай. Айта турган болсом, Элмирбектин эл үчүн кылган кызматын, кыргыз-казакка болгон кадыр-баркын мен айтпасам да элдин баарына, мамлекет башчыларга чейин белгилүү. Себеби: Элмирбектин ар бир кылган эмгеги, кээ бир ишкерлердикиндей жашыруун эмес, эл алдында, эл менен айдан ачык экен. Ошондуктан, ысымын ыйгаруу маселеси, мараторийдин убактысы бүткөндөн кийин талкууланаар?... Ал эми Сыймык Бейшекеев сунуштаган кандайдыр бир, жаштарга шык бере турган мамлекеттик сыйлыкты Элмирбек атындагы деп белгилесек, мындан да өнөр багып, өнөр баалаган эл экенибизди далилдеген болоор элек деген ой-пикирге кошулаарымды билдирем! Бул сунушту бүтүндөй "Мен кыргызмын!" деген ар бир жаран. Колдоору белгилүү! Элмирбектин ырларын боордош казак, түрк элдери да жандуу оркестр менен ырдап жаткандыгы бекеринен эмес. Сөзүм кур болбос үчүн, Элмирбегибиздин "Булбулум" аттуу ырын боордош Казак Элинин белгилүү ырчылары Оңал Азаматова менен Гани Матебаевдин аткаруусунда угуп койсоңуздар!

30.11.2019
Пикирлештер Ортосунда Улан менен Адистин, Олтурганда, оңу келип жаңы иштин, Ой бөлүшүп, пикирлешип жаткан кез, Орундалаар ыгы бар деп, ар иштин...

28.09.2019
Кагылайын касиеттүү Кырдрам! Куттук айтып, кулагыңды тундурам! Сыйлыгыбыз, сыймыгыбыз кут болсун! Ук Калайык! Бизге көңүл бурдурам! Назым мырза! Майлабасаң сыйлыкты, Нарындагы атаңа айтып урдурам!...

05.04.2020
"Көз ирмем" Өткөн-кеткен сүрөттөргө кез келип, Өмүрүмдүн жакшы учурун эскерип, Болгон тура, деп олтурам бул сүрөт, Болот байкем экөбүздөн эстелик!

19.04.2020
Канатбай! Туулган күнүң кут болсун! Өмүрүң узун, ден соолугуң бекем, көңүлүң куунак, болсун! Үй- бүлөң менен, бир туугандарың менен жакшылыктардын баарын көр! Ушул ырымды баарыңа арнайм! "Бир туугандарым" Атыңдан айланайын ырыстарым, Ата-энем, Теңир берген ыйыктарым! Арка-белим болуп дайым байкелешип, Атымды тергеп турган сылыктарым! Алыста сагынганда өзүңөрдү, Ар дайым көз алдымда кылыктарың! Баарыңдын терметкемин бешиктериң, Бакырган алгачкы үнүң эшиткемин! Барбаңдап сүйүнчүлөп, айыл-апага, Баарынын черткилегем эшиктерин! Баркымды көтөрүшүп, колдоп турган, Багыма акыл-ою тетиктерим! Бир тууган атың ыйык кандаштарым, Бири-бирин колдоп дилин арнашканым! Билгенге бир туугандан жакын барбы, Биригип, бир максатты тандашканым! Бир ата, бир эненин каны бизде, Бир жандай биригишкен жандаштарым! Түбөлүк баа жетпеген байлыктарым, Түгөнгүс атам черткен кайрыктарым! Түшүнүп, миң ийменип турсаңар да, Түпкүрдө силерсиңер айбыкканым! Түзөтүп жолдон чыксам жөнгө салаар, Түнөрбөс туюк жолдо жарыктарым! Өнөрүм өркүндөтөөр өбөктөрүм, Өксүсөм, өргө тартаар жөлөктөрүм! Өчүрбөй атабыздын ыйык атын, Өнөргө өнөр кошкон өнөктөрүм! Өмүрүң узун болуп баарыңардын, Өркүндөп, өсө бергин бөбөктөрүм!