02.12.2019
Үшкүрүк Сүймөнкулду тарткан Ороз байкенин, Сүрөтүндөй окшоштурсак айкелин, Кандай жакшы болмок кыргыз мактанаар, Калпы болсо, калыстыгың айт элим!... Уяты жок ар кимдерди туурабай, Ушунчаңда кайра өзүңө кайт элим!

23.02.2020
"Балалык" Барактан бүктөп,.самолёт жасап учурган, Баа жеткис кыял - бармактай ой жок бузулган. Барына байыр, жогуна кайыл, санаа жок, Балалык жакшы кез экен баардык учурдан!

19.04.2020
Канатбай! Туулган күнүң кут болсун! Өмүрүң узун, ден соолугуң бекем, көңүлүң куунак, болсун! Үй- бүлөң менен, бир туугандарың менен жакшылыктардын баарын көр! Ушул ырымды баарыңа арнайм! "Бир туугандарым" Атыңдан айланайын ырыстарым, Ата-энем, Теңир берген ыйыктарым! Арка-белим болуп дайым байкелешип, Атымды тергеп турган сылыктарым! Алыста сагынганда өзүңөрдү, Ар дайым көз алдымда кылыктарың! Баарыңдын терметкемин бешиктериң, Бакырган алгачкы үнүң эшиткемин! Барбаңдап сүйүнчүлөп, айыл-апага, Баарынын черткилегем эшиктерин! Баркымды көтөрүшүп, колдоп турган, Багыма акыл-ою тетиктерим! Бир тууган атың ыйык кандаштарым, Бири-бирин колдоп дилин арнашканым! Билгенге бир туугандан жакын барбы, Биригип, бир максатты тандашканым! Бир ата, бир эненин каны бизде, Бир жандай биригишкен жандаштарым! Түбөлүк баа жетпеген байлыктарым, Түгөнгүс атам черткен кайрыктарым! Түшүнүп, миң ийменип турсаңар да, Түпкүрдө силерсиңер айбыкканым! Түзөтүп жолдон чыксам жөнгө салаар, Түнөрбөс туюк жолдо жарыктарым! Өнөрүм өркүндөтөөр өбөктөрүм, Өксүсөм, өргө тартаар жөлөктөрүм! Өчүрбөй атабыздын ыйык атын, Өнөргө өнөр кошкон өнөктөрүм! Өмүрүң узун болуп баарыңардын, Өркүндөп, өсө бергин бөбөктөрүм!

15.04.2020
"Врачтарга" Жер шарында билбейм канча врач бар? Статистика тактап аны ырастаар? Деген менен: Жараткандан кийинки, Ден соолуктун сакчылары врачтар! Бизге кандай көп болсо да сынактар, Билбейм канча биз билбеген сынак бар? Бир билгеним, оору менен алышып, Бизди дайым сактап келет врачтар! Элдик врач, эл багына ырас бар, Эл ичинде, "Эл" деп жашайт врачтар! Элди кырмак эгер врач болбосо, Эч бир жанга көрүнбөгөн жыластар! Апааттарда үйдө жатып албастан, Ар бир күнүн адам үчүн арнашкан, Ак халатчан врачтарга рахмат, Ажал бүрккөн оору менен кармашкан! Бирин карап, бирин бөлүп-жарбастан, Бир күн дагы эс алууга барбастан, Биз деп жүргөн врачтарга рахмат, Бизди аңдыган ажал менен арбашкан!

12.04.2020 Bishkek
Бергенша байке! Туулган күнүң кут болсун! Туулган жерге кут консун! Туш тарабың жайылып, Турмуш-шартың бүт болсун! Тууган-урук, эл-журтуң, Туура жолго бут койсун! Жаратканым колдосун! Жакшылыкка жолдосун! Жамы журтум тынч алып, Жамандыктар болбосун! Жан дүйнөнү өзүңдөй, Жакшы адамдар оңдосун! Эл оорубай жай алып, Эшигиңден май агып, Эриш-аркак жашайлы, Эгеменге таянып! Элге өнөрдү арнайлы, Элден болбос аянып? Көңүлүңдө гүл өссүн! Көйгөйү жок күн өтсүн! Көздөгөнүң ишке ашып, Көрө албасты жүдөтсүн! Көлдөй толкуп ырдай бер, "Көлчүктөрдүн" үнү өчсүн! Жарышып ойноп балдарың, Жаныңда күлүп алганың, Жакшылык толсун үйүңдө, "Жаңыртпа эстеп арманың!"... Жашооңо тилеп ала бер, Жараткан берген жардамын!

20.01.2020
"Жолугушуулар" Жооп издеп далай ойлордон, Жооп жок далай ойлонгом. Жолукпай калдык деп жүргөн, Жолугуп калат тойлордон! Ар кимде ар кыл ойгонгон Ак дилден жакшы ой болгон. Асылкеч жандар жолуккан, Ар дайым жакшы той болгон!

10.03.2020 Burana Tower
"Буранада" Карт тарыхты катып жаткан "Бурана", Камтыйт көптү, кайдан, кимден сураба, Капкалуу шаар, хан ордодон бүгүнгө, Калганы ушул касиеттүү мунара! Далил айтып, илимпоздор буга да, Даана-чынын тактап дале убара. Музейинде түркүн буюм, жазуулар, Мурункудан калган фарфор кумара! Муюп жүрөк, мурункуга кез келип, Мурастарын турам бүгүн эскерип! Муктаждыгы мындай ыйык жайлардын, Муундан-муунга сакталуучу эстелик!

17.02.2020 Bishkek, Kyrgyzstan
"Неберелериме" Өлчөөсүз жарпым жазып кубантаарым! Өмүргө өмүр көчүн улантаарым! Өпсөм да, канча ирээт кумар канбай, Өзүңөр кайра-кайра сурантаарым! Өрнөгүн чын жашоонун багынтканым,, Өмүрдүн таттуулугун таанытканым, Өзүңөр теңдеши жок бул ааламда, Өмүргө өмүр кошкон жарыктарым! Билбеймин кандай сыйкыр, сырлар барын, Билемин силер барда жыргал барын! Бир күнүм - миң күн азап силер жокто, Бириңен бириң өткөн жыргалдарым!

30.10.2019
Неберелерим Эртай менен Нуртай. Дзюдо боюнча чемпиондор. Быйыл Америкада, Польшада, Казахстанда, Кыргызстанда эл аралык турнирлердин жеңүүчүлөрү. Экөө тең биринчи, экинчи, үчүнчү орундар. Көзүмдөн алыс көрөөр каректерим! Өзүмдөн артык көрөөр жан эттерим! Кең болсун келечегиң, кем болбосун, Кемтигим түзөөр асыл данектерим!

16.12.2019
"Неберем Атайга" Атай деп койдум атыңды! Атама ийип башымды! Атамдай комуз черте көр, Арбытып Кудай жашыңды! Атыңа затың жарашкан, Ааламдын эли карашкан, Атайдай комуз черте көр, Алкышын берип Жараткан! Ак тилек, үмүт, сырым бап, Ат койдум сага ырымдап! Ардактап ата өнөрүн, Аты өчпөй жаша кылымдап! Өнөргө дилим, сыйым бап, Өзүңө атың, ырым бап! Өрнөктүү өмүр сүрө көр, Өчпөсүн атың кылымдап!

24.10.2019
Жамиля жарым жанымда, Жай-кышы болуп табымда, Ортодо болуп ынтымак, Олтурам түшпөй тагымда!

30.11.2019
Пикирлештер Ортосунда Улан менен Адистин, Олтурганда, оңу келип жаңы иштин, Ой бөлүшүп, пикирлешип жаткан кез, Орундалаар ыгы бар деп, ар иштин...

26.11.2019
Неберелер. Таң калычтуу кандай жыргал не деген? Таттуу экен го, өз балаңдан неберең!... Так айтмакмын кандай таттуу экенин, Так билдирчү бирдик болсо ченеген!

05.04.2020
"Көз ирмем" Өткөн-кеткен сүрөттөргө кез келип, Өмүрүмдүн жакшы учурун эскерип, Болгон тура, деп олтурам бул сүрөт, Болот байкем экөбүздөн эстелик!

08.03.2020 Bishkek, Kyrgyzstan
"Каалоо" Кагылайын касиеттүү айымдар! Кагылгыдай, жагынгыдай жайым бар! Кабыргадан жаралган деп силерди, Качантадан берки кеп бар, айың бар? Силер менен ырысым бар, багым бар! Силер менен жүрөгүмдө жалын бар! Силер менен жаралгамын жашоого, Силер менен Жараткандан жарым бар! Өзүңөр бар - мен сагынаар айым бар! Өзүңөр бар - мен жагынаар "кайын" бар! Өзүңөр бар - кирпигиме кир жукпай, Өзүңөр бар - каалаганым дайын бар! Көпкөн эрге - өзүң берээр "дарың" бар, Көпкө кимдин "шиши" кантип жарылбаар?... Көз тийбесин көппөйм такыр, тфу! Тфу! Тфу! "Көк жөтөлгө" менде кандай зарыл бар? Куттуу болсун майрамыңар асылдар! Куттук айтат ар адамда асыл жар! Куттук айтпай Күкөңдүн да мындайда, Кудуңдаган кубанычы жазылбаар? Бар бололу силер менен ар дайым, "Бакыт кушу" үйгө байыр алмайын! Бак тилеймин, сыйлап өтөм баарыңды, Башым ийип, "кара жерге" бармайын!

01.04.2020 Biskek , Kyrgystan
Талант доско. Арзан жаш эмес алтымыш, Аркаңа жүгүн артыныш. Антсе да досум айтаарым, Ар иште болбо жалкымыш! Кемпирге кылбай салкын иш, Келинге болбой тартымыш, Калыссың досум ар дайым, Кандай да болсо шартыбыз! Унутпай сактап жалпыбыз, Улууну сыйлоо салтыбыз. Ушундай пейилиң бар үчүн, Урматтайт сени калкыбыз! Жаш өткөн сайын - кайтымыш, Жаныңды багып жай тыныш. Жатсам да үйдөн чыга албай, Жазганым куттук айтымыш. Жеткениң болсун жетимиш! Желе албай калган этимиш, Болгун да, бир күн байкатпай, Сексенге жаса секириш! Калса да кандай бекип иш, Болгонуң менен жекимиш, Кеңешин угуп турганга, Кемпирди болбос кетириш? Сексенди жашап темине, Серепчи болуп элиңе, Токсондун баргын белине, Айланбай вирус жемине! Ошентип өмүр күз болсун, Оорубай жашың жүз болсун! Куттуктайм досум аман бол, Кудайдын көзү түз болсун!