11379 231
29.04.2020
КҮЛСӨҢ ДҮЙНӨ КОШО ЖЫЛМАЙЧУ
Кайран досум... Адегенде сыртыңдан бааладым. Сүрдүү, салабаттуу өңүңдү көрүп, адам менен баарлашууга анчейин ынтызар эмес бир сырдуу неме го деп ойлогом. Капысынан жолубуз кесилишип маектешип калдык. Ошондо оргуп, төгүлүп, ушундай бир ачылдың. Мен өзүмдү акындын толкуп-ташкан жан дүйнө деңизинин чок ортосундагы бир кемедей, болбосо ак чардактай сездим. Кааап, ошондо моокум канганча кобурашып калбай... Башка бизде андай мүмкүнчүлүк да, убакыт да табылбады. Жараткандын жакшы күндөрүнүн биринде жүрөк менен баарлашуунун ыракатына тоёрбуз деп тариздеп жүргөм. Аттиң, насип болбоптур! ***
Маянасы жакшы жумушта иштечүсүң. Бирок, ошол бакыбат турмушуңа анчейин ыраазы эмес элең. Анткени, сенин чыныгы байлыгың поэзия саптары экенин билчүсүң. Бирок, кара калемиңди кармап, ак барагыңа үңүлүп орошон ойлоруңду жоргодой шыдыр уйкаш саптарга айлантып отуруп алсаң казаныңа ким аш салып бермек? Ошон үчүн, ырыңды төшөктөй жыйыштырып коюп, калемди микрофонго алмаштырып, ар адамдан сукпат сурап жүрдүң. Бирок, саясат темасында сагыздай чайналуудан боюңду жаа бою ала качып, маданият майданынында баба дыйканчылык кылдың. Сенин темаң, сенин көтөргөн көйгөйүң арабакечтин арык атындай жүдөө абалга келген кыргыз маданияты болду. Китеп, обон, поэзия, искусство темасын кыябына келтире айттың дагы, жаздың дагы...
***
Китепкөй жаштар менен Кыргыздын кыйырларына чейин кыдырып келдиң. Зал толо жаштарга, адабият ышкыбоздоруна жанардай жалындаган ырларыңды окуп, китеп өзгөртүп, китеп жакшылыкка бурган таалайлуу тагдырыңды айтып бердиң. Сен тилиң эмес жүрөгүң менен айтып берчүсүң. Ошон үчүн көпчүлүк муюп, эргип тыңдайт эле. Китеп окуу үрөнүн сепкен жаштардын артында турган опол тоосуна айлангансың. Алардын ат көтөргүс асыл эмгектери сенин макала-репортаждарың аркылуу улуу элдин учуна чейин жетти.
***
Кызыңды аябай жакшы көрчүсүң. Сени көрүп, “атаңгөрү, ата деген ушундай мээримдүү, күйүмдүү болсо” деп суктангандар көп болсо керек. Эми,ошол кенжетайың үчүн ордуңду эч ким жана эч нерсе толтура албас. Ошону ойлоп буулугуп, ыйлагым келип турат. Уулуң менен сыймыктанчусуң! ⬇⬇⬇
