20.11.2019
АЯГЫНА ЧЕЙИН ТУРГУЛА (Ата-энелердин эсине) Балдарыбызга БАЛА БАКЧАНЫ тандадык, МЕКТЕПТИ тандадык, УНИВЕРСИТЕТ - КЕСИБИНЕ чейин аралаштык. БИРОК ҮЙ-БҮЛӨ КУРУУДА, АЯЛ-ЭР тандоодо аралашпай "ӨЗҮ БИЛЕТ"-деп карап отурабыз. Эң негизги чечүүчү жерде жардамын аяган кайдыгер ата-энелерге капамын. Бала бакчаны бүттүк, Мектепти бүттүк, Лицейди бүттүк, Колледжди бүттүк, Университетти бүттүк... Ушунча мекемени аяктасак да, ҮЙ-БҮЛӨ ДЕГЕН ЫЙЫК МЕКЕМЕНИН КАДЫРЫНА ЖЕТПЕЙ ЖАТАБЫЗ... Сапардагы, бизнестеги шеригиңди тандайсың. Ал гана эмес сатып алган мал-коюңду тандайсың. Үй-бүлө курганда эле эки көзүң көрбөй калат. Сен өзүңө АЯЛ же ЭР тандап жатасың. Аталарыбыз балдарына АПА тандаган. Апаларыбыз балдарына АТА тандаган. 20.11.2019 Идрис акын

13.10.2019
КУЛАГЫ ООР-УКПАГАН АКСАКАЛ (башкаларга айткыла) Куран окуп отурган аксакалга дем салдырганы (куран окутуп элдин сугун, назарын, кирнесин чыгаруу же эскичилик кылуу) келин кирип келди. Куранды ачып баштаган бетти аягына чейин окуу адеп бар. Келген келинге колу менен ишара кырып отура тур - деп окууну уланта берди. Бир убакта келиндин артынан угулаар-угулбас үн менен өзү каалабаган абалда жел чыгып кетти. Ыңгайсыз абалда уялган келиндин бети кызарып чыкты. Курандын бетин аяктаган аксакала:эмнеге келдиң кызым"-деп кайрылды. Уялган келин акырын үн менен:" куран окутуп дем салдырганы"-деп айтты." укпай жатам катуураак сүйлө, кулагым оор"-деп кайрылды. Экинчи ирет катуураак сүйлөсө да укпады. Жанагы чыккан желдин үнүнөн да катуу сүйлөсө укпай койгон аксакалды көрүп: "жанагы желдин үнүн укпаптыр анда"-деп эми уялбай калды жана бетинин кызылы кетип :" дем салдырганы келдим ава, кулагыңыз укпайбы ушунчалык" - деп катуу сүйлөй баштады. Сырттан небересин чакырып:"мына бул келин эмнеге келиптир кулагым укпай жатат" - деп калды. Ангыча небереси чоң атасына :"дем салдырганы келиптир " деп кулагына келип сүйлөдү. Ошол окуядан кийин айылда аксакалдын КУЛАГЫ ООР, АНЧА УКПАЙТ деген ылакап аты тарап кетти. Баарынын бакырып сүйлөгөнүнө көнүп калган аксакал 17 жылдан кийин үйүндө чай ичип жатып кулагына бакырып сүйлөп жаткан баласына:"балам бакырбай сүйлөй бергиле. Менин кулагым уга баштады" - деп калды. Сүйүнүп турган балдарына карап сабак болсун деп сөзүн ушинтип улантты: "17 жыл мурда келген келинди эстейсинби? Ошол келин жанымда уялып калганынан, анын уятын жабайын деп ушундай ыкма колдондум жана келин эч кыжалат болбой үйүнө кетти. Бир келиндин авратын-уятын жабуу үчүн башкалардын КУЛАГЫ ООР-УКПАЙТ деген сөздөрүнүн баарына чыдадым. Азыр гана ошол келиндин жаназасынан келе жатам. Эми менин кулагым жакшы эле угат. Бакырбай эле сүйлөй бергиле мындан ары"-деген экен.... Сизге суроо: башкалардын уятын жабуу үчүн ушундай эрдик жасаганга даярсызбы? Анда баштадык, соц тармактарга башкалардын абийирин ачкан макала - сүрөттөрдү жана маалыматтарды чыгарбайлы сураныч! Мен жазганды миф же жомок дегендер, керегин ал, болбосо айтышпай кал! 13.10.19 Идрис акын. Москва

04.10.2019
ЖАШООДОГУ ЭҢ ЖАКШЫ МАМИЛЕ Илгери апаларыбыз тамак жасаса болгону бир эле чыны ашыкча суу куюп, тамак бышкандан кийин бир чыны тамакты кошунага жеткирип келет элек же көбүнчө: "бүгүн мен тамак жасайм, Калинса силер биздин эле үйгө кирип жегиле. Тамак жасабай койо бер" - деп кошуналар бир-бирибиздин үйүбүзгө үйүлө калчубуз. Кошунадан бир нан алсак, кайтарып берээрде бир нанга бир токоч кошуп кирчүбүз... Үйдө туз-чай түгөнүп калган болсо :" бар Гулжамал, Надира жеңеңден сура, болбосо Макпурат чоң апаңа бар"-дейт эле😊😊😊😊 Абдулла бин Мубарак деген сахабанын жөөт кошунасы бар эле. Ошол жөөт үйүн 2000 динарга сатам деп турса ошол үйдү алгысы келген мусулман киши: "Эмне мынча кымбат, бул айылда үйлөрдүн баасы бир миң эле динар го" - деди. Жөөт :"Миң динар үйдүн баасы, ал эми миң динар Абдулла бин Мубарактын кошуналык болгон баасы" - деген экен... Эгер сени кошунаң жакшы десе, анда сен Аллахтын назарында да жакшысын, эгер сени кошунаң жаман десе, анда сен Аллахтын назарында да жамансын" - хадис... Жашоодогу эң жакшы мамиле - кошуналар менен болгон мамиле экенин унутпаңыздар!!! 04.10.2019 Идрис акын

04.10.2019
ДОСТОР БАР Достор бар - дооруңду сүрө турган Достор бар - үстүңдөн күлө турган Достор бар - оорууңду сезип турат Достор бар - бооруңду эзип турат Достор бар - баткактан сууруп чыгат Достор бар - башыңды кууруп чагыт Достор бар - көңүлүң ачып кетет Достор бар - кайгырсаң качып кетет Достор бар - алыстап кеткиң келбейт Достор бар - кыйналсаң эч ким келбейт Достор бар - мектептен кошулбаган Достор бар - жаныңда отурбаган Достор бар - чакырсаң барам деген Достор бар - бергенин алам деген Достор бар - сыйыңды билип алган Достор бар - сырыңды илип алган Достор бар - досмун деп сыйлаша алат Достор бар - кошкун деп ыйлата алат Достор бар - туугандан артыгыраак Достор бар - душмандан тантыгыраак Достор бар - ишиңе жарап турат Достор бар - акчаңды карап турат Достор бар - мечитке чакырышкан Достор бар - мойнуңа асылышкан Достор бар - сиз дейсиң, мактай турган Достор бар - издейсиң таппай турган Достор бар - кейишке сала турган Достор бар - БЕЙИШКЕ бара турган!!! Идрис акын 10.04.2019 Жума майрамыңыздар менен достор! 04.10.2019 Идрис акын

10.10.2019
Кыргыз-казак достугун даназалаган айтыш Ош облусунун казысынын акесинин тоюнда далилденди. Сүрөттө Балгынбектин жанында менин шакиртим Адилет Замирбеков, ал эми мение жанымда анын шакирти Биржан Байтуев... Достукка кызмат кылгандардын жүрөгү жок дегенде жүз жылы дүкүлдөп иштеп турсун. Атабаевтердин үй-бүлөсүнөн Аллах ыраазы болсун.

13.11.2019
ДЕН-СООЛУК Кымбат үйүм, кымбат машынам болсун деген менен экөөндө тең жашабайбыз. Адам баласы эң биринчи орунда өзүнүн ДЕНЕСИНДЕ жашайт. Ошондуктан баарынан кымбат ДЕНЕНИН КАДЫРЫН БИЛЕЛИ! ДЕН-СООЛУКТУН КАДЫРЫН ЭСТЕГИЛЕ АРАК ИЧПЕ, ЧЫЛЫМДЫ ЧЕКПЕГИЛЕ!!! СТОМАТОЛОГ АЙТАТ... Адамдар кызык, Алла бизге эки жолу бекер тиш берет. Бала кезде сүт тишти, анан чыныгы тишти. Эки тишти эптеп карай алышпайт, анан биз салып берген тишти этият кылып карап жашашат! 13.11.2019 Идрис акын

13.11.2019
КАГЫНЧААК КАЙЫН ЭНЕГЕ, БАГЫНЧААК КЕЛИН ЧЫКПАЙТ! (энелердин эсине) Келин жаман эмес, келген жер жаман... Келиниң жаман чыкса балаңдан көр... Келинин кызындай көрүп колтугуна батыра алган энелерге чоң рахмат. Кыргызстанда келиндерин мактаган кайненелер көп болсун ылайым. Урматтуу ата-энелер, келин менен урушуп, балаң менен ажыраштырып, неберелерди жетим калдырып эмне пайда табабыз! БИЛЕМ Карыганда катын жоо Баркыңды билбей балаң жоо Кылыгың жакпайт кызың жоо Кебиң жакпайт келин жоо Туурадан чыккан тууган жоо Ошолордун ичинде Кантип болосуң дениң соо КАЛП КАТКЫРЫК ЫЙДАН ЖАМАН! КАЙГЫРЫП УКТАСАҢ, ООРУП ОЙГОНОСУҢ -дейт кыргызда. Баары өзүбүздүн колдо, башкалар келип жасап бербейт. КАЙЫН ЭНЕ акылдуу болсо, КЕЛИНИ УЯТТУУ болот. (Чымчыктын уясы болсо да бузулбасын) 13.11.2019 Идрис акын

12.11.2019
АДАМ БОЛЧУ КИШИНИН АДАМ МЕНЕН ИШИ БАР! (жаштардын эсине) КОЗУ чоңойсо КОЙ болушу анык КҮЧҮК чоңойсо ИТ болушу анык Бирок БАЛА чоңойсо АДАМ болушуна ГАРАНТИЯ жок... Урматтуу балдар, аткарып жаткан ар бир ишибизден ата-энебизге АЛКЫШ же КАРГЫШ алып жатабыз. АТА-ЭНЕБИЗДИ ТААНЫШЫ ШАРТ ЭМЕС Жакшы ишибиз үчүн башкалар бир гана бизге эмес, "АТА-ЭНЕҢЕ РАХМАТ" - деп, аларды да макташат. Жаман ишибиз үчүн башкалар бир гана бизге эмес, "ТАРБИЯ БЕРГЕН АТА-ЭНЕҢЕ НААЛАТ" - деп аларды кошо каргашат. АТА-ЭНЕЛЕРИБИЗДИН ЭЛ КАРАГАН ЖҮЗҮН ЖЕР КАРАТПАЙЛЫ. АТА-ЭНЕНИН ЭҢ ЧОҢ КУБАНЫЧЫ - БАЛАСЫ АРКЫЛУУ КЕЛГЕН КУБАНЫЧ, АТА-ЭНЕНИН ЭҢ ЧОҢ КҮЙҮТҮ - БАЛАСЫ АРКЫЛУУ КЕЛГЕН КҮЙҮТ! 12.11.2019 ИДРИС АКЫН

10.11.2019
БИР МАКАЛДАН, БИР ӨМҮРЛҮК САБАК... АШЫ КОРДУН БАШЫ АЗИЗ, АШЫ АЗИЗДИН БАШЫ КОР... Айланаңдагы жакын адамдарыңа ашыңды кор кылып чачышты билсең, башкалар сени жоомарт инсан катары башыңды азиз кылып сыйлашат. Тескерисинче ашыңды азиз кылып, ыйык тутуп, сараңданып бекитсең, башкалар сени жек көрүп, өзүнө кошпой башың кор болуп кыйналасың... Ички дүйнөң тар болсо, кең дүйнөнүн эмне кереги... 10.11.2019 Идрис акын

09.10.2019
Тууганчылыкты токтотпо... "келбегенге баруу, бербегенге берүү, зулумдук кылганды кечирүү" - бул адамдык эң асыл сыпаттардын бири. Хадис "Ырыскысынын көбөйүшүн жана өмүрүнүн узун болушун каалаган адам тууганы менен жакшы болсун" - хадис. Колунда жокторго берилген садака бир садака болсо, туугандарга берилген садака эки садака болуп саналат : бири садаканын сообу, дагы бири туугандыктын сообу... Аллах Таала айтат:" тууганчылык байланышка кол сунганга кол сунам. Алаканы үзгөндөр менен мен да кол үзөм". ХАДИСИ КУДСИЙ деп-алланын сөзүн пайгамбар САВ айтат, мына ошого айтылат 09.10.19 Идрис акын

09.10.2019
ТААЛИМ-ТАРБИЯ ТУУРАЛУУ Адам баласы төрөлгөндөн өлгөнгө чейин тарбия алууга жана тарбия берүүгө милдеттүү... Бала тарбиялоо жөндөмү болбогон, болсо дагы жоопкерчиликти мойнуна албаган ЭНЕ жана алардын эч бир көйгөйүнө чара көрбөгөн АТАНЫН балдары ата-энелери бар болсо да ЖЕТИМ болуп эсептелинет... МУРДАЛАРЫ, Ата-энеси жок ТОМОЛОЙ жетимдер, же ата-же апа жок ЖАРТЫ жетимдер бар эле. АЗЫР БОЛСО ата-энеси бар туруп ажырашып кеткен ТИРҮҮЛӨЙ ЖЕТИМДЕР БАР... ТОМОЛОЙ ЖЕТИМ ЖЕ ЖАРТЫ ЖЕТИМДЕР: "алар өтсө туугандарым бар" - деп ҮМҮТ менен чоңоюшат. Ал эми ТИРҮҮЛӨЙ ЖЕТИМДЕР БОЛСО: "таштап кеткен атасын же апасын жек көрүп КҮЙҮТ менен чоңоюшат экен... Чымчыктын уясы болсо да бузулбасын. ҮЙ өрттөнүп жатса баардык адам чуркап куткарабыз, бирок ҮЙ-БҮЛӨ бузулса баарыбыз чуркап сактабайбыз... 08.10.19 Идрис акын

09.11.2019
КӨПӨЛӨК ТИРҮҮБҮ? Шакирт колуна көпөлөк кармап, алаканына абайлап артына бекитип барат. Устатына жымыңдап барып: "устат, айтыңызчы, менин колумдагы көпөлөк тирүүбү же өлүүбү?" - деп суроо узатат да, өзү ойлонуп "азыр тирүү десе колум мынын мычкып салып өлтүрүп көрсөтөм, өлүү десе тирүү бойдон көрсөтөм" - деп даярданып турат. Шакиртинин жылмайып турганын карап устаты ушинтип жооп кайтарат: "БАЛАМ, КОЛУҢДАГЫ КӨПӨЛӨКТҮН ТИРҮҮ ЖЕ ӨЛҮҮ ЭКЕНДИГИ САГА БАЙЛАНЫШТУУ" Урматтуу өкүл балдарым, жашооңордун таттуу же ачуу болуусу эң биринчи орунда ӨЗҮҢӨРГӨ БАЙЛАНЫШТУУ. Шылтоону сырттан издебегиле. ҮЙ-БҮЛӨ БИРИМДИК МЕНЕН БАШТАЛАТ, ЫНТЫМАК МЕНЕН САКТАЛАТ!!! 09.11.2019 ИДРИС АКЫН

09.11.2019
ЭЧ КИМГЕ КУЛАК САЛБА!!! Бийик тоого жүздөгөн курбакалар секире баштаса, миңдеген курбакалар эки четте карап турушат. Мелдеш башталар замат тоонун бийиктигин көрүп, эки капталдагы бакалар: "БЕЧАРАЛАР, БАЙКУШТАР, ЖЕТЕ АЛБАЙСЫҢАР!" - деп бакыра башташат. Чындап эле жарым жолдон курбакалар кулай башташат. Баары кулай берип, акырында бир гана курбака бийик чокуга жетет. Башка курбакалардын баары жетип барып: "азаматсың, бир гана сен жеттиң. Кантип жеттиң, сыры эмнеде? "-деп суроо узатат. Баарын карап турган жеңүүчү курбака СӨӨМӨЙҮ МЕНЕН 2 КУЛАГЫН КӨРСӨТҮП, КУЛАГЫ УКПАГАНЫН ТҮШҮНДҮРӨТ. Көрсө ал курбака ДҮЛӨЙ экен. ЖЫЙЫНТЫГЫНДА Баарына кулак сала берсең эч нерсе кыла албайсың. Тескерисинче депрессияга кабылып, психигиң чыгып, эрте эле өлүп каласың. Көздөгөн бийик максатыңа бекем кадамыңды таштап бара бер. Көңүлүңдү калтыра турган бир да сөздү укпа, андайларга ДҮЛӨЙ кейпин кийип ал! Жакшы жашоо кааласаң Жакшы кеңеш - билип ал Көңүл бурбай ар кимге Жинди чалыш болуп ал 09.11.2019 Идрис акын

08.11.2019
ҮЙ-БҮЛӨ 1. Курулуш өтө кыйын, бирок бузулушу өтө оңой болгон ҮЙ-БҮЛӨ деген ыйык мекеменин кадырына жетүү керек! 2. Үйлөнүү оңой, ҮЙ БОЛУУ КЫЙЫН 3. ЭРИҢДИ ЖАМАН КӨРСӨҢ ДА (аялыңды жаман көрсөң да) жакшы көргөнгө аракет кыла бер, шайтандын же напсиңдин жаман көрсөткөн кишисинде Аллах жакшылыкты катып койгондур.... 4. Эрлерин адам кылып тарбиялап алган АЯЛДАР көп, бирок АЯЛДАРЫН АДАМ КЫЛЫП ТАРБИЯЛАП АЛГАН ЭРКЕКТЕР АЗ! 08.11.2019 ИДРИС АКЫН

08.11.2019
БАЙКУШ БҮРГӨ же БАЙКУШ БАЛА (Ата-энелердин эсине) Бүргө 2 метр ашык секире алат. Бийикке секирген бүргөнү 5 см кутуга салып ЭКСПЕРТТЕР карап отурушат. Секирген сайын башы катуу урулган бүргө, акыры башы ооруп секирбей калат. Бир канча убакыт күзөтүп караса, башынын оорушунан коркуп калган бүргө бир да секирбей калат. Ал бүргөнү кутудан чыгарып койо бергенде да секирбей койот. Боштондукта жүрсө да көнүп калган адатын таштабайт... ОШОНДУКТАН Мындан улам, балдарыбызды да бүргөдөй кылбай, аракеттерин буубай, жөн отур, кылба, нетпе дей бербей, тескерисинче багыт берип, дем берип, кубаттап туралы... (Керек болсо окугула, болбосо башымды оорутуп жаман комментарий жазбагыла. Бир китеп окуп бир макала жазасын, жаманын өчүрүүгө бир күн, мээңден өчүрүүгө бир ай коротуп жатам!) 08.11.2019 Идрис акын

07.11.2019
Жөн эле эсте калган МАКАЛДАР 1 Ар бир адам менсинет, куурай гүлгө теңсинет... 2 Баарына жагамын десең, бирине да жакпайсың... 3 Жемди көргөн бөдөнө торду көрбөйт... 4 Амалкөйдү адашып ашынам деп жүрбөгүн, ач көз байды адашып кошунам деп жүрбөгүн... 5 Биттүү конок батат, иттүү конок батпайт...