23.09.2019
Тил майрамын утурлай Көлчүктөгү баканын да өз тили бар сүйлөгөн Адамдар бар жан кейитип эне тилге күйбөгөн Эне тилин билбей туруп башка тилде сүйлөйсүң Андан көрө сакоо болуп өткөн жакшы дүйнөдөн! ....... Өзбек тили оң колум Орус тили сол колум Колго комуз кармаймын Эки колдо комузум Эргип чыгып добушум Элге талант арнаймын Англис тили оң бутум Түрк тили да сол бутум Алар барда жүрөмүн Кыргыз тилсиз жашоо жок Ал да менин- ЖҮРӨГҮМ ЭНЕ ТИЛИМ ЖҮРӨГҮМ МАЙРАМЫҢЫЗДАР МЕНЕН ДОСТОР! 23.09.2019 Идрис акын

23.09.2019
ҮЙҮҢ ЭМЕС СҮЙҮҮҢ БОЛСУН! ҮЙ өрттөнүп жатса баардык адам чуркап куткарабыз, бирок ҮЙ-БҮЛӨ бузулса баарыбыз чуркап сактабайбыз! Үй-бүлө үйдөн маанилүү. Кымбат үйүң эмес, чатыр да болсо үй-бүлөлүк бакыт болсун. Кымбат үйдө кырылышып жаткан канча бактысыздар бар... 23.09.2019 Идрис акын

22.09.2019
Үйлөнөм десең ук мени! Эркектер аялдардын төрт нерсесине карап үйлөнүшөт: 1. Сулуулугуна 2. Байлыгына 3. Ата тегине 4. Ыйманына Бактылуу болууну кааласаңар 4-сүн тандагыла. Бирок бул күндө эптеп күйөөгө тийип кетүү үчүн жоолугун оронгон кыздарды, момун болуп көрүнмүш болгон топучан балдарды жоолуктуруп калдык...жоолугун салып кайын эне менен тытышып аткан келинден, сакалын коюп аялдын кадырына жетпеген эркектен эмне пайда. Ыйман - жоолук же сакал менен чегараланбайт! Жаштарга сунушум Үй-бүлөнү куруудан мурда адамдын адамгерчилигин, адеп-ахлагын, ата-энесине көрсөткөн сый-урматын карап анан үй-бүлө кургула. Жасалма койгон сакал менен жоолугуна алданып калбагыла. Кийин кеч болот! Бар жогол дейин десең балаң жетим калат, антпейин десең апаңдын көңүлүн сындырып жаткан келиндин пейили, же сакал-топу кийип намаз окумуш болгон акылы жок күйөө... Ошентип эки оттун ортосунда өмүр бою арманыңды жутуп жашайсың! Колуңда жүрүп билинбей-камчыдан артык курал жок, койнуңда жүрүп билинбейт-катындан артык тууган (кээде душман) жок. 22.09.2019 Идрис акын

01.11.2019
КӨК АСМАНДА ЖАРКЫРАСА ЖЫЛДЫЗДАР ЖЕР БЕТИНДЕ КӨБӨЙҮШСҮН КЫРГЫЗДАР ... Аалам билет кыргыздыгым кийимден Кылымдардан кылым ашып кийилген Ушул күнү кыргыз муну кийбесе Урпактарга кантип айтам кийин мен 01.11.2019 Идрис акын

22.09.2019
Бүгүнкү апаларга ырдап айтканым... Атам айта берет, барибир апамдын айтканын кылабыз - деген балдар чыгып келатат урматтуу АПАЛАР. Үйдөгү АТАЛАРДЫН кадырын жогору тутуп, балдарга татыктуу тарбия бериңиздер. Бир колу менен бешикти, бир колу менен дүйнөнү терметкен акылдуу апалар Ала-Тоодо көп болсун. Билем аны үчүн эркектерде да күнөө бар, бирок ошол эркекти барибир аял тарбиялап чоңойтуп жатпайбы! 22.09.2019 Идрис акын

01.11.2019
ЭЛ ЭМНЕ ДЕЙТ?! 1. Эл эмне дейт экен? - деген суроону жакшы ишти аткарып бүткөндөн кийинкиге таштап үйрөнөлү. Антпесек, эмне дейт экен- деп отуруп, эч кандай ЖАКШЫЛЫК ЖАСАБАЙ ЖАТАБЫЗ. 2. Ал эми жаман иштерди болсо, тескерисинче: эл эмне дейт, кокуй уят, эл караган жүзүм жерди карап турбасын, "Алланын каарына калбайын, элдин каргышын албайын" - деп, эл менен эсептешип туруу керек. Анткени калк айтса калп айтпайт - деген кеп бар кыргызда. 3. Пикирди ар кимден ук жакшыдан да, жамандан да, достон да, душмандан да, жаштан да, улуудан да, аялдан да, эрден да, бирок ЧЕЧИМДИ ӨЗҮҢ ЧЫГАР. Анткени өзүң үчүн озуң гана жооп бересиң. Эл оозуна элек тутсаң, ар нерсени айта берет. Жаңылбоонун бир гана жолу Жараткандын буйругуна бекем болуу! ЭЛ СУУ БОЛСО, МАМЛЕКЕТ СУУ ҮСТҮНДӨГҮ КАЙЫК. КАЙЫКТЫ СҮЗДҮРГӨН ДАГЫ СУУ, ЧӨКТҮРГӨН ДАГЫ СУУ. Конфуций (Элден уялууну билбеген элиталарга жана элитаны өзү шайлап өкүнүп отурган элге жаздым) 01.11.2019 Идрис акын

16.09.2019
Болочок залкарлар залга чыкты Залга десем жаңылам алга чыкты Алды көздөй шакирттер бара берсин Ак батаасын элимдин ала берсин... 2 жылдан бери ЗАЛКАР деп өзүмдүн жеке мектебимди ачып жаш акындарды тарбиялап жатам. Шакирттерим менен кече кайрымдуулук концерт өткөрүп, элге эстен кеткис айтыш куруп бердик. Концерттен түшкөн акча боору ооруп жаткан бир тууганыбыздын операциясына тапшырылды... Сүрөттө менин жаныман баштаганда Нурсултан, Нурайым, Адилет, Айсаба жана Ынак деген төкмө акын шакирттерим... Алдыда жер-жерлерди кыдырып элге акысыз, акындардын руханий азык тартуулаган концерт сапары бар. Дуа кылып турунуздар элдин купулуна толгон болочок залкарлар төрөлө берсин....

01.11.2019
ГҮЛ Гүлгө чымын-чиркейдин баары конот, бирок аары гана анын балын соруп алат. Иоганн Вольфганг Фон Гете Дарактагы мөмөнүн пайда болушу үчүн анын гүлдөрү солуйт. Иоганн Вольфганг Фон Гете Кээ бир адамдар жаңгак сыяктуу. Сыртынан караганда катуу көрүнгөнү менен, ичиндеги маңызын билгенден кийин кеткиң келбейт. Идрис акын Дарактарды эч ким жалбырагы үчүн сатып албайт, анын мөмөлөрү үчүн сатып алышат. Адамдарды да кийиминен баалабай, билиминен баалашты үйрөнөлү. Идрис акын Адамдардын жашоодогу орду, жалбырактардын дарактагы орду сыяктуу. Бири ылдый, бири жогору жайгашканына карабай баары бирдей болушат. Жогорудагы адмадар ылдыйдагылардан айырмаңар бир гана ээлеген ордуңарда, адамдык даражада бирдей экениңерди унутпай, баш көтөрбөгүлө... Идрис акын Жума маарек болсун, достор 01.11.2019 Идрис акын

03.10.2019
УЛУУЛАРГА УЧКАЙ КЕП Коомдук транспортто кызымды бала бакчасына жеткирүү үчүн койнума алып биринчи катарда отуруп бараткам. Бир учурда мектепти дээрлик аяктап бараткан баласы менен бир апа чыгып калды. Айланамды карасам эч ким орун бошотуп турган жок. Бир аздан түшө турган жерге жакындап калдык деп апага орундук бошоттум. Кабагы салыныңкы апа мен бошоткон орундукка отурду, жылмайып кубанган жок же мага рахмат айтканга жараган жок. Мейли деп баратсам бир аздан жанындагы адам тушуп калды. Бошогон орундукка баласы отуруп алды. "Тур балам, акең мага орундугун бошотту эле, акең отурсун" - деп мени чакыра алган жок... Ошондон улам улууларга кайрылгым келип жатат. Сизге орундук бошоткон, жүгүңүздү көтөрүшкөн, колуңузга суу куйган, жардам берген жалпы жаштарга бир ооз жакшы сөзүбүздү аянбасак. Бир бала орундук бошотсо башка балдар уга турган кылып "рахмат балам, өмүрүңдөн береке тап. Тарбия берген ата-энеңе рахмат. Сенин да ата-энеңе башкалар ушундай урмат сый көрсөтсүн" - деп койсоңуз, ошол жердеги орундук бошоткусу келбей уктамыш болуп көзүн жумуп алган кулактар укмак жана мен дагы ушинтип орундук бошотуп дуа алам деп ойлонуп калышмак. Биз улуулар жаштардын кылган жакшылыгын мактай албасак, рахмат айта албасак анан кайсы жаштар бизге жакшылык кылсын.... Өзгөлөргө акыл айтаардан мурун, өзүбүз өрнөктүү бололу, урматтуу улуулар!!! 03.10.2019 ИДРИС АКЫН

03.10.2019
ЖЕРДЕГИ АР БИР ПЕНДЕНИН ӨМҮРҮ ЖАЛАЙЫК МЕНЕН КЕПИНДИН ОРТОСУНДА ӨТӨТ. Карап отурсаң, экөө да мата дейлик. Экөөндө тең чөнтөк болбойт. Бош келип, бош кетесиң. Ааламда руханий кризис болуп жатат. Жан дүйнөнүн жардылыгынан Жараткан өзү сактасын. ЖАРАТКАНЫМ ЖАНЫБЫЗДЫ ЖАННАТКА ЫЛАЙЫКТУУ ИШ КЫЛМАЙЫНЧА АЛБАСЫН! 03.10.2019 ИДРИС АКЫН

08.10.2019
Болгону тамаша, күлүп койгула. Жумурткадан кыр издегендер, сураныч ортого пикириңди калтырбай личкама жазгыла. Билем баарың оолуясың!... Жергиликтүү диалект менен айтылган кээ бир сөздөргө жырылдабагыла 😊