16.04.2020
"Али жаш" - аябай ишенчээксиң. "Бакта батинке өсүп атат" десе деле "Кана?" деп издеп жүргөн болосуң. Ар бир адамды өзүңдөй таза ойлойсуң. Кылган аракетинин баарын чын дилден деп билесиң. Интуицияң кыйкырып атса деле укпайсың. Акылга саласың. Акыл болсо, али чийки кез. Жакшы сөз айтып койсо эле жүзүң албырып, элеп - желеп болуп, толкунданасың. Мындай учурда турмуш куруу аябай бат. "Ык - бык, сен чык! " деп коюп кура беришет. Эмоция жакшы иштейт. Сүйүп калуу өтө бат кез. Сүйбөй калуу, "Көңүлүм калып калды" деген да тез. Чечим ойлонбой чыгарылат. "Карышкыр кезиң" - бир турмушту көрүп, балдарың көк чөп болуп чыгып калган кез, же далайды тегирменден өткөрүп, даамдап көрүп, карт бөрү болуп жүргөн кез. Ар бир жылмаюунун артында эмне жатат көз караш сенден эмне каалап атат, ар бир сөздүн капталында кандай ой бар таамай окуп турасың! Көзүнүн тереңинен ал кандай адам көрөсүң. Интуиция да, акыл да жетилген кез. Логика өзгөчө укмуш болот. Оңой мн жемиңди жедирбей каласың. Бул учурда турмуш куруу (эгер ажырашкан же кура элек болсо) оңой эмес. Жытын жыттап, даамын даамдап, чак келеби, келбейби, сүйлөгөнү ордундабы, жокпу, эмнени каалап атат окулуп турат. Жети өлчөп бир кесесиң. Эмоция отурукташкан. Далактабай каласың. Сүйүү оңой мн келбейт. #жөнэлеойлор Сиз кайсы мезгилиңиздесиз?

15.04.2020
Жан дүйнөнүн кыжалаттыгын токтотуу кыйын. Өзгөчө кыжы - кужу ой басат. Мээңде эки ой эки башка бөлүнүп алып кырылат. Болбогон нерсеге эле санаа тартып, өзүбүздү өзүбүз жемей адат бар. Алдыдагы менин ишим - ошол кыжалаттыкты таштоо. Оорунун баары ошондон чыгат дешет. Дүйнө бир тең болуп камырабай жүргөндөргө жыргал. Ошолордун жыргалчылыгын үйрөнүү керек. Бир ишим бүтмөйүн бышып кетем. Шашмамын. Убагында жеткичекти нерв кашайып, сүйлөнүп,сөгүнүп - сагынып айдайсың унааңды. Көңүлдү башкага буруп, мээңдени окуяларды башка каналга которо билүү сонун. " Эч нерсеге эч качан кеч эмес. Боло турчу нерсе өз убагы мн болот " дегенди бир тренингден уккам. Ошондон кийин жок дегенде унаада тыгынга калып калганда сөгүнбөй калдым. Болбосо машинамды көтөрүп алып эле чуркагым келчү. Сенин ишиң, оокатың, сенин адамың болсо, сага буюрат. Миң кыжалат болуп, башыңа бүткөн түктүн баарын терип салсаң да сеники болбогону кетет. Жакшылыкка деп жоруп, демек, ушул нерсе буюруп атат дегендик болуш кк экен. Миң кыйын болот акыл. Билем дейт! Колдонгонго келгенде эле кокондон башка эчтеке жок. Баарыбыз акылдуубуз. Оюбузда бирок. Тажрыйбада ар ким ар кандай жыйынтык көргөзөт. Акылдуу ойлорду жашообузга колдонгонду үйрөнүү - эң сонун иш! #жөнэлеойлор

14.04.2020
Жулмалашып, сөгүшкөндөрдүн көбү аялдар экен. Эмнеге сиркебиз суу көтөрбөй жатыптыр? Үйдөгү жымсалдоочубуз, жумшартуучубуз, жашоого жайдары каратчубуз окшобой атат окшойт ээ? Же ошонусу жоктор нерффный болуп атабызбы? Не дедиңер, ыя?

14.04.2020
Жок дегенде тилге салым кошуп коеюн! Нерв жука азыр. Түшүнөм. Сөгүнсөңөр да адабий тилде сөгүнгүлө! )))))

04.12.2019
Эркектин түрлөрүн деле жазып коеюн таарынбасын ) 1. Однолюбдар. Бирди эле сүйөт. Бирөө эле көңүлүнө от жагып, көзүн сүйүнтө алат. Ошол бирөө үчүн тоону томкорот, таштан суу, такырдан гүл чыгарат! Бирөөнүн сөзү мыйзам! Алаканына салып, агы менен айланат карегинин. Бирөөнүн жытын искеп, чачын сылаш үчүн айга чейин шаты таап, күндү кошо алып берет элем деп күйүп кеткени канча?! Сейрек кездешет бирок булар. Тапса болот. Бит карагандай издеш керек . 2. Кийинки түрү "Кыз жандуулар". Өтө эле сүйгүч келет. Сүйгүч болуп иштейт да жүрөгү. Жымың эткендин баарын бир жумадан сүйө берет. Эки жума болуп кетсе эле ыңгайсыз боло баштайт. Сүйгөн сайын жашагысы келип, жашарып, сеп этип алгандай " масарып"...романтик болуп ар бирине ыр чыгарып, чыгарма арнап, эми өзүнчө эле бир укмуш. Укмуш дүйнөдө жашайт алар 3. "Коллекционер " "Кыз жандуудан" айырмаланып, дене кумарына басым жасайт. Романтика, сезим деген түшүнүк жашабайт. Эттүүсүн көрөт бүгүн, эртең төштүүсүн көрөт, бүрсүгүнү чачы кыска, андан кийин буту узун, куймулчактуусу, компактныйы...айтор кете берет. Коллекция толукталмайын любоюн көрөт. 4. "Однолюбдар" . Тырмакчанын ичиндеги "однолюбдар" . Аялы, балдары бар. Бирок мезгил - мезгили мн жамгыр жаайт системасы да. Тымызын тызылдатып келип, тымпыйып калгандар булар. Шек алдырбайт. Партизандар. Бутунун учу мн жүрөт. Уликалар дароо тазаланат. Таза иштейт, кыскасы. Чандааа эле кокусунан кармалып калбаса, дээрлик колго түшпөйт. Түшүп калса да суудан кургак чыгат. Мойнуна алып өлбөйт да алар. Эркектин тили мн айтканда "однолюбдар , бирок многоебдор". Бүлөсүн таштабайт бирок жакшы жери. Билгизбей жүрөт. 5. Жүүнү боштор. Сүйүп калдым деген кыздын баарын ээрчип кете берет. Мурункусун таштап коюп, мурдунан жетеленгендер. Ушундай ишенчээктер. Ак сүйүү издеп, алдана бергендер. Мындайлардын багына дайыма амалдуулар, желмогуздар жолугат да, көп нерсени жасатып алып, көчүккө тээп айдап жиберишет. "Подтакашник" деп да аташат. Лидерлик касиет жок. Жетеленмелер 6. Мыктылары. Уяттулар, намыстуулар, акылдуулар. Баардык жактан төп келгендер. Тагдыр эле талкалабаса, тайбай турчулар. Однолюбга окшош эле келет бирок анчалык фанат эмес. Сүйгөн адамын сапаттуу сүйөт. Жоопкерчиликтүү.

14.04.2020
Чүчкүргөн сайын аңдый берип кууратты бирөө. Аллергия кетсечи же. Силер деле аңдышып атасыңарбы, ыя?))))

14.01.2020
Менден мынчалык баласаак эне чыгат деп ким ойлоптур? Бир тууганы жок жалгыз өскөнүмдөнбү, өзүмчүл болдум. Чочун бала - бакыра келип, оюнчугума тие турган болсо, акырын апасына көргөзбөй, чымчып алар элем. Айылга таятамдыкына барганда күзгүдөй зимилдете жыйнап койгон үйүмдү тайкемдин балдары чаң буттары мн тебелеп кеткендегини элестете бер! Ортого арачалап энем менен таятам түшөөр эле. Менден коркуп, ылдыйкы үйгө эч ким келбей калчу. Ыйлап аткан баласын "Назира келе жатат!" деп коркутушат. "Төрөгөндө көрөбүз!" дешчү. Азыр тим эле чаң жугузбай, уулумдун үстүндө үлпүлдөйм. Өзүм ачка калсам, мейли, уулум тойсун мыйзамы бар. "Өтө эле үйрүлүп түшкөн болбойт" дегенди көп окудум, көп уктум. Тизгиндейин өзүмдү деп чечтим акыркы убакта. "Материнский пут" сөзүн көп эле укчумун. Маани бербептирмин, же бергим келген жок. Айрым энелер сүйүүсү менен балдарын думуктуруп өлтүрүп алган учур болот экен. Эненин өтө эле ашыкча мээрими, сүйүүсү баланын бутуна жип болуп байланып, жашоодо арыш жасашына тоскоолдук кылат тура. "Балага ишеним көргөз. Кое бер. Жаратканга тапшырсаң, баары сонун болот!"деди бир жакшы киши. Апалар балага сарсанаа болуп, балекет ойлорду элестеткен сайын ошонун баарын тартып келе берет экен баласынын турмушуна. Коркуу күчтүү сезим болгондуктан корккондуңдун баары чындыкка айланат. Мен үйрүлгөн сайын алсыз, көлөкөдө өскөн какымдай эле үлбүрөп баратат. Кое бергенди, Жаратканга тапшырганды үйрөнүп баштадым. Эки алса деле, "Балам, эмне болуп атат. Эмне көйгөйүң бар?"-дейм көзүн карап. Ал да камырабай, - Ой, Эйнштейн деле экиге окуган !"дейт. А. Некрасовдун "Материнский пут" китебин окуй баштадым. "Баардык жаныбарлар балдарын чоңойтоору менен уядан учурганга аракет кылат. Жалгыз эле адам баласы уядан учурбай, жанына алып калганга аракет кылат!"дейт. Туура да. "Мени бак. Мен сени чоңойтком. Сен мага карызсың!" деп эле минип алабыз. Алардын сезими мн эсептешкен аз. Баламды думуктурбай, эркиндик берейинчи. Балким мен берген эркиндиктен бийик учуп, шаңшып, тыңып кететтир. #жөнэлеойлор

03.10.2019
Бөйрөктү таянба деди эле энем. Энем айткан канча сөз кулак сыртынан өттү. Канчасы канга сиңди, кулакка күмүш сырга болуп илинди, канчоосу Балыкчынын шамалы менен ойноп кетти. Уңгусу турат бирок. Кагылып калган казыктай, өзөктө жатат. Кеп энем жөнүндө деле эмес. Кеп чаржайыт болгон ойлорумда, өзүмдө. Шаркырап аккан шаардын шарданына агып кетип эле өзүмдү, өзөгүмдү таппай калган өзүмдө. Буркан - шаркан түшүп баратып, өзүңө келсең, өзүңдөн качан эле алыыыс чыгып, алапайыңды таппай бараткан болосуң. Тык токтоп, " Мен киммин?", " Кайда баратам?", " Максатым эмне?", " Жашоодон эмне каалап турам? " десең эле жообу жок боштук чыга келет. Аңырайган боштук. Жандалбастап артыма кылчаям. Жок дегенде калтырып жаткан изимден бараткан жолумдун уучугун табаттырмын дейм. Кыйратып эле жаткансыйм. Бутум бутума тийбей, безеленем . Териштире, сүрүштүрө келгенде эле эптеп - септеп, элдир - селдир бир дөңгөлөктү сүйрөп, өлбө жаным өлбөнүн аргасы менен жүрүп жаткандайсың. Колго илешкен, көкүрөк керип, купулуң толуп, сыймыктана " Ушуну мен кыйраттым!" деп кыйкырайын десең эле таш балекет жок. Мен бул дүйнөдөн көчүп кеткенде менден жакшылык калыш керек. Өзүмө эле жарык тийсин эмес бүтүндөй адам баласына тийсин. Жөөөн эле элдир - селдир көптүн бири болуп, боз топуракка көмүлгүм жок. Ошол улуулуктун, ошол чоң жарыктын учун издеп жүрөм. Аны тапмайын көкүрөккө эмне орнотсоң да каңгырап, бош калгансыйт... #жөнэлеойлор

14.11.2019
Оңой эмес турмуш. Бириңди бириң түздөп, сүйрөп, айрым жерде белиң бекчейгиче көтөрүп алып жөнөйсүң. Ысыганды суутуп, сууганды ысытып, кыйшайганды түздөп жашайсың. Мүнөзүңдү оңдоп, жаныңдагы ыңгай алыш үчүн жакшы көргөн нерселериңден, ал тургай өзүңдөн да баш тартасың. Кыялдарыңды садага чабасың эгер кыялың жаныңдагыга тоскоол болуп атса. Оңой эмес бири бириңе баш ийип, көөп турган өпкөнү кысып, кайнап турган канды токтотуп, үнүң өктөм чыкса, басаңдатып, бутуңдун учу мн жүрүп калуу! Жаныңдагы кенен дем алсын, кенен жүрсүн, кенен болсун мыйзамы алдыда болот анткени! Сүйүү келгенде жүрөккө өзүң жана сенин каалоо көз жаздымда калып калат. Ал үчүн дем алып, анын ууртундагы жылмайуу, көзүндөгү бакыттын учкуну үчүн жашайсың! Башыңды түгүл, бараткан жолуңду кошо жоготуп. Кийин ойгонсоң эле тамтаңдап башка жолдо бараткан болосуң. Бул жетилбеген сүйүү. Жетилгени маңдайдагы адам эч качан өзүңдөн жана сен сүйгөн нерселерден баш тартууга уруксаат бербейт! Колдойт. Дагы бийик учушуңа көмөк болот, оордугун салбайт! Сен кысынып жашап атканда кенен кесир жүрбөйт. Сенин ыңгайың да маанилүү болот анткени. Садага чабылышыңа жол бербейт. Өзүн да садага чаппайт! Жетилген адамдарда ызы - чуу, ары тур - бери тур жокко эсе! Жарым сөздөн түшүнөт анткени! Ашмалтайлыкка жеткирбейт! Мамиле түзүүнүн жолун билет! Ошон үчүн өзгөнү бактылуу кылам деп көкүрөк чабаардан мурун өзүм бактылуу боло алдымбы де! Өзгөнүн жолун табам дээрден мурун өзүңдүн бараткан жолуңа көз чаптыр! Жоопкерчилик алаардан мурун жоопкерчиликтүү бол! Турмуш сага оюнчук бекен?! #жөнэлеойлор

09.10.2019
Эч качан эч нерсе үчүн кеч эмес. Кыялдан баш тартып, кечиктим дегендер, жөн гана шылтоо издегендер, жалкоолор. Бүгүн, азыр, ишке ашпай калды деп өкүттө жүргөн кыялыңыз үчүн алгачкы кадам таштоо мүмкүнчүлүгү турат! Кечиксе да кыялдарын орундаткан эр жүрөктөр барбы араңарда? Сиз кимдин кыялы мн жашап жатасыз учурда? Өзүңүздүкү мененби же жакындарыңыздын кыялдарын аткаруу менен алексизби? ---------------------------------------------------- Макияжды @kymbat_asizova @kymbat_asizova жасады. Колуң менен тең кары! Бактылуу бол!♥

14.05.2020
2009 - жыл август айы. "Браво " берүүсү. Эрмек экөөбүз жыргачу элек. "Эмне жалжактай бересиңер?" дешкени мн эң көп көрүлгөн берүүнүн катарын толуктачу! Ариетим курсагымда 8 айлык. Режиссер ошондо араң билген. Курсагым кичине болгон үчүн кенен көйнөктөрдү кийип алып, алып барчумун. Ушул эфирим коштошуп жана жаңы алып баруучуга өткөрүп берүү эфир болчу. Айрым ырчылар "Курсагыңа эмне салып алгансың?" деп чаап көргөнү да болгон ишенбей. Балам экөөбүз чарчабай, чуркап иштечүбүз.

30.04.2020
Бүгүн букмун. Ыйлагым келип турат. Көңүлүмдү сур булут каптап, көз жашым нөшөр болуп тынымсыз. Тилди, эмоцияны башкарыш кымбат экен. Жаштык, курчтук кылсам, абайлабай көңүлүңөрдү оорутсам, кечирим сурайм! Кечирдим! Кекчилдик жакшы сапат эмес. Көзүбүздү ирмегендин аралыгында бирибиз барбыз, бирибиз жокпуз. Жакшы көрөм силерди.

13.05.2020
Татарстан. Казань. Түрк дүйнөсүнүн журналисттер курултайына мүчө болуп катталган кез. Түрк дүйнөсүнүн өкүлдөрү чогулганда бири бирибизди таап алгандай, дүйнөнүн төрт тарабына тагдырдын буйругу мн үзүлгөн шурудай чачырап кетип, жипке кайра тизилип, башыбыз биригип аткандай сүйүнөөүз. Баарыбыз бир ата, бир энеден тараган бир туугандай сагынышып көрүшөбүз. Тилибиздеги окшоштуктар, уйкаштыктарды издеп, салыштыруу башталат. Ар ким өз өлкөсү тууралуу дилгирленип айтып, тарыхын, таржымалын тасмал кылып жая баштайт. Кайсы гана конференция, кайсы гана курултайга , фестивалга барбайын казак, өзбек, кыргыз табышып алабыз да үч козудай ээрчишип жүрөбүз. Кээде коңшуларыбыз мн таарыныша кетмей жайыбыз болоттур, бирок алыста дайым биргебиз. Кадимкидей колдоп турабыз. Казань сулуулугу, тазалыгы мн эсте калды! Түндөсү жаштар уктабайт экен. Анткени аларды кайнаган жашоосу башталат. Супсулуу кыздары, жигиттери жасанып чыгышып, таанышуу, пикирлешүү, махабат башталат. Көп өлкө кыдырдым. Татардын сулуу кыздары гана өңгөч тарттырды. Тамагынан гана бир аз кыйналдым. Фри картошка, лагмандын камырындай кесме көп жешет экен. Орустардын тамагы үстөмдүк кылганын байкадым. Улуттук тамак катары кадимки эле биздикиндей быжыга окшош ичеги карындан жасалган тамагы келди. Волганын сулуулугу, имараттардын тарыхы, тазалыгы эсте калды.

29.04.2020
"Акын сүйүүнүн анан ажалдын алдында алсыз" З.Ажыматов. Бириң Токтогул, бириң Алыкул болчусуңар...Кош, Зайыр агам! ...

28.04.2020
Көзүмдү жумуп, - Назира, кандайсың? - дейм. Назира жакшы экенинен кабар берет. Тынчтык бар. Санаа, кайгыруу, кыжалат жок. Ойлонгум да келген жок. Күн орозого карабай, укмуштуудай тез өтүп жатат. Карантин узардыбы, кыскардыбы эмнегедир маанилүү эмес. Көнүп алдым окшойт. " Бир орунда отура албасаң керек?" дешет. Отурмак түгүл, чыккым келбейт. Санаа тартып, күн санаган да жокмун. Балким, үйрөнө албай жүргөн сабыр эми келгендир деп ойлоп коем. "Карантин бүтсө, жашоону эмнеден баштайм?" деген суроо кылт эте түшөт анда - санда. Кайра кетенчиктеп келечекке чуркагандан баш тартам. Ал баракты дароо жабам. Далактап, шашып, кыжалат болуп, куюндай куюлуп, жан дүйнөм бушайман жүрчү. Бир орунда, өзүм мн өзүм калгандан коркор элем. Элге сүңгүп кетчүмүн. Өзгөрдүм. Амбиция, көрүнгөн долбоорду чапчуу - ал учурда өзүмөн качуу, көкүрөктү өйүткөн нерседен жашынуу болгон окшобойбу? Көптөн бери эч кимден сүйүү тиленбей да калыптырмын. Көкүрөгүм чөл болуп, тамчы сүйүүгө, көңүлгө зар бп турар элем. Ал да жок. Жашоо тунуп турат. Тынчтык менен жекеме жеке, көзмө көз. Кыжы - кужу болуп, мазамды келтирген ойлор да акыркы убак көрүнбөйт. Алар мн алышып атып, чарчап калаар элем. "Сен жылмайганда мага дем келет"деген уулума кайра - кайра жылмаям. Уулумдун келечегин ойлоп кыжалат болгон ойлордун да карааны алыстады. Жараткан жана мен. Башка эч ким көрүнбөйт... #жөнэлеойлор

13.05.2020
Ариетим, сен сүйүүдөн жаралган баласың, билесиңби? Сени каалап, күтүп жаратканбыз. Курсагымда жүргөнүңдө жомок окуп, ыр угузуп, англис тилин окуйт элем. Атаң экөөбүз сени мн сүйлөшчүбүз. Сен баарын түшүнчүсүң. Доктурга УЗИге барганда дайым туура эмес жатып, же киндикке оролуп алат элең. Үйгө келгенде сени мн кадыресе чоң кишидей сүйлөшөбүз. "Түз жат, ордуңду тап" дейт элек. Анан калыбыңа келип, туура жатчусуң. Жынысыңды да тогуз ай бою көргөзгөн жоксуң. Бирок сенин эркек экениңди жазбай билдик, сездик. Энергияң күчтүү эле. Чоң энем кичинекейимди боюнда бар келиндерди ырымдаганын көрчү элем. Анан курсагынын түзүлүшүн карап туруп эле кыз - эркек экенин айтып берчү. Мен да энемен үйрөнүп алгам. Курсагым тик болду. Анан эт, кылгырган майды, камырды эркек эле суратмак. Бети башымдын баарын май кылып, койдун төшүн бетине кийип алып, уулдун энеси гана жемек. Анан жылкычы болчусуң. Жылкычылар гана түнү уктабай, шырылдаңды созуп, жылкы кайтарып чыгат. Сен да түндөсү өзөртө тепкилеп, курсагымдын формасын бузуп, колу - бутуңду чоюп, уктатпай чыгар элең. Андайда атаң сүйлөшүүгө өзү киришчү. Дароо тынчып калчусуң. Сен төрөлгөндө экөөбүз тең чарк айландык. Ушундай ачык, коркконду билбеген бала болчусуң. Бакчада бирөөнүн курсагын, бирөөнүн кулагын тиштеп, дагы бирөөнүн оюнчугун талкалап келчүсүң. Биз дайым сенин ордуңа тил укчубуз, бирок тентектигиңе аябай жыргачубуз. Ата - энеңдин укмуштуудай сүйүүсүнө малынып, мээримине чулганып, ата - энеңдин бири бирине болгон сүйүүсүн көрдүң. Сага суктанчумун. Өзүмдө болбогон нерсе сенде бар экенине сугумду далай арттым. Көзүм өтүп кетти көрүнөт. Кечирип кой, кичине капа кылдык. Бирок бил, ата - энең өз бактысын тапканга акылуу. Анткен мн сени экөөбүз тең мурдагыдай жакшы көрөбүз, мээримибизге бөлөйбүз. Анткени сен бизге абдан керексиң! ♥ #жөнэлеойлор