01.11.2019

30.10.2019
Ооба, бул кадыресе эле буюмдар. Бирок, БИР ӨЗГӨЧӨЛҮГҮ бар - көзү такыр көрбөгөн азиздер жасаган... Көзү көрбөй туруп коомго, элге, журтка оордугун салбай, өз арбайын согуп, кызматын кылып, эмгегинин түшүмүн тартуулаган азаматтарды көрүп, алты саны амандар шык, дем алаттырбыз. Казань шаарында көзү көрбөгөндөр үчүн ушундай борбор бар экен. Ар кимге оордугун салбай өз алдынча өмүр кечирип,тиричилик өткөрүүгө үйрөтүшөт экен. Мага да белек кылышты... Берген эмес алган март деп алууга туура келди. Аттиң, мүмкүнчүлүгүм болсо кол акысы деп көөөөп акча бермекмин. Берешендик дарак, бутагы дүйнөдө, тамыры бейиште, кармасаң бейишке алып барат дешет го... #казан #Йэрдем_фонду

29.10.2019
Белгилүү актер Азиз Мурадиллаев менен Нарында болдук.Азиз өнөрүн тартуулап, ырларды көркөм окуп, көрүүчүлөрдүн суроолоруна жооп берди. Өз актерубуздун буга чейин атын, өңүн, каармандарын таанысак, эми жан дүйнөсүн аңтарып көрдүк. Азиздин “Айыкпайт деген оору айыгып кеткени таң калыштуу. Элдин батасы укмуш болот экен” деген маанидеги пикири мага аябай таасир этти. Жараткан ар бирибизге элдин батасын насип кылсын. Иш-чара өтө мыкты деңгээлде өттү. Ракмат, Нарын жаштары. Ракмат, Бакай менен Табылды баштаган китепкөйлөр... #китепкөй_өлкө #Өзүңдү_тааны

27.10.2019
Этти, тамакты, жашылча-жемишти бузбай сактоого кандай аракет кылабыз. А адеп менен илимди, ыйман менен ыкласты асыроо үчүнчү? Бар нерсени гана сактайсың... Ар бир үйдө муздаткыч болгондой, ар бир жүрөктө уят, намыс, аруулук болгой, ылайым. #кыргыз_радиосу_25_10_19

26.10.2019
Казань... Жүрөгүмдө куш канатынын алдындай жылуулукка айланып уюп калды. Татар бир боорлор абдан сонун тосуп алышты. Музейлерин, эс алуу борборлорун, тарыхый жайларын, заманбап маданий мекемелерин көрсөтүштү. Жаштар министри Фаттахов Дамирь Ильдусович болсо убагында азыркы Украин лидери Зеленский менен бирге кадимки Масляковдун КВН таймашына чыгып жүргөн атактуу жигит экен. Тааныштык, баарлаштык, пикир алыштык. Айдоочусу менен жардамчысын мен Казандан кайткыча карамагыма табыштап берди. “Мы своих гостей без внимания не можем оставить” дейт жылмая. Меймандоспуз деп мактанабыз, бирок, татарлар бул жагынан бизге да өрнөк болчудай. Дүйнөлүк универсиаданы, футбол чемпионатынын беттештерин ж.б. биринчиликтерди өткөзө берип конок күтүп, кадырлаганды ушунчалык үйрөнүшүптүр. Кыргыз мигранттарына жолугуп, “Мекендештерим кечки тамакка чакырып жатат. Анан өздөрү таштап коюшат экен” деп араң кетирдим министрдин жардамчысы Раиль менен айдоочуну. Болбосо, мейманканага жеткирмейин канча саат болсо да кызматыңды кылып жүрө берчүдөй. Бут менен кошо кут кирип, Казань таанылгыстай өсүптүр, өзгөрүптүр. 2005-жылы барганымда укмуш көрүнгөн, азыр андан да ачылыптыр, чырайына чыгыптыр. Тазалыгын, жашылдыгын, бейпилдигин жана сулуулугун айт. Кыйырсыз түзөңдө этек-жеңи жайыла кериле кеңирсийт тим эле. Азырынча, Орусияда Казанга теңдеш кооз, жанга жагымдуу шаарды көрө элекмин. Тамактары да биздикине окшош: адал, даамдуу, берекелүү. Жылкынын этин жакшы көрүп жешет экен... Кыргыз диаспорасы менен жолуктук. Ала-Тоонун эпкинин аябай сагынышкан белем, Instagram аркылуу келгенимди жаза койсом, топтоло калып чакырышты. Сагынычтарды жазыштык. Ошол жерде кыргыз бөбөктөрүн эне тилибизге акысыз үйрөткөн бир мугалим бар экен. Алыста ата салтын, эне наркын, улут тилин сактоо далалатын кылган ысык ыкласыңардан айланса болот, кандаштарым... Айтор, тили, теги, тамыры бир алыстагы татар туугандар менен жүздөшүп, дидарлашып, боор батырышып кайттык. Таасирлер Казанды бойлой аккан Волга дайрасындай учу-кыйырсыз, мол. Көп нерсени үйрөндүк, ийгиликтерге шыктандык... Бар бол, Казань. Бар болгула, татар бир туугандар... #Рахмат_Татарстан #Дамир_Ильдусович #Прекрасный_Казань #Спасибо_Раиль

24.10.2019
Реал менен Барселонанын күйөрмандарынан китеп күйөрмандары көп - КИТЕПКӨЙ ӨЛКӨГӨ айланып барабыз... Жаратканга шүгүр. Ракмат, жаш китепкөй ыктыярчылар. Бул - силердин күжүрмөн эмгегиңердин жемиши. Элдин батасы тийип, ооматыңар артсын. Жалал-Абаддын рекордун батыраак жаңырталы... Бектур, Ороз, Эдил, Исхак, жалал-абаддык жаштар, демилгечилер, демөөрчүлөр, төбөлдөр... баарыңарга ак бата... #Китепкөй_улут #китепкөй_Жалалабад

22.10.2019
Авроранын короосу мынчалык кооз экенин билбептирмин. Коңур күз. Мөлтүр көлүм. Түркүн боёктуу бак-дарак. Акактай аба. Касиеттүү Ысык-Көлүм, кереметтүү мекеним. Кадырыңа жетсек экен... #ысык_көл #аврора

20.10.2019
ЖАЗЫЛГАН КУСАЛЫК Москвада айылдаш туугандарыма жолуктум. Аяш энем, аксакал агалар, ага-эжелерим, кошуналарым, классташтарым, досторум, ини-карындаштарым, жээн-таякелерим, ал тургай мен айылдан кеткен соң туулган улан-кыздар бир ресторанда топтолуп, дасторкон жайып жаркырап-жайнап тосуп алышты. Айрымдарын көрбөгөнүмө дээрлик чейрек кылым болуптур. Алардын жылмайыңкы жүздөрүнөн туулуп өскөн өрөөнүмдүн көркөм элесин, эргиткен эпкинин, жыпар желаргысын туюп, сезип, ушунчалык толкундана кубандым. Тууганды көрүү – тагдырыңа жана тамырыңа кылчаюу, үңүлүү белем, айтор алар аркылуу мезгил мерчеминин алкагынан аттап, тээ айылдагы бактылуу балалыгыма, таттуу күндөрүмө, сезимдериме саякаттап кайттым. Баарыбыз бир чөлкөмдө жашоо кечирген алыскы жылдары бир кезде башка улуу өлкөнүн борбор калаасында дидарлашабыз деп бирибиз да ойлобосок, боолгобосок керек. Тагдырдын сырдуулугу ушунда тура... Колдо бар алтындын баркы жок болуп, бир абадан кере дем алып, бир булактын суусун ичкен замандарда жакындарымдын мынчалык жакын экененин таптакыр түшүнбөптүрмүн. Жакындын жакындыгын билиш үчүн алыстарга кетүү керек окшойт, айтор, ал жерде кезиккен ар бир инсан өз боорумдай, өз карегимдей сезилди. Аманчылыкта кайрадан ырысташ, табакташ кылган Жаратканга чексиз шүгүрлөр болсун. Ырыскың кенен, өмүрүң узун, дениң сак болушу үчүн туугандыкты бекемде деген улуу накыл бар го. Ушундай жагымдуу жүздөшүүнү демилгелеген, уюштургандардын баарына чын ыкластан ыраазымын. Москвада мусапыр абалда аябай жүрөгүм жылыды. Ошол – силерге берген ак батам, аруу тилегим болсун. Бар болгула, боордошторум. Ыйманда жашап, ырыскы берекесин тапкыла... Жаратканым жар болуп, колдой берсин... #Москва #Боордоштор

18.10.2019 Jalal-Abad, Kyrgyzstan
#Китепкөй_Өлкө _ #Китепкөй Жалал-Абад

10.10.2019
Жолдун сол тарабындагы ылай дубалдар - Тажикстан. Оң жагы биздин жер. Кошуналар менен жакшылыкта жарышалы. Билим, адеп, ыйман, биримдик, спорт, китепкөйлүк жагынан өрнөк бололу... Баткенде китепканаларды көбөйтүү демилгесине ар бирибиз колдоо көрсөтөлү. Баткен - кыргыздын кырмандуу кыйыры, алтын рабаты. #Баткен #бир_адамдан_бир_китеп

06.10.2019 Bishkek, Kyrgyzstan
БАТА АЛУУ – бул бирөөнүн сага алакан жайып, ак тилек айтышы эле эмес. БАТА АЛУУ – бул адамдын жүрөгүн жылытуу. Бир да жан күбө болбогон сооптуу ишиң деле жүрөктөргө сөзсүз кубаныч алып келет. Оң колуң кылган жакшылыкты сол колуң билбей калган менен Жараткан баарын көрүп турат. Ошон үчүн “Жакшылыкты жаса да деңизге ыргыт, балык билбесе Калык билет” дейт акылман кыргыз. Калык деген Жараткандын бир аты, бир сыпаты. Ошондуктан, мейли, адам сени билсин же билбесин, уксун же укпасын, таанысын же тааныбасын, сен кылган адал, берекелүү иш-аракеттин акыбетине кубанып, ичи элжиресе – сага берген батасы ошол. _ "Бир гана Сенсиң" китебинен

05.10.2019
"Мамлекет мамлекет катары сакталышы үчүн жарандары биринчи кезекте өзүнүн тамырын, тарыхын, м.а. өзүн-өзү таанышы керек"

04.10.2019
Сапардабыз. Жолдун бир жагы - ыйык Мекенибиз, экинчи жагы - кошуна өлкө болгон кыргыздын берекелүү кыйырындабыз. Кичи пейил, жумшак мүнөз, эмгекчил, ак жолтой, ар намыстуу элибиз - чек арадагы бекем чеп жана алтын дарбазабыз болуп турат. Жаштарынын илимге болгон талабы тим эле алоолонот. Ар жолу жүрөк жылып, көңүл эрип кайтам бул кутман жайдан... Бар бол, байманалуу Баткеним... #Баткен #Рабат #Чоң_Талаа #Карабак #Карабулак

02.10.2019
Нам хорошо известны звезды Голливуда и Болливуда, поп и рок исполнители Запада и Востока, многие зарубежные писатели, спортсмены и герои сериалов. При этом, большинство нашей молодежи почти не знает таких великих отечественных талантов, как Даркуль Куйукова, Бакен Кыдыкеева, Муратбек Рыскулов, Александр Мелентьев, Сабира Кумушалиева, Игорь Паклин, Ахмед Анарбаев, Каныбек Осмоналиев и многих других. А таких мировых звезд, как Брэд Питт, Шахрух Хан, Джекки Чан, Майк Тайсон и без нас знают и смотрят во всем мире. Но, если мы сами не будем изучать, ценить и популяризировать героев отечественного спорта, искусства, кино и литературы, как мы можем сохранить собственную культуру? Не познавая себя, своих героев, уникальность родной культуры, трудно говорить о дальнейшем развитии государства. Поэтому, на сегодняшний день актуальным является создание площадок для конструктивного общения общества со своими героями – актерами, поэтами, учеными, композиторами, спортсменами. Также планируется подготовить креативные ролики о великих личностях Кыргызстана и презентовать их на местах. Мы уверены, что данный проект станет не только познавательным для молодежи, но и источником для их мотивации... #Познай_себя #Өзүңдү_тааны

27.09.2019
Бекин Сейдакматов деген ким? А Бред Питчи? Анжелина Жолини тааныйсызбы? Даркүл Күйүкованычы? Нурлан Абдыкалыковду уктуңуз беле? Майк Тайсондучу? Усейн Болтко катар Игорь Паклиндин аты эмнеге айтылбайт? Эмнеге Дубайга, Анталияга баруу - аброй да, Таш-Рабатты, Кара-Койду, Кароол-Чокуну көрүү максат эмес? Аясофияны көрсөк мактанабыз, Буранабызга маани бербейбиз? Өзүбүзгө үңүлөлү, өзүбүздү тааныйлы! Өзүбүздү билели, үйрөнөлү. Биз ошонубуз менен элбиз, улутпуз... "Өзүңдү тааны!" долбоору башталды, буюрса. Биринчи конок - актер Болот Тентимишов болду. Кочкор жергесинде абдан пайдалуу жолугушуу өттү. Эмки конок - жакында эле эл акыны болгон белгилүү калемгер Карбалас Бакиров. Токтогулдун Бел-Алдысында, буюрса, эртең... Өз каармандарыбыздын аттарын эле эмес заттарын, сыртын эле эмес жан дүйнөсүн аңтарып түшүнүүгө мыкты мүмкүнчүлүк... Жер кыдырып, эл тааныганга ырыстуу ыңгай. Жараткан жар болсун... #Өзүңдү_тааны

26.09.2019