23.03.2020
Напсини биз башкарбасак, напси бизди башкарып кетет.

22.03.2020
ЖАРАТКАНДЫН ЖАРДАМЫ ЖАНА ДЕЗИНФЕКЦИЯ Дагы ЖАКШЫ КАБАР айтайын. Кудайга чексиз шүгүр – бүгүн “дагы чыкты”, “жугузгандар катталды” деген кабар болгон жок. Бул да болсо дарыгерлерибиздин, тартип сакчыларыбыздын, атка минерлерибиздин, кайрымдуу уул-кыздарыбыздын, дегеле мыйзамды сыйлаган, эреже-тартипке баш ийген кош көңүл эмес жарандарыбыздын ак дилдүү, ынтымактуу аракетине Жараткандын берген берекети. Кечээ нөшөрлөп жамгыр жааган. Биринчиден, жамгыр бул – Жараткандын ыракматы. Жамгыр учурунда айтылган тилек, берилген бата кабыл болот дейт. Азыр канча адамдар аты жаман вирустун зыянынан сактоону күн-түн дебей сурап жаткан учур. Экинчиден, “таза болсоң суудай бол – баарын жууп кетирген” дегендей, жамгыр аркылуу бүтүн өлкөбүз: шаарлар, базарлар, мазарлар, айылдар, тоолор, талаалар, аң-жарлар, айтор, кең айдыңдардан тартып кычык-бучуктарга чейин дезинфекция болду. Эгерде ошондой дезинфекцияны өзүбүз кылчу болсок, мамлекеттин казынасынан миллиарддаган сом акча кетмек. Бүткүл жарандык жана аскерий авиациябыздын баарын асманга миң жолудан көтөрүп миллиондого тонна антисептик чачтырсак да, бир саамга төгүп өткөн жамгыр тийгизген пайданын миңден биринче иш бүтмөк эмес. Бүгүн болсо күн жаркырап тийип, жылуу болду. Вирус жылуулуктан, күндөн коркот дешет дарыгерлер. Айтор, биз кадырына жетпей, бүлгүн салып, кыйратып, кордоп жаткан табигат аркылуу Жараткан Өзү жардам берип жатат бизге. Кандай жолдуу, бактылуу элбиз. Баса, карантин себептүү аба тазалана түшкөнүн байкабаган адам болбосо керек. Көчөдө быкшытып түтүн бүрккөн транспорт азайганда, ушинтип, аба арууланат экен. Ден соолуктун чыныгы булагы – бул таза аба. Тамаксыз ондогон, суусуз үч-төрт күн жашашың мүмкүн, бирок, аба жок болсо ашып барса саналуу мүнөттөн соң жалган өмүр жайрайт. Көрдүңүзбү, кыжалат кылчу бир сыноонун артында, биз аңдай бербеген купуя жана ачык миңдеген жакшылыктар бар. Орустар “Не болсо да жакшылыкка” (Все к лучшему) деп бекер айтышпайт өзү. Карантин да, өзгөчө кырдаал дагы уланат. Кут-берекенин ордосу болгон үйүбүздө отуруу мүмкүнчүлүгү дайым эле боло бербейт. Убактым болгондо кыйратат элем деген иштерди эми жасайлы: ⬇⬇⬇

21.03.2020
ЖАКШЫ КАБАР Жакшы кабар айтайынбы? Өрүк гүлдөдү. Өрүк гүлү мен үчүн буга чейин чабалекей менен байчечек сыяктуу жаздын жарчысы эле. Роза сыяктуу сүйүүнүн, жапондор даңазалаган сакура сыяктуу татыктуу өмүрдүн символу болчу. Бүгүндөн тартып ал мага жаркын үмүттүн да эн белгисине айланды. Көзгө көрүнбөгөнү менен, дүйнөгө дүң болуп, көңүлдөргө кыжалатчылыктын кара туманын айдап келген аты жаман бир вирустун айынан кабактар бүркөлүп, маанайлар чөгүп турган учурда: “Силерге эмне болду? Вирус дейсиңерби? Ушул кыпындай макулуктун айынан санап бүткүс береке, ырыскы, жакшылыктар көзүңөргө көрүнбөй калдыбы? Карагылачы, асман дале ачык. Кар баскан тоолор сынын бузбай шаңкаят. Заманыбыз бейпил. Чымчыктар чурулдашып бактылуу. Жашоо дале керемет! Баары жакшы! Жакшы гана эмес, эң сонун! Болгону денеңди жана чөйрөңдү таза тут! Дене менен кошо ойду, пикирди, жүрөктү тазала! Таза чөйрөгө вирус, таза жүрөккө шайтан жолой албайт. Шайтан шаштырып, маскаралабаганда тээ илгери адамдар машак терип жеп, бир казан кайнак сууга бир чөйчөк сүт кошуп үй-бүлөсү менен чогуу ичип жан баккан заманда болбогон топуксуздукту көрсөтүп, ун, күрүч, тамак талашып уят болбойт элеңер! Кайгыдан каражат таап туйтунам деген ойдон өткөн коркунучтуу руханий вирус барбы? Пейилди кенен ташта! Жараткандын ырыскысы кең, баарына жетет! Вирус бул – сыноо. Сенин ыйманыңды, адебиңди, ынтымагыңды, нысабыңды текшерүүчү сыноо! Бул сыноодон ийгилик, жеңиш менен өтүү өзүңөрдөн гана! Ийгилик – ишенимден башталат! Ишенимдин булагы таттуу тил, таза жүрөк жана ысык ыклас. Жеңиш болсо жакшы маанайдан, жылмаюудан башат алат! Жылмай! Шаттан! Шүгүр айт! Өз дегенде өнтөлөп жан бергендерден болбой, өзгөлөрдү да ойло! Ынтымак ошентип куралат. Ырыс кенчинин ачкычы – ынтымагыңарда. Буюрса, бул күндөр да бат эле өтөт! Баары эң сонун!” дегенсип бажырая ачылып, адамзатка салам салып турушат. Өрүк гүлдөдү! Жаштыктын, сүйүүнүн, сулуулуктун, бактылуу жашоонун жана жаркын үмүттүн символу ГҮЛ АЧТЫ! НК, 21-март, 2020-жыл #жакшы_кабар #үмүт_гүлү

17.03.2020
Аял укугу үчүн өкмөтүбүз ушундай флэшмоб уюштурууда. Биз да чын дилден катышып, сөзүбүздү айттык. Бул тема ар бирибиз үчүн актуалдуу. #Аялга_мамиле

12.03.2020
Спортту ниетти оңдоп туруп башта. Көчө - үйүң эмес, ал элдики, коомдуку. Көчөдө чырдашпа. Бирөөнүн адебин оңдойм деп, өз адебиңди бузуп алба. Жараткан ыйман, абиир берсин. #спорт #Адеп_державасы #ниет

11.03.2020
Коронавирус – бул адамзаттын башына келген апаат. Анын кара тумандай жайылып баратышы ар бир инсандын көңүл көйгөйүнө, жүрөк санаасына айланды. Деген менен, эпидемиядан коркуп, ызы-чуу салып, кымкуут түшүүнүн зыяны мол, бирок, ныпым пайдасы жок. Сыноо бир же бир нече адамга эмес, бүтүндөй коомдун башына түшүп турган соң, кырдаалдан бир муштумдай түйүлгөн ынтымак менен чыгуубуз мүмкүн. Ооба, ынтымак жана биримдик менен гана! Анткени, ынтымагы бар элдин ырыскысы мол болот. Ырыскы деген жакшылыктын келиши эле эмес, жамандыктын тосулушу. Ир алдыда ааламды заматта айланган вирус тууралуу суук кабарлар көңүлдү кыраа кылып турганда бири-бирибизге дем берели, маанайларды көтөрөлү. Кыйын күндөрдө бирибизге бирибиз эш болуп, колдоо көрсөтөлү. Ким кандай жагдайга тушукса да жалгыз калбасын, кандаштар, мекендештер жардам колун сунууга даяр экенин сезип, духу бийиктегендей болсун. Эгер, карантинге алынгандарды кармоого жайлар жетишпей баратса, ден-соолукту чыңдачу мекемелерде тек гана пофилактика үчүн дарыланып жаткандар кабагым-кашым дебей орундарын бошотуп бергенге даяр болсо. Бирөөнүн бир муктаждыгын чечсең, Жараткан сенин көп муктаждыктарыңды бүтүрүп берет! Кайрымдуулуктун, боорукерликтин мыйзамы ушундай. Анан жаман айтпай жакшы жок, эгер бирөө-жарым вирустан шекшинип жардам сураса, дарыгерлерибиз демейде боло жүргөндөй “катталган жериңе кайрыл!” деп сөөмөйү менен көчөнү көрсөтүп койбосо. Гиппократтын анты – документине, тек-жайына же дарегине эмес, муктаждыгына карап ар бир сыркоого чын ыкластан жардам берүүгө милдеттендирет. Капылет, “түкүнчөгө оору жугуптур” деген сөз таркаса, жийиркенбейли, жерибейли. Жийиркенүү – илдетти өзүнө чакырат дешет аалымдар. Жок дегенде ага ичибизден ак батабызды арнап, ак халатчандардын кароосуна тапшыралы. Дарыгерлерибизге ишенели. Эң оор милдет ошолордуку: илдетти алдын алуу жана бир балакет болсо өмүрүн тобокелге, көңүлүн санаага салып, дарылоо озуйпасы мойнунда. Бул Чолпонбай баатыр көкүрөгү менен окту тосуп, миңдеген омүрлөрдүн сакаталышына жана душмандын сазайын берүүгө огожо болгондой улуу эрдик. Дарыгерлерибизди аяп, колдоп, айткандарын аткаралы. ⤵ ⬇⬇⬇

08.03.2020
Эң жакшы белек - көңүл көтөрүү.

08.03.2020
Сүйүү жөнүндө, эне, жөнүндө, жубай жөнүндө ырлар толтура экен. А бирок, аялзаты тууралуу ырлар жокко эсе тура. Ошону ойлоп, үч күн мурда ушул саптарды шилтедим. Чындап эле аялзаты бар үчүн – өмүр көчү уланып келет. Ойлосоңуз, эгер жер шарындагы жети миллиард элдин баары эркек болсо, жүз жылдан кийин ким кылат? Сыйлайлы, кадырлайлы, сүйөлү, аяйлы. Бирок, жаздын бир жаркын күнүндө эле эмес, жылына 365 күн!!! Майрамыңыздар менен, асылзат аялзаты. #АЯЛЗАТЫ Аялзаты – кут, береке булагы, Аялзаты – маанай таңы, чырагы. Адамзатты жеңиштерге сүрөгөн, Ар намыстын, ийгиликтин урааны. Аялзаты – жашообуздун ырысы, Жан бүткөндүн мээримдүүсү, сулуусу. Күн суукта мештей жылуу, ысыкта, Ак жамгырды алып келген булуту. Аялзаты – ыйык эне, асыл жар, Ал бар үчүн адамзат бар, өмүр бар. Гүлсүз шалбаа, мөңгүсүз тоо сыяктуу, Аялзатсыз жашоо супсак, дүйнө тар. Аялзаты – көңүлдөрдүн шаттыгы, Аялзаты – мырзалардын марттыгы. Аялзатка бакыт сунган азамат, Өзү болор эки дүйнө бактылуу. Аялзаты – бөбөктөрдүн бактысы, Аялзаты – эргүүлөрдүн ачкычы. Аялзатын туудай тутуп кадырлайт, Ааламдагы мырзанын эң жакшысы. 08.03.2020

06.03.2020
«Мираж» деген китепкана жана китеп дүкөнүнүн ачылышына катыштык. Исанов-Чүй көчөлөрүнүн кесилишиндеги Бета-Сторес дүкөнүнүн эң үстүнкү кабатында жайгашкан. Ким ачты дебейсиздерби? Болгону экинчи курста окуган Турат деген азамат жигит. Жыйып койгон пулу, бордоп койгон малы жок эле жакшы ниет, адал аракет, ысык ыклас менен киришип ачып салды. Ойду омкорот элем, акчам жок, же тааныш таппадым деп өзүн алдап, көңүлүн сооротуп жүргөндөр мындан ибарат алса. Ыклас, аракет, аруу ниет болсо, Жараткандан жардам келерине айкын мисалды жаш жигит амалы менен далилдеп олтурат. Эми китепкана+китеп дүкөнү бүрдөп, гүлдөсүн. Эпадам, арак-шарап саткан дүкөндөр, түнкү клубдар, арам-адалды ылгабаган ашканалар күркүрөп иштеп, студенттин ачкан жамалы жарык китепканасы оожала албай жабылып калса, бул баарыбыз үчүн уялчу, намыстанчу иш болот. Жок дегенде барып туралы, кирдетпей китептерди окуп туралы. Анан китеп сатып алып туралы. Китепкөй жаштар, азаматсыңар! Ишиңерге береке!!! #мираж @miraj_books

05.03.2020
ЧЕТ ЭЛДИКТЕР НЕГЕ МАГА КАРАШТЫ 2001-жылдын марты. Москвага биринчи жолу бардым. Кыргыз элчилигинин мейманканасына жайгашып, андан соң Третьяков галереясына, Кызыл Аянтка зыярат кылдым. Бул жайлар бири-биринен анча алыс болбогондуктан жөө жүрдүм. Жолдо баратсам маңдайымдан чыккандын дээрлик баары эле мени таанышындай карап жатышты. Айрымдарынын көздөрүнөн таңыркоону көрсөм, башкаларыныкынан суктанууну, сый-урматты туюнткан жылуулукту сезем. Кээ бирлери машиненин ичинде баратып жылмая тиктеп, баш ийкеп, кол сермешет. Ушундай окуя кийин АКШнын Бостон шаарында да кайталанды. Топтолуп отурган афроамерикалык улан-кыздардын бири мени көрсөтүп бирдеме деп кыйкырды эле, калгандары жапырт бурулушуп, мага жылмайышып, колдорун булгалап, сонун маанайда ызы-чуу түшкөн бойдон калышты. Эки учурда тең адегенде эмне болуп кеткенин түшүнө алган эмесмин. Неге баары эле мага назар салышат? Болгондо да мээрим менен, көңүлдү көтөргөн күлкү коштогон карек менен тиктешет? Баш териси башка эл тааныгыдай Голливуд кино жылдызы же Марадона, Зидан, Месси, Роналдо менен атак талашкан футболчу, Тайсон менен таймашкан боксчу болбосом. Анан гана кептин кайда жатканын түшүндүм. Башымда #АК_КАЛПАК бар болчу. Орустар да, америкалыктар да өзүмө эмес, башымды шөкөттөгөн, шаңкайган АК КАЛПАГЫМДЫ карашыптыр. Мага эмес кыргызымдын кооз-көркөм улуттук баш кийимине суктаныптыр. Алардын жүзүндөгү жылуу ырай, достук маанай – балким, калпак аркылуу биздин кайталангыс маданиятыбызга, чыгармачылык дареметибизге бийик баа берип, таазим эткенидир. Ак калпак – Ала-Тообузду элестеткен элибиздин ак жолтой символу. Ак калпакта аруулуктун, бийиктиктин жана нарктуулуктун сыры жана сүрү бар. Ак калпак – Манас атабыз, Бакай, Кошой бабаларыбыз баштаган, кыргызды ийгиликтин бийик чокуларына сүрөгөн элибиздин сыймыктуу, залкар уулдарынын асыл баштарын кооздогон керемет баш кийим. Ак калпакты даңазалаган – кыргыз жигитинин алтын башы эле эмес, ары, намысы, абиири жана ыйманы. Ошондуктан, “Ак калпагың башыңдан түшпөсүн!” деген ак батанын мааниси - ооматтуу, намыстуу, айкөл жана эл туусун желбиреткен эр жүрөк бол дегенди туюндурат. Жараткан Ак калпактуу элибизге ынтымак, күч-кубат жана кетпес оомат берсин! 05.03.2020

03.03.2020
#ЖАКШЫГА_ЖАНАШ Айтылуу актер, элибизге эмгек сиңирген артист Темирлан Сманбеков менен бир топко маектешип отурдум. Темирлан агайдын өңүндөгү сүр, көзүндөгү сыр, сөзүндөгү салмак, амалындагы көркөм адеп-ахлак адамды өзүнө тартып турат экен. “Түсү ийгиден түңүлбө” дегендей тектүүлүгү, нарктуулугу өңүнөн дароо байкалат. Эл арасындагы бийик баркынын бир сыры ушунда экендигин түшүндүм. - Нарындын кышы ден-соолугума оор келип жатат. Башка жакка которулсамбы дедим эле, - деди ал маселенин ток этерин айтып, - Ошого кеңеш салганы келгем. - Анткениңиз менен жамаатыңыз бизден сизди кетирбешти сурап жатат. Кетирсеңер митинг кылабыз деп мына менин көзүмө айтышты, - дедим жылмая, - Бизде “Кетсин!” деп талап кылуу кадыресе көрүнүш, бирок, бирөөнү “Кетпесин!” деп митингге чыгуу демилгесин биринчи жолу билишим. Темирлан агай кеп төркүнүн аңдап, алкыш айткансып чын ыкыласынан жылмайды. - Айтыңызчы, - деп ага учурдан пайдаланып насаат уккум келип кайрылдым, - Бирге иштеген эмгек жамаатынын ичинде ушундай бийик аброй күтүү үчүн эмне кылуу керек? Сманбеков бир аз ойлоно калды да мындай деди: - Биринчиден, жетекчи катары бардыгына бирдей мамиле кылуу зарыл. Экинчиден, ар бирине аяр болуу керек. Үчүнчүдөн, бирин да калтырбай камкордукка алуу шарт. Көйгөйлөрүн ук, колдон келишинче жардам бер, жок дегенде жылуу сөзүңдү аяба. Искусство адамдарын башкара албайсың, болгону, аларды түшүнүү, аёо жана эмгегин баалоо керек. Уккан мааниге муюганымды баамдаган агай дагы бир орчундуу насаатын кулагыма күмүш сырга кылды: - Келишпестиктер, тирешүүлөр, көрпенделик терс сыпаттар жамаатты ичтен ириткен жерлерде да иштедик. Жетекчини жетим улакчалык көрбөй, эшикти тээп кирип, кекете кекээр сүйлөгөндөргө да эч качан теңелбедим. Оюн, муңун, арманын, ачуу сөзүн аягына чейин угуп, “Ишке баары сиздей күйсө кана эле!” деп кеп нугун жакшылыкка буруп, кас болуп кирген кишини дос кылып узатып койчумун. “Мен жетекчи!” деп үстөл муштагандан зыян болсо болот, бирок, пайда чыкпайт. Оройлукка салып, адамдардын жүрөгүн оорутуп иштетүү – бул жеткен канкордук. Канкор эмес, камкор бол! Жакшы жетекчи болуунун, менимче, бар сыры ушул. Темирлан агай менен көпкө баарлаштык. Көңүлүм өстү, жүрөгүм

01.03.2020
Кечээ эле кыш болчу. Тиричилик тизгинин жазга оңойлук менен бербечүдөй буркан-шаркан түшүп аткан. Зампарлаган кар жер бүткөндүн баарын басып, ошол бойдон түбөлүк орун-очок алып калчудай күпүлдөп жааган. Балким, өмүрдүн кырк экинчи кышы менен коштошкум келдиби, же тек гана буюккан буурул кыштын керемет сулуулугуна суктандымбы, айтор, жумушумдан Баялинов китепканасына чейин жөө басып барып, табияттын татынакай көз ирмемдерин фотого түшүргөн элем. Бүгүн – жаздын биринчи күнү. Ошол кыш ызгаарынын кыпын белгиси жок. Заматта теребел жайдарыланып, кардан бошонгон кара жерди жашыл тукаба жаап калды. Өмүр ушундай тез өтчү, тез өзгөрчү жалган сүрөт белем. Иши кылып, жашоонун дагы бир кышы артта калды. Эриген кар менен кошо өткөн өкүт-армандар, кайгы-капалыктар, таарынычтар көңүлдөн жуулуп кетсин, ылайым. Жашыл жазды жакшы маанайда, жаркын тилектер менен жүрөктү, дилди тазалап тосолу. Күн менен кошо дил жылысын, сөздөр, ортодогу мамилелер жаркылдасын. Байчечек менен кошо эргүүлөр, асыл жана аруу сезимдер бажырайсын. Аманчылык болсо жаз да заматта өтөт. Бүрдүн да, байчечектин да доору бүтөт. Бирок, жазда жасалган амал, кылынган эмгек калат аркада. Убакыт бошко кетпесин. Эртең артыбызга кылчайганда өз колубуздан, адал мээнетибизден жана алп аракетибизден калган ийги издерди көрүп кыбабыз канып, көңүлүбүз кубансын. Ар бир кыргыз жараны, жок дегенде #жетиден_бак_отургузалы. Бак менен кошо, балким, элибиз, жерибиз, өзүбүз, келечегибиз үчүн бакыт үрөнүн себебиз. Кыялда жашап келген арзуу-тилектердин аткарылышы үчүн алгачкы кадамдар жасалган, башталып бирок ара жолдо арасат калган мыкты жумуштар ийгилик коштоп аягына чыккан, урушкандар жарашып, бузулгандар оңолгон берекелүү убак болсун – ушул жаз. НК, 1-март, 2020-жыл

28.02.2020
Жалган дүйнө! Арман дүйнө! Асыл амалдарга толуп өтсүн, ылайым. #Эгизбаевдин_элесине

24.02.2020
Самурайлар кылычын дайыма курч кармачу. Азыр кылычты эмес, акылды, билимди ар дайым курчутуп турчу заман. Булардын бир булагы - китеп!

23.02.2020
Бул жигиттерди атагына амалдары жарашкан ыймандуу азаматтар деп билем.

22.02.2020
Күн Чыккан жактан өрнөктүү өнөктүк. Чоң рахмат, мекендештерим!