20.05.2020
Кадыр түндөн кийинки таң... Кылган дубаларыңыз, аткарган амалдарыңыз кабыл болсун. Элге-жерге береке-бейпилдик, жүрөктөргө ыйман, пейилдерге кенендик, көңүлдөргө тазалык жана жылуулук тилейм. Мындай кадыр кечелердин дагы далайын тосуу насип болсун... 20-май, 2020-жыл

16.11.2019
АКШнын Кыргызстандагы элчиси Лу мырза менен К.Баялинов атындагы китепканада "Maker space" борборун ачтык. Бул жерде балдар, өспүрүмдөр китеп эле окубастан робот жасаса, комикс тартса, ойлоп табуу иштерин жүргүзсө, кол өнөрчүлүк кылса, жаңы технологиялык идеяларды талкууласа, акыл баарлашууларын өткөрсө, өзүндөй жөндөмдүү пикирлештерди тапса болот. Окурман эми китепканада керектөөчү эле эмес жемиш берүүчү бак сыяктуу. Китепкана, көп профилдүү акыл, өнөр, билим, чыгармачылык жана достук борборуна айлануусу керек. Ушул концепция боюнча бүт Кыргызстанда иш жылганы турат. Сунуштар болсо бөлүшөлү. Демөөрчүлөр чыкса айылдарда да ушундай шарттары менен оргиналдуу дизайндагы китепканаларды куруп баштайлы. Кайсыл айыл биринчи бул демилгени ишке ашырат болду экен, көрөлү... Качанга чейин мындай иштерге четтен демөөрчү издейбиз... Баса, элчи мырзанын ийкемдүүлүгүнө ыраазы болдук. #maker_space #посол_США

29.03.2020
КАНТТИ ЭКЕН? Мындан көп кылым мурда жашап өткөн Асан кайгы деген атактуу акын, ойчул, даанышман бабабыздын атына бекер жерден “кайгы” деген сөз кошулуп айтылбаптыр. Анткени, ал азиз адамзаты мындай турсун кулан, коён, чымчык, бөкөн, кийик, каз-өрдөк, таш бака, ал тургай пайдасынан зыяны көп чаян, чымын, жылан, доңуз сыяктуу айбанаттардын да көргөн күнүн, туш болгон кыйынчылыгын ойлоп, жай алып жата албай кайгыга батчу тура. Жайдын күнү катуу мөндүр жаап, капилет ызгаар суук түшүп, суулар тоңуп, жерди муз каптаганда: Куйругу жок, жалы жок, Кулан байкуш кантти экен? Чымчып алар жүнү жок, Чыңырарга үнү жок, Боорунда буту жок, Жылан байкуш кантти экен? Баш калкалар үйү жок, Пааналаган жери жок, Курт-кумурска кантти экен? Уясын кар баскан чыгар, Шору таштай каткан чыгар, Муздап карга жаткан чыгар, Чымчык байкуш кантти экен? – деп жан бүткөндүн баары үчүн кыжалатчылыкка түшүптүр, кайран киши. Биз бул башкача мээримдүү, камкор, жүрөгү назик бабабызчалык сойлогон, жорткон, учкандын баарын ойлобосок да, азыркы өзгөчө кырдаалда биз үчүн алтын башын, асыл жанын тобокелге салып, кажыр-кайрат менен тынбастан иштеп жаткандарды аяп, артынан жакшы дубаларды кылалык. Карантин себеп болуп бардыгыбыз үйлөрүбүздө, жакындарыбыздын маңдай-кашында бейкапар отурганыбызда, байкуш дарыгерлер, милициялар, өзгөчө кырдаал министрлигинин кызматкерлери, аскерлер ж.б. калкты кара тумандай каптаган эпидемия коркунучун колкодон алып, күн-түн дебей эл аралап эмгек үстүндө. Коомдук транспорт токтогондуктан, алар жумушуна кантип барып-келип жатат болду экен? Кафе-ресторандар, ашканалар жабык. Анда, курсактары ачканда кайда шам-шум этишүүдө? Жаз жарымына жакындаса да суук сурданып кетпей турат. Үшүгөндө эмне кылып жылынып жатышат? *** Кир десе үйгө кирбеген, Кир дегенди тилдеген. Карантиндин тартибин, Кулак көзгө илбеген. Керек болсо көчөдө, Беткап, колкап кийбеген. Эрке элди жөнгө салам деп, Милиция байкуш кантти экен? Вирустан баары качканда, Бекинип үйдө жатканда. Белин бууп, жеңин түрүнүп, Бел болуп бейтаптарга. Вирус менен кармашкан, Коркунуч менен арбашкан. Атасы качкан жолобой, Оорулууну жандашкан. Дарттууларга кам көрүп, Дары, жайын камдашкан, Дарыгерлер кантти экен? ⬇⬇⬇

13.05.2020
Кийинки жылдары жолдорду кеңейткен, үй-жай курган, эстелик тургузган, жол кырсыктарын алдын алган болумуш этип бак-дарактарды сөөк өчтү душманыбыздан бетер кыркып кыра баштадык. Бакты кыюу менен бактыны кыюу окшош болорун билгенибизде го, аттиң... НК #photo_by_me

27.03.2020
ЖАКШЫЛЫКТЫН ЖЫШААНЫ #Жакшы_кабар - бүгүн асман чайыттай ачык. Мунун кандай жакшылыгы бар дейсизби? Биринчиден, вирустун эң сонун дарысы, акесин таанытар дезинфекциясы болгон күн сонун тийди, буюрса. Экинчиден, күн менен булут - азыркы акыбалдын символикалык каармандары. Эстесеңиз, мурдагы күндөрү кара булут, кечээ ала булут каптаган. Бүгүн болсо булут такыр көрүнбөйт. Муну жакшылыктын белгиси деп билелик. Кудайдан болуп, булут бир ордунда узак калбай каалгып өтүп кеткендей эле, тигил вирус да элибизден, жерибизден, дегеле адамзаттын башынан батыраак өтүп, алыс кетип, көздөн, ойдон биротоло кайым болот экен деп жоруйлук. Буюрса, башыбызга кара булут айланган кыйын учур артта калууда деп ишенелик. Кыргыздын бардык жакшылыктарды камтыган “Асманың ачык болсун” деген мааниси терең жана кенен ак батасы бар. Асманыбыз ачыла берсин! Булут менен кошо көкүрөктөн муң, кыжалатчылык таркап, күн менен бирге кабак-кашыбыз, маанайыбыз жадырасын. Чайыттай асман сыяктуу жолубуз, көңүлүбүз ачылсын. Ошондой эле, ушул сыноону өз башыбызга чакырган пенделик айып-күнөөлөрүбүздү айра таанып, тообо келтирүүгө, кадырын билбей колдон чыгара жаздаган Жараткандын чексиз берекеттери үчүн шүгүр айтууга көзүбүз жана көкүрөгүбүз ачылсын. Соода, бизнес, алакалар азайып, өлкөбүздүн жону жукарып турганда, муктаждарга, оорулууларга жардам берүүгө байлардын колу ачылсын. Бири-бирибизге жакшылык тилеп, оору-сыркоодон, кырсык-балакеттен калкыбызды калкала деп Жаратканга жалбаруу үчүн алаканыбыз ачылсын. *** Кудайга шүгүр, кечээ да “жаңысы табылды” деген кабар болгон жок. Кара булут таркап баратат. Жараткан, өмүрүн тобокелге салып, күн-түн дебей кызматыбызды өтөп жаткан дарыгерлерибизге дарман бер! Күч түзүмдөрүбүзгө күч-кубат ырооло! Азыркы замандын элдин эсендиги, адамзаттын амандыгы үчүн көкүрөгүн дзотко тоскону чуркаган Чолпонбайдай баатырлары ошолор. Жаратканым, элибиздин ынтымагын бекемдеп, мыйзамга карата сый-урматын арттыр. Мыйзамды сыйлоо – бул мамлекетти, демек, өзүбүздүн эбегейсиз эгемендик бактыбызды сыйлоо. Биз оңолсок – абал оңолот, аалам жана заман оңолот! Буюрса, бул күндөр да өтөт... Жумабыз маарек болсун. 27.03. 2020

09.05.2020
Чоң атам... Азыр ойлоп көрсөм кыргыз дөөлөтүнүн өзүнчө бир энциклопедиясы экен. Тарыхты, санжыраны, салтты, адепти, динди, мамилени, эң башкысы тоголок жетим чоңойгондуктан турмушту терең билчү. Ок жамгырдай жааган согуштан аман келгенине чексиз шүгүр. Беларусь фронтунда кыл чайнашкан майданга кирип эки жолу ок тийип, катуу жараат алган. Ошого байланыштуу мыйзам боюнча согуштан бошотулган экен. Бирок, “Улам арыз жазып суранып жатып кайрадан фронтко киргем” деп калчу жарыктык. Ошол бойдон согуш аяктаганча колунан куралын таштаган эмес. Бомбабы же гранатабы, айтор жарылып, денесине кирген темир чачырандылары өмүр бою кыйнады. Карылыктан улам арыктап, көк тамырлары көрүнүп калган колундагы бөлтөйгөн темир сыныгын мен да далай жолу кызыгып кармагам. Жаштыгында операция кылып алып коюу сунушу айтылса, эчтеме эмес деп көктүгүнө салып макул болбой койсо керек. Күн суукта кээде өзү айткандай “осколка сыздаткан" колун ушалап, кыйналганын билдирбөөгө тырышып, эрдин кымтып бир топко отурчу. Колунда чоңоюп, тарбиясын татып, жан дүйнөсүндөгү жана акылындагы ошончо кенчтен үлүш алып калганыбызга канымет. Чоң атам тууралуу бир аз гана “Ант” романында жаздым. Каармандын чоң атасынын прототиби өз чоң атам - АДИ АКНАЗАР уулу. Жаныңыз бейиште болсун, ылайым, менин каарманым жана баатырым. Бүгүн сиз жана сиздин замандаштар канын төгүп, жанын садага чаап жеткен жеңишти майрамдап отурабыз... Ушул мээнетиңерди актап, татыктуу урпак болсок экен! 9-май, 2020-жыл

04.10.2019
Сапардабыз. Жолдун бир жагы - ыйык Мекенибиз, экинчи жагы - кошуна өлкө болгон кыргыздын берекелүү кыйырындабыз. Кичи пейил, жумшак мүнөз, эмгекчил, ак жолтой, ар намыстуу элибиз - чек арадагы бекем чеп жана алтын дарбазабыз болуп турат. Жаштарынын илимге болгон талабы тим эле алоолонот. Ар жолу жүрөк жылып, көңүл эрип кайтам бул кутман жайдан... Бар бол, байманалуу Баткеним... #Баткен #Рабат #Чоң_Талаа #Карабак #Карабулак

29.10.2019
Белгилүү актер Азиз Мурадиллаев менен Нарында болдук.Азиз өнөрүн тартуулап, ырларды көркөм окуп, көрүүчүлөрдүн суроолоруна жооп берди. Өз актерубуздун буга чейин атын, өңүн, каармандарын таанысак, эми жан дүйнөсүн аңтарып көрдүк. Азиздин “Айыкпайт деген оору айыгып кеткени таң калыштуу. Элдин батасы укмуш болот экен” деген маанидеги пикири мага аябай таасир этти. Жараткан ар бирибизге элдин батасын насип кылсын. Иш-чара өтө мыкты деңгээлде өттү. Ракмат, Нарын жаштары. Ракмат, Бакай менен Табылды баштаган китепкөйлөр... #китепкөй_өлкө #Өзүңдү_тааны

26.10.2019
Казань... Жүрөгүмдө куш канатынын алдындай жылуулукка айланып уюп калды. Татар бир боорлор абдан сонун тосуп алышты. Музейлерин, эс алуу борборлорун, тарыхый жайларын, заманбап маданий мекемелерин көрсөтүштү. Жаштар министри Фаттахов Дамирь Ильдусович болсо убагында азыркы Украин лидери Зеленский менен бирге кадимки Масляковдун КВН таймашына чыгып жүргөн атактуу жигит экен. Тааныштык, баарлаштык, пикир алыштык. Айдоочусу менен жардамчысын мен Казандан кайткыча карамагыма табыштап берди. “Мы своих гостей без внимания не можем оставить” дейт жылмая. Меймандоспуз деп мактанабыз, бирок, татарлар бул жагынан бизге да өрнөк болчудай. Дүйнөлүк универсиаданы, футбол чемпионатынын беттештерин ж.б. биринчиликтерди өткөзө берип конок күтүп, кадырлаганды ушунчалык үйрөнүшүптүр. Кыргыз мигранттарына жолугуп, “Мекендештерим кечки тамакка чакырып жатат. Анан өздөрү таштап коюшат экен” деп араң кетирдим министрдин жардамчысы Раиль менен айдоочуну. Болбосо, мейманканага жеткирмейин канча саат болсо да кызматыңды кылып жүрө берчүдөй. Бут менен кошо кут кирип, Казань таанылгыстай өсүптүр, өзгөрүптүр. 2005-жылы барганымда укмуш көрүнгөн, азыр андан да ачылыптыр, чырайына чыгыптыр. Тазалыгын, жашылдыгын, бейпилдигин жана сулуулугун айт. Кыйырсыз түзөңдө этек-жеңи жайыла кериле кеңирсийт тим эле. Азырынча, Орусияда Казанга теңдеш кооз, жанга жагымдуу шаарды көрө элекмин. Тамактары да биздикине окшош: адал, даамдуу, берекелүү. Жылкынын этин жакшы көрүп жешет экен... Кыргыз диаспорасы менен жолуктук. Ала-Тоонун эпкинин аябай сагынышкан белем, Instagram аркылуу келгенимди жаза койсом, топтоло калып чакырышты. Сагынычтарды жазыштык. Ошол жерде кыргыз бөбөктөрүн эне тилибизге акысыз үйрөткөн бир мугалим бар экен. Алыста ата салтын, эне наркын, улут тилин сактоо далалатын кылган ысык ыкласыңардан айланса болот, кандаштарым... Айтор, тили, теги, тамыры бир алыстагы татар туугандар менен жүздөшүп, дидарлашып, боор батырышып кайттык. Таасирлер Казанды бойлой аккан Волга дайрасындай учу-кыйырсыз, мол. Көп нерсени үйрөндүк, ийгиликтерге шыктандык... Бар бол, Казань. Бар болгула, татар бир туугандар... #Рахмат_Татарстан #Дамир_Ильдусович #Прекрасный_Казань #Спасибо_Раиль

15.11.2019
Биздин Таласта мындан 750 жыл илгери дүйнөнүн өзгөрүшүнө себеп болгон өтө зор окуя өткөн. Чыңгыз хандын империясын уратып, Алтын Ордо жана бир катар өлкөлөрдүн тарыхына чыйыр салган айтылуу Талас Курултайы уюшулган. Таразда ушул темада абдан чоң деңгээлде эл аралык илимий жыйын өттү. Тараз деген бул Талас деп бир казак илимпозу өз илимий баяндамасында айтты. Айтор, абдан сыймыктандым... Тарых мактануу үчүн эмес, жакшы жагын улантып, каталардан сабак алуу үчүн керек. Ошончо империяларды сырттан кол салгандар эмес, ички ырксыздык, ынтымаксыздык жок кылган экен. Жаратканым, бизге бекем ынтымак, биримдик бер. Өз ичибизде эле эмес кошуналар менен да... Бизге ынтымак керек... Рахмат, Тараз. Рахмат, баурлар... #Тараз

13.11.2019
Чоң энем ыраматылыкка аябай окшош экен. Тообо, эркелеткендей жылмая караганы, жумшак сүйлөп көңүлдү көтөргөнү, маегине ак бата аралашып аруу тилек айта сүйлөгөнү, ал тургай белинин бекчейгени, үнүнүн ыргагы куюп койгондой окшош экен. Бул энеге Кара-Койдо жолуктум. Балалыгында, байкуш, жетим инилери менен өлбөстүн күнүн көрүп чөптөрдүн тамырын казып жептир. Азыр өзүнөн көбөйүп, өнүп-өскөн байтеректей тамыры жайылган ак жолтой байбиче экен. Жетим жетилет деген ушул... Энем да жетим чоңоюптур. Жумшактыкка жана тоодой сабырга тарбиялаган жетимдик катаал устат болсо керек. Эч ким жетим болбосун. Жетимге жөлөк, жесирге желек болгондорго сансыз алкыштар... Энемди көргөндөй болдум. Бир жашымдан баштап баккан берекелүү жанга болгон сагынычымды бир аз болсо да жазгансыдым... Бул да ырыскы. Берген батасы кабыл болгой, бул чоң энемдин копиясынын... #ЧОҢ_ЭНЕМДИН көчүрмөсү

10.11.2019
ААЛАМГА ЖАҢЫ ДАРБАЗА Анкара... ТҮРКСОЙго зыярат кылдык. Уюмдун башкы катчысынын орун басары профессор Билал Чакыжы менен баарлаштык. Байыркы түрк адабиятын окуш үчүн арабча менен фарсчаны мыкты үйрөнгөн экен... Тил үйрөнөлү. Ар бир тил аркылуу ааламга жаңы дарбаза ачылат... Илим адамы менен маектешүү - чоң рахат. Илим да, акыл да жугат... #Түрксой

09.11.2019 \u0130nat\u00e7\u0131 Ke\u00e7i Cafe
Тарых да бал сыяктуу - канча узак турса, эскирсе, ошончолук баасы көтөрүлөт...Бул Сафранболу шаары - бузулбай сакталган, Түркияга мол киреше алып келип жаткан тарыхый шаар... Тарых - өтө кымбат продукт... #сафранболу #Түркия

22.10.2019
Авроранын короосу мынчалык кооз экенин билбептирмин. Коңур күз. Мөлтүр көлүм. Түркүн боёктуу бак-дарак. Акактай аба. Касиеттүү Ысык-Көлүм, кереметтүү мекеним. Кадырыңа жетсек экен... #ысык_көл #аврора

07.11.2019
ЭҢ КОРКУНУЧТУУ ТӨРТ КУРАЛ ЖЕ ООР ЖҮКТҮ АРТЫНГАН КААРМАНДАР Бул замандын эң кубаттуу төрт “согуштук куралы” бар: калем, фотоаппарат, микрофон жана камера. Булар менен досту каршылаш, жакынды алыс, шериктешти атаандаш кылып, сүйүүнү душмандыкка, биримдикти ыдыроого айлантып, чыкпас жерден өрт, көчпөс жерден көчкү, атылбас жерден жанар чыгарсаң болот. Антейин десең, араздашууну токтотуп, урушкандарды жараштырып, ажырымды аштоого, чөккөн көңүлдү көтөрүп, түшкөн духту бийиктетүүгө, карайган дилди аруулап, тарыган пейилди кеңейтүүгө, мокогон акылды курчутуп, жабыккан сезимди ачууга дары болор негизги жабдыктар да ушул төртөө деп билем: калем, фотоапарат, микрофон жана камера. Булардын акты кара, чынды төгүн, акыйкатты жалган, же тескерисинче жокту бар, чөлдү шаар, кумду кар көрсөтөр шумдук өзгөчөлүктөрү бар. Же жаңылышып жатамбы? Балким... Анткени, калем да, фотоаппарат да, микрофон да, камера да, болгону - буюмдар. Пайдаланбасак көчөдө жаткан темир-тезектен, же желим пакет, бөтөлкөлөрдөн айырмасы канча. Демек, кеп аларды колдонгон адамда! Кандай ниетте кармаса, иштетсе, ал макулуктар ошол максатка кызмат кылып берет. Ошондуктан, ушул төртөө аркылуу ырыскысын таап, эл-журтка эмгегин арнап жаткан басма сөз, интернет басма, радио жана теле кызматкерлерине ир алды менен чың ден соолук тилейм. Анан, албетте, кесипкөйлүк жоопкерчилик каалайм. Антпесе, жөнөкөй кишиден айырмаланып аларды уккандар, көргөндөр жана окугандар огеле көп. Ошол көпчүлүктүн адашуусуна эмес чындыкты көрүүсүнө жана билүүсүнө, баштарынын айлануусуна эмес, түпөйүл суроолоруна туура жооп табуусуна себеп болуу - мүмкүн, бул кесиптин башкы миссиясыдыр. Сиздер болгонду гана чагылтпастан, көбүнесе, саясаттын агымын бурууга, нугун өзгөртүүгө, өтө олуттуу чечимдердин кабыл алынышына себепкерсиздер. Артынган жүгүңүздөр аябай оор. Ошол жүктүн эсеп-кысабын алчу абийириңиздер ар дайым айрандай ак, булактай тунук болсун. Калемгерлер жана теле, радио жане интернет оболорунун каармандары, менин #ЖУРНАЛИСТ ДОСТОРУМ, кайсыл бир деңгээлде кесиптештерим! Баарыңыздарды кесиптик майрамыңыздар менен чын дилден куттуктайм. Ар бириңиздерге ийгилик, оомат, береке жана үй-бүлөлүк бакыт тилейм! Урматтоо менен, Нуржигит

20.10.2019
ЖАЗЫЛГАН КУСАЛЫК Москвада айылдаш туугандарыма жолуктум. Аяш энем, аксакал агалар, ага-эжелерим, кошуналарым, классташтарым, досторум, ини-карындаштарым, жээн-таякелерим, ал тургай мен айылдан кеткен соң туулган улан-кыздар бир ресторанда топтолуп, дасторкон жайып жаркырап-жайнап тосуп алышты. Айрымдарын көрбөгөнүмө дээрлик чейрек кылым болуптур. Алардын жылмайыңкы жүздөрүнөн туулуп өскөн өрөөнүмдүн көркөм элесин, эргиткен эпкинин, жыпар желаргысын туюп, сезип, ушунчалык толкундана кубандым. Тууганды көрүү – тагдырыңа жана тамырыңа кылчаюу, үңүлүү белем, айтор алар аркылуу мезгил мерчеминин алкагынан аттап, тээ айылдагы бактылуу балалыгыма, таттуу күндөрүмө, сезимдериме саякаттап кайттым. Баарыбыз бир чөлкөмдө жашоо кечирген алыскы жылдары бир кезде башка улуу өлкөнүн борбор калаасында дидарлашабыз деп бирибиз да ойлобосок, боолгобосок керек. Тагдырдын сырдуулугу ушунда тура... Колдо бар алтындын баркы жок болуп, бир абадан кере дем алып, бир булактын суусун ичкен замандарда жакындарымдын мынчалык жакын экененин таптакыр түшүнбөптүрмүн. Жакындын жакындыгын билиш үчүн алыстарга кетүү керек окшойт, айтор, ал жерде кезиккен ар бир инсан өз боорумдай, өз карегимдей сезилди. Аманчылыкта кайрадан ырысташ, табакташ кылган Жаратканга чексиз шүгүрлөр болсун. Ырыскың кенен, өмүрүң узун, дениң сак болушу үчүн туугандыкты бекемде деген улуу накыл бар го. Ушундай жагымдуу жүздөшүүнү демилгелеген, уюштургандардын баарына чын ыкластан ыраазымын. Москвада мусапыр абалда аябай жүрөгүм жылыды. Ошол – силерге берген ак батам, аруу тилегим болсун. Бар болгула, боордошторум. Ыйманда жашап, ырыскы берекесин тапкыла... Жаратканым жар болуп, колдой берсин... #Москва #Боордоштор