31.05.2020
Шар аккан суудай, жолумду издеп, шашып агам. Урунам, согулам, бирок токтобойм. Токтодуң дегиче эле сазга айланасың. Безилдеп, күндөр алмашкан сайын жаңылык издейм. Маалымат мн толуктайм. Ачылыш жасайм. Өз дүйнөмдү аңтарам. Тааныган сайын жашоо жеңилдеп, анын мааниси чыгып, өңү ачыла түшөт. Отчет берем. Анализдейм кадамымды. Өткөн күн кандай сабак калтырды, учурда кандай сезим ыроолоп турат, алдыга кандай максат коем. Эркиндик, жан дүйнөнүн тынчтыгы, сүйүү. Үчөө эриш - аркак жашооңо орногондо бакыттын даамы келет. Көз каранды болбосоң, өз жашооңо ээлик кылсаң, чечимди өзүң чыгарып, кадамды ишеним мн таштай алсаң, эркиндик. Кыжалаттык жок болсо, санааң тынч болсо, болбогон ойдун олжосу болбосоң, тынчтыктын келгенин билдирет. Сүйүү эң таттуу сезими ушул. Аны өзүңдү сүйүүдөн баштап, айланага чачасың. Гармонияга, бакыттын балкыган демине жетиш үчүн көп нерсени үйрөнүп, анализдеп, мүдүрүлүп, кайра туруп, сабак алып, китеп окуп, өзүңдү изилдеп жүрүп жетесиң. Токтобойлу, достор. Шар аккан суудай шартылдап, жол жиреп, жолубузду таап өтөлү. #жөнэлеойлор

22.10.2019
Балээнин баары ушул көздөрдө жатат да эй! Көздөр ушинтип калганда бир нерсенин ичинен чыкканы турат дей бергиле! 😜😂

31.01.2020
Кыштын чилдесинде жылаңач калып калгандай жан дүйнө кылч - кылч титиреп, тиш тишке тийбей, бүрүшүп, карманаарга тал , жөлөнөөргө зоо таппай, элеңдеп, коркуп, каякты көздөй бут шилтесем, аңга аңтарылып түшпөйм деп турган кезим эле. Үч жыл....жан дүйнөмдү теңтерип, көзүмдү умачтай ачып, жоголуп кеткен "Менимди" жетелеп келип карматкан, кайрат берип, күчтөнтүп, тыңыткан үч жыл...чындыгыман адашыыып жүрө берген экенмин. Таттуу уйкуда болгон жолду да басыш керек болчу тура тагдырымда. Бирок таттуу болду. Ойгонгум келбей, маңдайыма келген сындан баш тартып, башка дүйнөгө качкым келди. Чирендим. Тагдырыма ай балта көтөрүп алып каршы чыгып, аеосуз салгылашкым келди. Кабыл алыш кыйын болду. Ал бороон чапкын бүгүнкү көрө турчу кызыктуу күндөрүмдүн учун эле көргөзүп, көз ымдап койсо эмне? Анчалык чалкаман кетпейт белем? Ким билсин... үч жыл...жаратыңдын бүтөлүп, көз жашың тыйылып, күлгөндү, кечиргенди, кое бергенди, бакытты кабыл алганды, ал тургай, чын дилден сүйгөндү үйрөткөн үч жыл. Ачуусу көп, шыпаасы бар, дабаасы мол үч жыл. Үшүбөй калды жан дүйнөм... #жөнэлеойлор

06.03.2020
Күйөрмандарым мн жолуктум. Жөн эле ойлоруман бөлүштүм. Сүрөткө түштүм. Кол тамга тараттым. Жылуу пикириңиздер, сүйүүңүздөр үчүн алкыш!♥ @danek_books уюштурганыңыздар үчүн рахмат!

17.01.2020
Өзүмдү изилдегенди, казганды, киммин, эмнеге келдим, каякка кетем, максатым эмне айтор , акы - чүкүсүнө чейин териштиргенди жакшы көрөм. Психологиялык мүнөзүм, астрологиялык белгим, элдин сыны, жан дүйнөмдөгү өзүмө өзүм берген баа ж.б баардыгы кызык. Өзүңдү билбесең, жолуңду таппасаң, көздөгөнүң жок болсо, көкүрөгүң бош болсо, жашап не кажет? Бүгүн кызыктуу илим менен тааныштым. Мени болуп көрбөгөндөй таң калтырды. Тегимди билиш үчүн, жети атам ким сураш үчүн 22 жыл көрбөгөн атамды издеп таап барып сурадым. Мен эмес ал билбейт экен. Өкүндүм. Туулган жылымды, айымды, күнүмдү, атымды эсептеп эле мен жөнүндө бүт маалыматты колума карматкан нумерология илимине укмуш таң калдым! Төбө чачым тик турду. Көрсө, менин тегим жөнөкөй эмес, бардар, абдыракаты бийик, баардык улуттун өкүлү менен карым - катнашы бар, сый - урматка ээ, стратег, чечкиндүү, оозунда сөзү бар, сөздүн майын чыгара сүйлөгөн, көкүрөгүндө касиети бар, интуициясы күчтүү дүйнөнү көз менен эле эмес көкүрөк менен тыңшаган адамдардын тукуму экенмин. Мурунку бабаларымда кандай ката кетти, мен эмнени оңдошум керек, кийинкиге эмне калтырам, кулк - мүнөзүм кандай, эмнени жактырам, эмнеге чүйрүйөм, карьерам кандай болуш керек, эмнени жасайм турмушта, кандай көйгөй менен беттешишим мүмкүн, тамталаңдап бул дүйнөгө эмнеге келдим, кайсы максатты тутунушум керек, ой, жада калса, атым эмнени түшүндүрөт, ошого чейин айтып берди. Илим менен эсептеп, сандардын маанисин чыгарганда эле ушунча көп маалымат чыкканы, жөн эле чыкса эмне? Көңүлүмдүн көксөөсүнө чейин окуп, жан дүйнөмдө мен эле билген кубулуштарды сүрөттөгөнү таң калтырды. "Карма" , "Бумеранг" түшүнүктөрүнө терең сүңгүдүм. Кадимкидей көп суроого жооп таап, жыргап калбадымбы! Тегим жашаган Кара талаага барып, сүрүштүрүп, аталарымдын баскан изи мн таанышып келсем, айткандарын тастыктап, уруумду, бабамды билип келбесем болбойт. Өзүмдү казуудагы эң чоң кадам бүгүн болду. Өзүңдү таанып, дүйнөңдү жаңыртып, оңдоп, түздөгөндөн артыгы барбы? @numerolog_marishagold эмнеге бизде бул илим кенен таралган эмес? Ата - бабаңдын кайсы катасын оңдогону келгениңди билсең, жашоо жеңил болмок да ээ? Илими жок, караңгы дүйнө бизди кандай гана ишке түртөт? #жөнэлеойлор

20.11.2019
Ар бир жазган постум, кеңешим, өзүм акылдуу болуп кетип анан акыл үйрөтүш үчүн жазылбайт! Назиранын Назирага болгон каты! Аңдасын, көрсүн, баамдасын деген тилек. Өзүңдү өзүң үйрөтүп, өзүңдү өзүң жасап, өзүңдү өзүң өстүрүп жүрүп отурасың! Ар бир жан дүйнөмдүн чыңырыгы, жандалбастаганы, жан урганы жазылат. Оозуңдан чыккан ар бир сөз дайым эле акылыңдын түбүнө жата калбайт. Мыкты кагыш үчүн бир нече жолу балка мн урган сыңары, кайталай - кайталай мээге киргизебиз! Сөздөрүмдөн өзүңөрдү таап, өзүмө айткан акылдан кеңеш таап атсаңыз, бактылуумун! Бул сүрөттөгү өзүмө болгон кеңеш: 1. Ар дайым өз жашооңдун кожоюну, ханышасы, ээси бол! 2. Кандай гана таажы кийбе, жупуну, жөнөкөй бол. Кейкеңдесең, башыңдагы таажыңдын кантип ыргып түшкөнүн байкабай каласың! #жөнэлеойлор

20.05.2020
))))) тим эле окшошуп отуруп алганыбызды кантели? Интервьюну монтаждап келип, көргөзүп аткандагы кербез. Кафе ызы - чуу. Чала - бучук чыккан үнүн уга албай убарабыз. )) Сонун съемка жасап келдик деп ичибизде кудуңдаган кубаныч бар. Маектин арты мн далай адамдын энергиясын, жан дүйнөсүн көрүүгө, аны элге көрсөтүүгө өбөлгө түзүлүп атат. Саясатчылар болобу, сахна адамдары болобу, сырттан билгеним менен жан дүйнөсүнө сүңгүп, жакындан эч кимисин тааныбаптырмын. Ар бир адамдын ааламын ача келсең эле бир чоң дүйнө жатат. "Жаман киши жок. Жөн гана жаман адаттары бар ". Жакшы айтылган кеп. Алманбет мырзаны сырттан карап "Менден бетер бапылдаган кандай неме?" дедим. Бирок кепке тартып, жан дүйнөсүн ача келгенде сонун адам чыкты. Чыныгы жүзүн көрсөттү. Бапырактап, шамалдай шуулдаган, куюн болгон байкенин ары жагында жөнөкөй, ата - эненини мээримине зар болуп өскөн, ар кыл жолу бар адам чыкты. Баарыбыз бетибизге башка адамды жамынып, жан дүйнөдөгү чыныгы жүзүбүздү жашырат экенбиз. Бет капты алып, дүйнөсүн сууруп чыгуу мага жакты. Чыныгы жүзүңөр кандай сулуу?! Аны эмнеге жашырабыз бирок? Экөөбүздүн сырдашуубузду ютубдан менин каналыман (Назира Айтбекова) көрүңүз: https://youtu.be/WuXqs9rhqf8

07.03.2020
"Кошунаны тандабай" сериалыбыздын 10 - сериясы ютуб каналыбызга чыкты. Пикирлериңизди күтөбүз! Келе жаткан майрамыңыздар!♥

18.12.2019
"Кийиз дүйнө" коомдук фондунун "Салттуу кийим жана заманбап жашоо аттуу таанытым иш - чарасы. #алыпбаруучу

08.03.2020
Аял деген ким ал? Менин элесимдеги чыныгы аял ал ажары ак таңдай сөгүлүп, акылы караңгыны жарык кылып төгүлүп турган, мээримге жуунтуп, сүйүүсүн сүртүп турган, мамыктай мамилеси жумшак, очокто от күйгөндөй жылуу, назиктикти гүлдөн талашкан, аруулугу тоо чокусунда жаткан мөңгүдөй, илбериңки, өзгөчө жан элестелет. Жараткан аялды жаратып атканда өзүндөгү толуп - ташкан мээрими мн сүйүүсүнөн белендеп кошуп, сулуулукту улуулук мн жууруп, көңүлүн салып, эргүүсүн берип жараткан сыяктуу. Намысын арттырып, күчүн толтуруп мырзаларды коргоосуна алсын, кастарлап жүрсүн, аярлап сүйсүн деген чыгар? Мен - аялмын! Эркелеп, эргүү мн жашаган! Ааламды кооздоп, гүлгө айлантуу менин каалоом. Майрамың менен, улуу зат - аял зат!♥ #жөнэлеойлор 📸 @djanjyldyza

22.01.2020
Шефтин студиясында коноктомун. Шефтин кезинде КТРКда бир катар рейтинги бийик, кызыктуу берүүлөрдү жасадык эле. Ооз көнүп калгандыкыбы, же мыкты жетекчи болгону үчүнбү азыр деле оозума "Шеф" сөзү илине берет. P.s. " @kubat_otorbaev деген агайдын инстаграм баракчасына катталгыла " деген жарнаманы чыгардырыш үчүн эле чакырыптыр! Долбоор жасатпай эле...)))))))))))

26.03.2020
Оюбуз өткөн чакта. Тээ артыңда качандыр калып калган элестериңди бирден барактап алып шыпшынып, бирде үшкүрүп, бирде жыргап, бирде сагынып, таптырбай кеткен эски күнүңдү камчылап алып өткөндүн өлкөсүндө адашы-ып жүрө бермей адатыбыз бар го? Кээде ой деген күлүк атыбызды чаптырып алып ойкуп бир кайкып, келечекке жүткүнүп, келе электе эле жетип барып, далай ишибизди бүтүрүп, шымаланып, чуркап, тердеп - кургап жүрө беребиз. Ойлорубуз бирде артта, бирде алдыга чаптырып адашып жүргөн кезде денебиз учур чакта максатсыз, супсак жашап жүргөн болот. Тамактын даамы, күнүңдүн кунары качып, бакытты мезгилден кубалаган бойдон жаштыгыбызды, өмүрүбүздү өткөрөбүз. Элестет өлүмгө кадам калган күнү карасаң эле жашоо ушунча таттуу. "Мурун эмнеге сезбедим экен? Атаганат, жок дегенде бир ууч убактым болгондо эмне?!" дээр белек бармакты тиштеп өкүнүп. Андайды элестеткенде денеңе майда бүртүкчөлөр чыгып, чыйрыга түшөсүң. Эсиңе келе калып, тирүү кениңе, жашап жатканыңа ушундай жыргайсың анан! Мынчалык Жаратканга жалынбаган чыгарсың. Шүгүр сөзүн айтканда жүрөгүң кошо сүйлөп жибергиси келет. Мен жашап атам дейсиң! Үй жыйнаганда да жыргап, ар бир кычыгын жууп, тамак жегенде тим эле тилиң ар бир даамын сезип, сезген сайын көзүң аңтарылып, ырахатка бөлөнүп, уулуңду жыттаганда мээримиң мн сүйүүң оргуштап, ичиңди кошо титиретип, китеп окуганда оюңду топтоп окуп, кино көргөндө жыргап көрүп жашап каласың. Жашашты билдик белек дейсиң анан? Тирүүлүккө эптеп тутунуп, акча кубалап, кырылып, жек көрүп, урушуп, бөлкө нанды бөлө качып жүрбөдүк белек дейсиң. Үймөктөп үйчүбүздү үйүп, көңүлүң толбой, көкүрөгүң ачка болуп жашадык. А толуш үчүн жөн гана азыркыңдан, учурдагыдан, майда нерседен ырахат гана алуу керек болчу экен! Бакытты кубалап, кандай гана ишти жасап, кайда гана жүрбөдүк....#жөнэлеойлор #бактылууадам #карантин #үйдөбол

20.02.2020
Жаныбар болсом, мышык болмок болушум керек. Мүнөзүбүз аябай окшош. Эрке анан тентектикти мышык экөөбүздөн эч ким талашпай эле койсун! Сылатыыыыып коюп, күнгө кактанып, магдыраааап жатсаң ээ? Бирок чычкан байкуш куурамак. ))))) Сиз кайсы жаныбарга окшотосуз өзүңүздү?

13.02.2020
Тоңдук @almazmotiev Агам мн жеңем экөө бүгүнкү менин конокторум. Сагынычтар тарап, сырдашып, жыргап атабыз. Көп жылдар үстү үстүнө үйүлгөн жеке жашоомдогу кырдаалдардан улам көп кишилер мн көрүшө элек экем. Өзүмө келип, үзүлгөндү улачу мезгил. ♥ @talisman.kg чоң рахмат силерге! Баары даамдуу болду! ♥ Тынч, аура таза, мечиттин жаны, азан үнү сонун жер экен. @talisman.kg

23.02.2020
Биринчи тикмечилер курсуна барды. Ал жакты да ийгиликтүү аяктап, сертификат алган. Белдемчи курсуна барып, саймачылыкты үйрөнүп, сертификат алды. Эми Данияр Деркембаев мырзанын ашпозчулук курсуна барып, бүгүн эларалык сертификат алып келди. Куттуктайм! Ким молодец? Апам молодец! Дагы кандай курска жазып салсам экен, ыя? Апалар, аталар, балдардын төрүндө отуруш керек экеееен деп, небереден кол бошобой, кызыгууңарды, жеке жашооңорду, хоббиңерди унутта калтырбагыла! Өзүңөрдү өнүктүргүлө, окугула! Кесиби мугалим, бирок тикмечилик, ашпозчулук апамдын хоббиси. Эми тил үйрөтүүгө жазат окшойм.

30.11.2019
"Кошунаны тандабайт" сериалыбыздын жаңы сериясын 1.1TV ютуб каналынан көрө аласыздар! Жоомарт мн Жаркынай жактыбы? @1.1studio @aktan_ryskeldiyev @koshuna_tv