23.04.2020
Жети жаштамын анда. Эртең мн үрүл таңда туруп, мектепке даярданабыз. Чачымды өрүп беришет үйдөгүлөр. Форма - фартугумду кийип, дептерлеримди салыштырат. "Ата - энем мени мектепке эмнеге ээрчип алат өзүм килейген кыз болсом? !" деп үйдөгүлөргө эки күндөн кийин уруксаат бербей койдум. Таң сөгүлө элек кезде үйдөн чыгам. Дамбада жашайм. Мектебиме чейин жөө бассам жарым саат - кырк мүнөттө жетем. "Дружба" деген сумкамды асынып алып, тепейип жөнөйм. "Ж" тамгасы орусча окулаарын кайдан билейин?! Кыргызча окуй коюп, үйдөгүлөрдүн кыраан каткырыгына калгам. "ЖУК ЖУЖИТ"тин баарын кыпкыргызча эле окучумун. "Дагы окуп койчу? " деп суранышат. Эмнеге каткырып, жыргап атышканын түшүнбөйм же? Кайра окуп берем. Ошол үрүл таң, жалгыз баскан жолдор дагы эле эсимде. " Бирөө жыга чаап кетет!" , "Сүйрөп кетет" деген түшүнүк жок болчу. Ал тургай "Ит каап алса эмне болот?" деп тынчсызданган болгон эмес. Иттерде деле ыйман бар окшойт! ))) Ошол таңдардагы башкалардан өзгөчөлөнгөн эң жарык, чоң жылдыз эстен кетпейт. Чолпон жылдыз экөөбүз тиктешебиз кечке. Көзүмдү жумуп алып Жараткан мн сүйлөшөм. "Мен деле ушундай чоооң жылдыз болсом ээ?"дейм. Башкаларга окшошкум келчү эмес. Эстеп алып, менин кыялым, каалоом, максатым ошондо эле калыптаныптыр деп таң калдым. Азыр да асманды карасам, балачагымдагы сырдашым өзгөлөрдөн өзгөчөлөнүп биринчи чыгыптыр. Жарыктыгын, сулуулугун айт! Көр тирилик мн алпурушуп жүрүп, унутта калган экенсиң го?! Мен чоңойдум. Ал ошол бойдон. Чыгармачылыгымдын эми гана башатында тургандай сезим келет. Балачагымда кыялдангандай мен дагы чоооң жылдыз болуп, бир күнү бадырайып тураармын ээ мекенимдин тарыхында? ♥ #жөнэлеойлор __________________________________________ Сүрөтүмдү телефондон колго тарткан @aigerimrabota2020 чоң рахмат! Колуңа береке! Ушинтип жасатып алсаңар болот.

26.05.2020
Атаандашууда өсүш жаралат дешет. "Көралбастык эмес атаандашуу болсун" дечүмүн, бирок атаандашып атканда деле арамдык, ичи тардык кошулуп кетет экен. Атаандашканда өзүң мн атаандашың керек экен. Мурункудан кийинки Назира аштыбы деген кыязда. Өзүңдү өзүң мн салыштыр. Адам өзүн өнүктүргөн сайын дагы бир тепкичке бийиктейт. Айрым учурда мурункунун кылык жоруктары кийинки үчүн күлкүлүү көрүнө баштайт. Анткени мурунку сен өсүп кеткен кийинки сендин алдында турат. Бийиктен караган көз караш башка болот. Өсүп атканыңда чоңоюп аткан балага көйнөгү батпай калган сыңары кадимкидей өзүн тегеректеп турган адамдар да кызыксыз боло баштайт. Алардын ар бир мүнөзү, кыялы - жоругу так, даана көрүнөт. Мурун ал сага идеалдуу болчу балким. Азыр өйдөгө чыккан, өскөн көз карашың мн карап алып, өзүңдү канчалык деңгээлде сыйлабаганың, ушундай мамилени өзүңө ыраа көрүп, тебелетип жүргөнүңдү көрүп, чыйрыга түшөсүң. Ар бир адам өз дезгээлине жараша, өзүнүн энергиясына тең адамдарды тегеректетет. Анткени аларды көңүлү, сөзү бир. Сен өскөндө мурункулар чак келбей калат. Сенин деңгээлиңдеги бийиктеген адамдар мн жолуга, достошо баштайсың. Байкаганым, дайым эле интеллектиси жогору адам бийик болбойт экен. Өсүү бул интеллект жактан эле эмес руханий, моралдык жактан өсүү эсептелерин баамдадым. Ушундай кванттык физиканы билет, бирок жашоонун физикасын, даанышмандыкты билбесе интеллектиси тыйынга татыбайт экен. Өзүңдү тааны, өзүңдү өстүр! Сазда жатсаң, демек бака бойдонсуң! Тегерегиңдеги адамдар жаман эмес. Кеп ошолордун арасында жүргөн өзүңдө. #жөнэлеойлор

08.04.2020
Балама кандай эне болсом жакмакмын дедим ичимден? Албетте, энеси болгонум үчүн эле болуп көрбөгөндөй жакшы көрөт дечи..бирок уулума эгер күзгү боло турган болсом, чыкыйган, үлгүлүү элес туруусу абзел дедим. Өз ден соолугун карабаган, бир күн оору, бир күн соо болгон Алымкан эне көңүлүн чөгөрөөрүн билем. Демек, өзүмө тың болуп, денимди сак кармоом кажет. Бактысыз болуп бышактап, өткөн кеткен адамдарды дагы эле сөгүп, ар бир бактысыздыгыма, чалынган жеримен эле күнөөлүү издей бере турган эне болсом, башында аямактыр балким, аягында сабыры түгөнмөк. Жээримек, жекире карамак. Баягы пластинкасын кайра койду деп сыйы түгөнмөк. Пластинка айынан эмес алсыздыгыма таарынмак. Бактылуу болуп, каткырып, шаңшып, баарына жакшылык тилеп, кечиримдүү боло алган эне кимге жакпасын?! Анткен сайын уулумдун демине дем кошулуп, бактысы артпайбы?! А эгер көзүн карап өмүр бою, үйрүлүп түшүп, жеке жашоомду, кыялымды жыйыштырып коюп, оозуна кашыктап тамак тыгып, кайда жүрдүң, эмне кылдың дей берсем, акыры буулукмак, думчукмак, жүдөмөк, эркиндигин эңсемек. Уулум мага түздөнө турган болсо эгер ал эркин куш болуп, бийик шаңшышы керек десем, канатты кенен керип, бийик учуум кажет! Тартиптүү, улууга урмат, кичүүгө ызаат кылып, адамгерчиликтин, адилеттин желегин алсын десем, демек өзүмдү ошого тарбиялоом керек! Сырттан карадым өзүмдү, балам! Канткенде сага жагам дедим. Күрп тоок болуп, канатыма ката берсем, болчудай эмес. Күкүк эне болуп, күйүткө таштап кетсем, эмнем энелик? Эң мыктысы бүркүт эне болоюн. Бийик учайын. Күчтүү болоюн. Учуру келгенде уядан чыгарып, көпкөк асманда, өз эркиндигиңде учканга көмөк болом! Не дедиң, балам? #жөнэлеойлор

13.11.2019
Муздак жерге денеңдин коюлуп жатканын эстеп ичиркене түшөсүң да, жаның учуп кеткен соң, денеңдин каякка жатканынын мааниси кандай деген ойго кептелесиң? Караңгылык коркутат. Өлүм - белгисиздик. Коркунуч ошол белгисиздикке бара жатканы үчүн чыгат эмеспи. Өлүмдү таткан соң, караңгылыктан кантип коркосуң дейм. Өлгөн соң адамдын кадырынын артканын көр! Тирүүсүндө эмнеге байкабадык дейбиз? Ар бир өнөрүн, талантын, мыкты сапатын айтып, боорубузду тырмап ыйлайбыз. Тирүүсүндө алар эмнеге көзгө урунбай, анчалык барктуу боло албады экен? Баарыбыздын көзүбүз көнүп, бири бирибизге көңүлүбүз тоюп калган үчүн болсо керек ээ? Башка жайга кеткенде келбээрин билип, сагынып, анан санай баштайбыз сапатын. Көндүм адат адамды жаманга көндүрүп, жакшыны көргөзбөй, алыс алып жүрүп отурат экен. Көндүм адат... Дене денеге көнгөндө кумар таркап, эрди - катын бири бирине бир тууган бп, элеп - желеп сезимдер кайым боло баштайт. Көңүл көңүлгө көнгөндө , толкундоо, апкаруу жоголуп, жакшысы катылып, жаманы чыгат. Анткени адам жарнамадай жакшы бойдон жүрө албайт. Эртели - кеч андан тажап, чыныгы жүзүбүз менен тааныштыра баштайбыз. Анан кайсы убакта мынчалык өзгөрдү деп айран таң калып, чалкабыздан кетебиз. Бул жашоого көнүп алып, жашоонун деле баркын качырдык. Өлүмгө аз калдың дегенде гана анын даамы чыгып, тамшанабыз. Балким билермандар бекеринен, - Ар бир күндү акыркы күндөй жаша! - дебеген чыгар? Өлүм, өмүрдүн кыскалыгы мээде турганда гана көксөп көрүнгөндү самабай, көмүркөбүздөн көр оокатка шыкалбай, көөдөндү көңүл кубантаарлык иш мн гана толтурууга ашыгат белек? Ким билсин? Өлүм, улуксуң сен! Сен бар үчүн өмүрдүн өңү чыгат! #жөнэлеойлор

27.02.2020
"Эрге тий" дегени жок экен. Ошон үчүн беймарал жүрө бергиле!)))))

22.01.2020
- Апа, карылар үйү деген эмне? Ал жакка барышым керекпи сөзсүз? - Өзүң бил, балам. Бирок, кароосуз калган ата - энелер сени көргөндө баласы келгендей сүйүнмөк. Укмуштуудай маанай бермексиң! - Анда барайын, ээ? Мандарин ала барам да. Бүгүн уулум толкунданып, сезимдери ичине батпай келиптир. - Апа, бардым. Чыңгыз Айтматовдун мугалими менен тааныштым. Ал 101 жашта экен! Элестетип атасыңбы?! Ата, апалар бизди көрүп абдан кубанышты. #Ариет #грамотеи #сапат

14.01.2020
Менден мынчалык баласаак эне чыгат деп ким ойлоптур? Бир тууганы жок жалгыз өскөнүмдөнбү, өзүмчүл болдум. Чочун бала - бакыра келип, оюнчугума тие турган болсо, акырын апасына көргөзбөй, чымчып алар элем. Айылга таятамдыкына барганда күзгүдөй зимилдете жыйнап койгон үйүмдү тайкемдин балдары чаң буттары мн тебелеп кеткендегини элестете бер! Ортого арачалап энем менен таятам түшөөр эле. Менден коркуп, ылдыйкы үйгө эч ким келбей калчу. Ыйлап аткан баласын "Назира келе жатат!" деп коркутушат. "Төрөгөндө көрөбүз!" дешчү. Азыр тим эле чаң жугузбай, уулумдун үстүндө үлпүлдөйм. Өзүм ачка калсам, мейли, уулум тойсун мыйзамы бар. "Өтө эле үйрүлүп түшкөн болбойт" дегенди көп окудум, көп уктум. Тизгиндейин өзүмдү деп чечтим акыркы убакта. "Материнский пут" сөзүн көп эле укчумун. Маани бербептирмин, же бергим келген жок. Айрым энелер сүйүүсү менен балдарын думуктуруп өлтүрүп алган учур болот экен. Эненин өтө эле ашыкча мээрими, сүйүүсү баланын бутуна жип болуп байланып, жашоодо арыш жасашына тоскоолдук кылат тура. "Балага ишеним көргөз. Кое бер. Жаратканга тапшырсаң, баары сонун болот!"деди бир жакшы киши. Апалар балага сарсанаа болуп, балекет ойлорду элестеткен сайын ошонун баарын тартып келе берет экен баласынын турмушуна. Коркуу күчтүү сезим болгондуктан корккондуңдун баары чындыкка айланат. Мен үйрүлгөн сайын алсыз, көлөкөдө өскөн какымдай эле үлбүрөп баратат. Кое бергенди, Жаратканга тапшырганды үйрөнүп баштадым. Эки алса деле, "Балам, эмне болуп атат. Эмне көйгөйүң бар?"-дейм көзүн карап. Ал да камырабай, - Ой, Эйнштейн деле экиге окуган !"дейт. А. Некрасовдун "Материнский пут" китебин окуй баштадым. "Баардык жаныбарлар балдарын чоңойтоору менен уядан учурганга аракет кылат. Жалгыз эле адам баласы уядан учурбай, жанына алып калганга аракет кылат!"дейт. Туура да. "Мени бак. Мен сени чоңойтком. Сен мага карызсың!" деп эле минип алабыз. Алардын сезими мн эсептешкен аз. Баламды думуктурбай, эркиндик берейинчи. Балким мен берген эркиндиктен бийик учуп, шаңшып, тыңып кететтир. #жөнэлеойлор

10.01.2020
"Бу эрсиз катын", "Эрин эптей албай" дешип...бул сөздөр аябай "оскорбительный" сөз деп атышат го ээ кээ бири? Бирок бул нерсе катуу тийбейт деле экен мага таразама салып көрсөм. Бул факт да! Далил сөз. Эптей албаганым ырас. Эримдин жок экени да ырас. Ымдаганга эле ычкырымды бошото бербегеним үчүн "шерменде" , "жалап" ж.б. сөздөрү да катуу тийбейт экен. Кайып өтөт анткени мага тиешелүү эмес экенин билем. Үстүмө кандай жугунду куйсаң, таарынам ойлонуп атам. Менимче көкүрөгүндө жарасы, комплекси бар адам гана таарынбаса, өзүн сүйгөн, өзүн тааныган адам таарынбаса керек. Бизде баланы башка - көзгө койгулап, "Мээң жок", "Көк мээ", "Келесоо", "Акмак", "Карачы элдин баласын!" деп басынтып, ур - тепкиге алып, жан дүйнөсүнө "Эч кимсиң" деген түшүнүктү салып чоңойтушат. Азыркы заманбап жаштар эмес бирок улуу муунда көп кездештирсе болот. Ар бир кемчилиги тоодой көрүнүп, ичинен кемирип атып, кемсинтип атып, жарадар, жан дүйнөсүнөн майып адам пайда болот. Алар бирөөнү кемсинтип, сөгүп, сабап ырахат алат. Өзүн маанилүү сезет. Бирөөгө үстөмдүк кылуу менен үстүнө чыгат. Колу - буту мунжу адамды жаман көрбөйсүң, коомдон бөлүп салбайсың, же эмнеге мунжусуң деп таарынбайсың. Кандай болсо, ошондой кабыл аласың. Мээси жагынан мунжуну деле ошондой кабыл аласың да! Эмнеге мээң бөксө деп таарынмак белең? Демек, балачагындагы жаралары бар экен деп коесуң ичиңден. Болду. Зомбулук эмнеге көп дейсиң? Жан дүйнөсү жарадар адам көп анткени. Сезимдерин билдиргенден, оюн ачык айткандан корккону көп. Психологго барыш, өзүн тааныш уят нерсе деп түшүнгөнү көп. Баланы туура тарбиялаш керек дейсиңер. Баланын балекетин аласыңбы өзүңдү биринчи тарбиялап ал да! Өзүң тарбия көрбөсөң, балекетти көргөзөсүңбү? Жан дүйнөң тынч, бактылуу болсоң, бала автоматтык түрдө ошону жан дүйнөсүндө чагылдырып алат. Бала менен киндик аркылуу туташпыз анткени. Ошон үчүн каражандарым, баарыңарга сүйүү жөнөтүп жатам. Мен да өзүмдү оңдоонун жолундамын акыркы жылдары. Көз карашымды өзгөртүүдөмүн. Бирок өтөсүнө чыга элекмин. Айыктыра турчу менин дагы жараларым бар. Бирок, жок дегенде жек көргөндөргө сүйүү жөнөтүп, кечире билгенге кудуретим жетүүдө. Бул мени кубандырат! #жөнэлеойлор

31.03.2020
Ичимде ар кыл эмоция, ой кайнап атат. Жүрөгүмдө тынчтык, кубаныч, үмүт бар. Башыбызга түшкөндү Жараткандан келди деп билели. Демек, анын билгени бар. Жан дүйнөбүздү тазалап, көкүрөгүбүзгө кулак төшөлчү, майданы көрүп, бакыт издөө учуру. Байкасам, башыма келген ар бир оор кырдаал мени чыйралтып, курчутуп, оңдоп, ойлонтуп, катамды көргөзүп, жан дүйнөмдү өстүрүп, тазалаптыр. Ар бир оорум, кыйналган күндөрүм, бактылуулукка себепчи болуптур! Аларсыз өспөйт элем. Бүгүнкү көңүлүмдүн тынчтыгын таппайт элем. Адам баласына жалпы түшкөн апаат адам баласын тарбиялоого, тазартууга келди! Жаман - жакшы түшүнүгү мээбизде эле. Жашообуздун ар бир сүртүмү пайдабыз, жакшылыгыбыз үчүн экенин бир билсек...Кубанып атам, анткени өлкөбүзгө билим керек экени, медицина өнүгүшү керек экени, бийликти акчасына эмес акылына карап тандашыбыз керек экени көрсөтүлдү. Кубанганым, эркиндик сырттан эмес ичибизден экенин өзүм түшүндүм. Үйдөн чыга элегиме көп болду, бирок мынчалык эркиндик болгон эмес жан дүйнөдө. Эшикте эркин басып жүрүп, капастагыдай сезим эле. Таң калычтуу. Ушул убакта балдардын суициди болуп атат. Ал ата - энелер балдарга маани бериш керек экенин, балдарды тарбиялоодо көйгөй болуп атканын көрсөтүп жатат. Демек, ар бир ата - эне баладан мурун өзүн тарбиялоого тийиш. Эрди - катын бир үйгө батышпай жатканынын себеби, бири бирибзди тыңдоону, өзүбүздү тыңшоону үйрөнүүбүз керек экенин, мамиле курууда нөл экенибизди билдирип жатат. Түрлөнтүп, ар бир шеринеге кийген көйнөк эмес көңүл маанилүү , үйүп жыйнаган сырткы байлыгың эмес , ички жан дүйнө байлыгы алдыга оозуп чыкты. Сүйүнүп атам. Анткени, көз көрбөгөндү көңүл көрө баштадыбы, бейм. Жаратылыш мынча сулуу көрүнүп, көңүл жаратылышты эңсеп турат. Уңгубуз сүйлөп, касиетке сүйрөп турат. #жөнэлеойло

04.01.2020
#istanbul #алгачкысаякат #ариет Саякаттоо - биздин кыялыбыз. Уулум чет жакты көрүп, көңүлү, ой - жүгүртүүсү өсүүсү керек. Буюрса, эмдиги саякатта үчөөбүз болобуз деп ишенем.

18.02.2020
Чет жакка чыгуу, саякаттоо адамды эс алдырат. Оюңду топтоп, алаксып, көз карашты өстүрүп, жашооңо башка багыттан караганга мүмкүнчүлүк пайда болот. Акча тапсак эле эмнегедир үй алып, унаанын мыктысын карап, кийим - кечек болоор болбос нерсеге жумшайбыз. Менин акчам билимге, саякатка кетишин каалайм. Жаңы даам, жаңы элес, жаңы сезимдерди ооз тийип, таанып, билип, үйрөнүп жашагандан артыгы барбы? Душман көзүнө деп заңгыраган үйлөрдү салып атып эле өмүрүң, ден соолугуң кетет ээ бизде. Тытынып, жыртыгыбызды бүтөш үчүн жашайбыз го. Ал деле бүтөлсүн, сонун шартта жаша албетте, бирок, андан сонуну болсун деп ач көздүккө алдырып жиберип эле көп жакшы нерседен кур калабыз го. Напсиңди тыйыш кымбат окшойт адамга. Ден соолукту профилактика кылууга, билим алууга, саякаттоого, ырахатка, жан дүйнөгө сонун сезим калтырууга акча коротуш кк деп ойлойм. Сизчи? Көптөн бери саякаттай элекмин. Сагындым саякатты. Сүрөт Черногориядан тартылган.

29.10.2019
Аялдардын жан дүйнөсү мн тааныштырууну улантам. Бизди кулагы мн сүйөт дешет. Ошол чын! Кыз киши жылуу сөз уккандачы дароо эле кулак аркылуу кирип, жүрөккө барып тийет. Сөзүңөр "Сагындым", "Сүйөм", "Көргүм келип жатат", "Жытың сонун" ж.б.у.с жылуу сөздөрдү камтыганда ичибиздеги көпөлөктөр ойгонуп, мээдеги жана кандагы серотониндер, эндорфиндер ойгонуп, көз тунарып, жүрөктүн согушу ылдамданып, дене козголуп, көз коюлай түшөт. Бул ыкманы "бабниктер" жакшы билгени үчүн көп колдонот. Тилдин учунан гана сүйлөп, жан дүйнөсү аркылуу денесине кирүүгө аракет кылат. Эркектердин "бабник" сортунда жан дүйнө башкы максат эмес. Дене кумары - башкы максат. Мага окшош "карышкыр " келиндер жылуу сөз тилдин учунан же аркы көкүрөктөн чыгып атканын дароо аңдайт. Фальш ноталар кулакка тээп баштайт. Жаш, эч нерсени көрө элек кыздар андай "самопал" сөзгө тамтаңдап "мас " болуп калып, далай алданышат. Жан дүйнөдөн чыкканда гана жан дүйнөдөн орун алаарын эркегиң да, аялың билип алгыла. "Однолюб" деген да эркектин сорту болот. Көрүнгөн көйнөктү карап, көңүлү көрүнгөн жакта жүрбөйт андайдын. Көңүлүндө өмүр бою бирөө гана түнөйт. Менин оюмча "бабниктер" энесинин сүйүүсүн жетишээрлик деңгээлде ала албай калып, көрүнгөн аялдан сүйүү, жылуулук, мээрим издей бергендер жана өзүн сүйө албагандар. Өзүндө жок сүйүүнү башкага бере албай, кыйналгандар. Толук кандуу жетилген адам жетилген сүйүү мн сүйүп, өзүн да өңгөсүн да бактылуу кыла алгандар. Кыздардан деле көптү сүйгөндөр болот. Өзүн таппай, өзүнө эмне керек экенин билбей, кыйналып жүргөндөр болушу ыктымал. Өз адамын тапкан адам өзгөгө жабык болот. Көздөрү дале ойноп турса, жанындагы жары убактылуу дегенди билдирет. Ошооо. Иттей тажрыйбалуу өңдөнө берейин. #жөнэлеойлор ♥♥♥

05.01.2020
Түнкү экиге чейин күтөм. Байланышка чыксын деп. Жанталашып сурайм. Эмне тамак жедиңер, каяка бардыңар, жактыбы, уулумдун көңүлү кандай ж.б. суроолдорду жаадырам. Сүрөттөрдү көрүп, эс алып калам анан. #Стамбул #саякат

12.02.2020
Менин кыялымдагы мектеп 1. Саат 10 до башталат сабак. Бала уктап, уйкусун кандырып баруусу керек. Түшкү 14.00 - 15.00 чейин болсо болот. 2. Ыңгайлуу форма кийинет. Жатып - туруп, оонаганга мүмкүн. Жерде сөзсүз палас, клем, диван, төшөк. Каалаганы оонасын. Жатып алып уксун.. 3. Сумка, китеп ташыбайт. Баардык окуу - куралдар мектепте. 4. Үй тапшырма жок. Бала мектептен стресс болгону аз келгенсип, үйдө да үй тапшырма аткара албай стресс. Өзү эле стресс болсо бир жөн. Ата - энеси кошо стресс. Болгон тапшырма жума сайын жаңы китеп окуп туруу кажет. 5. Мектепте психологдор для галочки эмес, кадимкидей ар бир баланын психологиясын жөндөп, көңүлүндөгү көйгөйүн чечип, Берард, Play attention методдору мн да иштешсе. 6. Баланы күнүмдүк оокаттарга үйрөтүү сабактары болсо мисалы. Мык кагуу, балка кармоо, камыр жууруу, кийим тигүү ж.б. айтор, ата - энеден бөлөк калган күнү бала өз жанын багып кете алганга даярдык болуусу керек. 7. Мотивация, жашоого үндөө сабактары болсо. Кадимки эле биз барып жүргөн тренингдер балдарга берилсе, балдар кыялданганды, максат койгонду, убакытты туура бөлүштүргөндү, эл мн тил табышканды үйрөнмөк. 8. Бизнес сабактары, же акчаны туура кармоо, туура коротуу сабактары өтө керек. Акчаны санаганды билген бала кор болбосо керек. 9. Заманга жараша заманбап сабактар маанилүү сабак катары кирсе. Маселен, робототехника, инженерия, механика, лего, програмирование... 10. Математика, логика, арифметика сабактары болгону туура жана пайдалуу. 11. Баардык сабактар компьютерге терүү аркылуу өтүп, калем, дептерлердин кажети жок деп эсептейм. Дептер жасайбыз деп далай бакты кыйдык болуш керек . Видео сабактар дагы көбүрөөк түшүнүктүрөөк, пайдалуураак болот. 12. Баланын мээсин өрчүтө турчу түрдүү ийримдер болуусу шарт. Азырынча мээге келгени ушул. Дагы эмнелерди кошот элек?

08.04.2020
Анан аялдарыңардын ар бир меңин жаттап атасыңарбы?)))

21.04.2020
Тилин, оюн көзөмөлгө алып жашаш оорбу адам баласына? Арамданып, аңдып, тилдеп, каргап ... дейин десең пендебиз да. Жараткандын берген сыноосунан ар ким ар кандай өтөт. Тилин тарта албай убара болгону бар. Бирөө оюнун азабын чегет. Миң жолу жаңылабыз. Миң жолу оңдонобуз. Ката кыласың. Жаза басасың. Бетиң укмуш кызарат кылыгың үчүн. Анан экинчи кайталабай каласың. Бет кызарбаса, миң жолу кайталайсың, анан бир күнү ушундай чокуга жейсиң. Экинчи айранды үйлөп ичип каласың. Көрсө, ката, жаңылыштык сонун нерсе тура! Ошон үчүн азыр "Эмнеге ушундайбыз?" деп наалыбай калдым. Ушундай жол мн өтмөйүн оңдолуш кыйын болот. Бийик Адам болуш үчүн алгач паска түшүп көрүү кажет окшойт! Бала деле баарын оозуна салып, даамдап, жыттап, жыгылып, күйүп, чекесин жарып көрүп анан үйрөнөт да. Балага "Чайнек ысык. Күйүп каласың!" деп миң кайтала. Күйүп көрмөйүн билбейт. Жон териден өткөрүү кажет экен. Бирөөнү ушакта. Аябай! Сөөгүнө жеткире. Ушактаган адамың мн жүз көрүшүп, анын жан дүйнөсүн билип, анын терезесинен баш бакканда гана ыңгайсыз абалга түшкөндө гана бирөөнү билип - билбей сүйлөгөн кандай жаман экенин билесиң. Бирөөнү уруп көр. Кийин өзүң таяк жегенде гана кандай этиң ооруурун түшүнөсүң! Бирөөнүн ырыскысын жеп көр. Кудай кустурганда гана экинчи башканын ырыскысна көз артпай каласың. Текебер бол. Тепкиде калганда гана шүгүрчүлүктү үйрөнөсүң. Төбөгө жемейин, өзүбүз эле акылдуу болуп, айттырбай, этекке чаптырбай билгидей адатыбыз жок өңдөнөт адам баласынын. Кылгылыкты кылып, кыл жип мн бууп анан кыйындыкка өтөбүз. Ошон үчүн пенделиктин кылыктарына наалыбай, кейибей, кепчибей, өзүбүздү ак карга сезбей эле сырттан абай салып, башканынбы, өңүбүздүнбү жаңылыштыктардан жакшысын алып, сабак кылып, үйрөнүүбүз кажет экен... #жөнэлеойлор