21.01.2020
Ар ким Жаратканга болгон сүйүүнү кандай болуп, кандай эреже менен сүйүүлүшүн таңуулайт. "Жок, туура эмес сүйүп атасың! Коркуп сүй!"дейт бирөө. Бирөө " Жооок, Кудайды ушинтип да сүймөк беле? Динге кирип алып сүй!" -дейт. - Жаратканды сүйүүнүн да эрежеси болчу беле?- дейм мен. Баары чалкасынан кетет. Жайына койсоң, ыкласым менен сүйүп атканымды алып барып, таш бараңга алгысы бар. Мен силерди " апаңды минтип, атаңды тигинтип, балаңды моминтип сүй" деп үйрөтүп жатканымды элестет! Канчалык деңгээлде туура болмок? Акылга сыйа турчу нерсеби?? Ал нерсе сенин жана жакындарыңдын арасында көрүнбөгөн, назик, өзгөчө, силерге гана тийиштүү нерсе. Ага аралашканга акым да, укугум да, каалоом да жок. Ар ким өз деңгээлине, алына, көңүлүнө жараша сүйөт. Анда Жараткан экөөбүздүн сүйүүбүзгө эмнеге киришкенге укук беришим керек??? Мен аны өз чабытымда сүйөм. Мен андан корккум келбейт. Коркунуч мен үчүн пайдалуу, сонун, жагымдуу сезим эмес. Сүйүү мен үчүн сонун сезим. Корккондун ордуна сүйүү сезимин тандоо - менин акым. Динге да ар ким урмат көрсөтүп, ишеними терең орноп, көзү жеткен соң гана барып, түбөлүк жол кылып тандап алуусу кажет. Бул нерсе өз каалоосу, ниети, урматы менен тандалат. Таңууланып, тозок, акырет менен коркутуп киргизген адам динге кызмат кылбайт. Эл көзүнө гана кызматта болот. Көз көрүнө таңууланган нерсе иренжитүүнү пайда кылат. Демек, таңуулап жаткан адам - дин душманы. Өзүң ушундай такыба адам бол. Жүрүм - турумуң суктанаарлык болсун, таза жүр. Адамгерчилигиң болсун. Сага суктанган адам сенин кадамыңды кайталагысы келет! Сени ээрчийт. Элге көрүнүп, эл "укмуш экен деп ойлоп калсын деп шоу жасоонун кажети жок. Ал купуя сени менен Жаратканды ортосунда гана болуусу кажет. Элге эмес Жаратканга тастыкта. А Жараткан тастыктооңду да каалабайт. Көрөт ал. Эң оболу адам болушуң керек экенин түшүндүм. Жүрөгүңдү таза тут. Өзүң таза кезде баарын бирдей сүйөсүң. Жараткандын жараткан адамын динине карап, түндүк - түштүк, улуу - кичүү, эркек - аял ж.б деп бөлбөйсүң. Кандай жаралса, ошондой кабыл алып, сүйөсүң. Келбетке, кадырына карабай адамдын адам экенин эле карап, жүрөгүн тыңшап сүйгөн кандай сонун! #жөнэлеойлор

29.09.2019
Энем сөөктү таза мүлжүсөң, эриң сулуу болот десе, тим эле мүлжүйт элем болгон тишиме салып, итке эч нерсе калтырбай. Илгери кесир болбосун деп эле бирөө тамаша ирээтинде деп койсо керек да. Аны ким билсин? Бирок, кыздар, эркектин сулуулугу сырткы дүйнөсүндө эмес экен. Эркектин сулуулугу анын эр жүрөгүндө, тайманбастыгында, ыйманында, марттыгында, маданияттулугунда, курчтугунда, тыңдыгында, табышкерлигинде, билиминде, эмгекчилдигинде, сыйында, камкордугунда экен! Жүрөгүнүн сулуулугу жүзүнө чыга келет. Эркектин колун кармаганда эркек экени билинип турсун. Салмактуу, орундуу, кызыктуу сүйлөгөнү болсо, кулагың жыргайт. Далдайып, олбурлуу болуп, карааны сүрдүү турса, өзүңдү корголгондой сезесиң. Айбаты көрүнүп, сүрү билинип, жүрөгү курч турса, кандай гана кыз болбосун багындыраар. Улуулуктан сүйлөсө, ою бийик болсо, жүрөгү таза болсо дейсиң! Карааны тоодой, жүрөгү кең, курч жигиттер калгандыр! Илгери чептен эрдин күчү бек дээр эле. Алар фейсбукта, инстаграмда эмес чыныгы жашоодо жүрүшсө керек. Бул жакта болсо деле билинбей жүргөндүр. Чыныгы мырзалар, айбаттуулар, кайраттуулар, силер бар болгула! Саныңар көбөйсө экен! Көбөйсөңөр, эркектен күч талашкан кыздар назик жанга айланмак! Силерден талашмак эмес бийликти. Бийиктикке чыгарып, артыңарда жөлөк болоор эле! #жөнэлеойлор

08.03.2020
Поздравляем Всех женщин Мира с Праздником! Маанайды көтөрөлү!♥ Эң башкысы баламдын келечеги кең жана жаркын болсун! Кайсы гана өлкөнү жердебесин!

30.01.2020
Таенем айтты эле. "Кыйшактап көрүнгөндүн жүрөгүн ушалабай жөн жүр!" деп. Ал сөздүн мааниси терең үңүлө келсең. "Эркектин да жүрөгү назик болот. Үмүт бергиң келген адамга гана уруксаат бер. Жөнү жок жүрөгү мн ойноп, таштап кетпе. Убалы болот!" дегендик. Эмнегедир эркектердин жүрөгү таш. Сезими жок. Аялдан аял алмаштыра берет деген стереотип бекип калган. Бирок башыма жүн чыкканы эркектин чөйрөсүндө жүрө берип алардын азап чеккенин, көзүнүн тамчысын көрдүм. Биздей эле куурайт, сагынат, жол карайт, ооруйт. Сенден эмне каалап атканын тыңша тек гана. Эмне каалап атканын өзү эле мамилеси, аракети мн эле көргөзүп коет. "С" темасында эле сүйлөп, кармалап - сармалай берсе, өбүшүүгө ашыгып, ач карышкыр козуга көз салгандай караса, сенин жеке көйгөйүң, ичиңдеги жан дүйнөң, маанайың кызыктырбаса, демек, жөн эле убактылуу көңүл ачып тарап кетели дегендик. Сүйгөн адам жаныңда титиреп турат. Денеңе тиймек түгүл көзүңдү тике караштан айбыгат. Сенин кирпигиңдеги ар бир аба ырайына тынчсызданат. Жолугушуудан качуу үчүн эмес, жолгушууга шашуу үчүн миң шылтоо издейт. Сага маанилүү даталарды дайым эстеп жүрөт. Көңүлүңдү көтөрүү үчүн миң чаба издейт. Ууртуңа бүткөн бир жылмаюу үчүн дүйнөнү томкорот. Андан келген толкун сени кошо толкутуп өтөт. Ошону кантип көрбөй коюуга мүмкүн? Сени көзү менен чечинтип, жатып, кайра кийгизип койгон көз өзү эле көрүнүп турбайбы! Сокур эле көрбөй калбаса! Ошону көрбөй, сезбей, сүйүү мн алмаштырып алыптырмын деген болбогон кеп! Өзүң кошо каалап, эртең ал басып кеткенде ага шылтоону үйүштүн бир жолу. Андан келген таза сүйүү байкабасаң, же ага үмүт бергиң келбесе, өзүң сүйбөсөң, колуңду карматпа. Ачык айт. Чечишип ал. Көңүлчөөктүн көчүгү кургабайт болбо. Ал ысык ымала өрттөп аткан ашыктыктан гана пайда болуп, балкытышы керек. #жөнэлеойлор

18.10.2019
Аял эркекти тандайт экен көрсө. Жашоодо жуптар табышса, аялдын көңүлүнө жаккан үчүн жуп болушту дегендик. Жаныбарлар дүйнөсүндө деле ургаачы гана тандайт эркегин. Эркектери бийлеп, болгон өнөрүн көрсөтүп, тердеп - кургап , өзүн өзү жарнамалап атып араң өткөрөт го товарды! ) Анын сыңары адамдардын чөлкөмүндө деле "Ык - бык, сен чыкты" биз - аялдар айтат экембиз. ))) Байкасаңыз, көңүлү сүйбөгөн эркекти аял бир метр да жолотпой кууйт. Энергетикалык жактан жабык болот. Ал тарапты да карабайт. Каралса да, эркек катары каралбайт ал адам. Дос, тууган ж.б. болушу мүмкүн. Кээ бирөөлөр "Кантип эле эркек мн аял достук күтсүн? Экөө от мн бензин да чогуу жүргөндө! " дегендерди түк түшүнбөйм. Аял жабык болсо , достуктан сырткары мамилеге эмне балээ болсо да жан дүйнөсүнө да, денесине да кире албайт. Аял көңүлү түшкөн эркегин бат эле амал таап, имерип алат. Аялдын амалы кырк эшекке жүк эмеспи. Анын баары көрүнгүс, атайы эрежеге кирбеген, тил мн сүйлөнүп эмес дил мн чечилчү мыйзамдар. Акыл алдында туйганыбыз мн аңдап деле көрбөгөн көрүнүш. Мени курчагандын баары эркек десем эле таң калгандары көп. Кантип анан арасынан бирөө жакпасын деп. Анализ кылдым. Ой жүгүрттүм. Мээмде "Достук, "Тууган - урук", "Жөн эле тааныш", "Коллега", "Сүйүү жаратканга мүмкүн" ж.б. деген деген текчелер бар экен. "Достук" текчесине кирген адам эзели "Сүйүү" текчесине кире албасын так билем. Чалды - куйду аралашып, шакмары чыкпайт экен мээмдеги текчелердин. Ар биринин өз орду бар. Ошон үчүн чалкасынан кетип, эркек - аял дос болбойт дегендер, дос болот! Аял уруксаат бербесе, достуктун чегинен чыгарбаса, балекеттей эле дос болот! Аялдын денеси көрүнгөнгө эле ойгоно бербейт анткени. А баса," Муну байкаштырыш керек" деген да текче бар. Ал убакыттын өтүшү мн өз текчесин табат. #жөнэлеойлор

07.12.2019
Сөздүн астына маани катып сүйлөйт аял. Бирок аны эркек түшүнбөйт. Анткени ой жүгүртүүбүз ар башка. Аларга түптүз текст мн айтыш керек. Компьютер сындуу. Кандай программа киргизсең, ошону гана аткарат. Аялда андай нерсе жок. Бүгүн ойду каалайт. Эртең тоону. Мүнөт сайын сезимдери, эмоциялары өзгөрүп турат. Бири бирибиздин мүнөзүбүздү билип, ошондой бойдон кабыл алсак эле баары жакшы болгону турат. Ар бир адамдын ичинде башка жыныс жашайт. Инь - янь болот. Аялдардын айрымдарынын ичинде эркеги чоң болушу мүмкүн. Ичибизде эркек жашабаса, курчтук, тайманбастык ж.б мүнөздөрүбүз болмок эмес. Эркектин ичинде аялдыгы жок болсо, аеоо, мээрим, сүйүү сезими ойгонмок эмес. Жырткыч болмок. Инь янь тең салмакта болгондо баары жакшы болот. менин тең салмагымда чатак бар окшойт ушу. Анткени ичимдеги эркектигим көбүрөөк. Эмнеге аялдар мн дос боло албайм суроосунда терең ойлондум. Көрсө, алардын өйдө - ылдый эмоциясына чыдаш кыйын экен. Кыздардын бүтпөгөн, өзүнө тиешелүү темасы башталганда кыйналып кетет экенмин. Ушакташуу, көйнөк - бечкек, мода, бет боектору, кайын журт, күйөө, бала багуу, тамак жасоо темаларынан өлө качам. Мага философилык темалар, тарых, таанып билүү, эзотерика, психология, эркек - аял мамилесин изилдөө ж.б.темалар кызыктуу. Ичинде аялы чоңураак эркектин аялга тиешелүү мүнөздөрү, аракеттери болот. Ошооо, мага бир нерсе айтсаңар, прямым текстом айтсаңар кубанам жана ар бир сөзүмдүн алдынан башка ой издебегиле. Түз эле айтам. #жөнэлеойлор

19.03.2020
Күн сонун тийип, көк чөп жер жарып чыгып, Жаратылыш өз нугунда бейкапар жашоосун улантууда. Адамдар үйдөн чыкпай, суулар, аба тазаланып, жан - жаныбар тынч жашап жатса керек. " Тазалануу, аруулануу жүрүп жатат го "- деп койдум. Балким ушул нерсе абдан керек болчу жана балким боло турчу мындан да оор кырдаалдан, катастрофадан сактап жаткандыр. Жөн эле эч нерсе болбойт. Биз өмүрдүн баркын сездик. Өлүм мн маңдай - тескей келгенде гана өзүңдү тескеп, жашооңо кылдат көз чаптырасың. Болбосо, балдарыбыздын көкүрөгүн качан сезип, өрүктүн гүлдөшүнө качан көз салдык эле? Акчанын артынан чуркап, дүйнө топтоо мн алек эмес белек? Бир саамга токтоп, тегерекке көңүл коюп, өзүбүздү тыңшап турган маалыбыз. Нөшөр, бороон - чапкын күндүн баркын сездириш үчүн бар. Бүгүнкүдөй оор кырдаал жашоонун даамын берүүдө. Канча жашаарыбызды ким билсин? Бирок бүгүн, азыр жашаганга мүмкүнчүлүк бар. Жаша! #жөнэлеойлор P.s. Кечинде Германиядан сиңдим чалып, - Астматиктер анан иммунитети аздар биринчи кетет. Бекем кыс да үйдө жат,- деди эле. Кысып атам. Балким дүйнөгө пайдам тийип калаар.

13.10.2019
Тал көрсө деле, чал көрсө деле жаныңда жаткыра бергендер, көзүңөргө көрүнүп, кыбырагандын баары мн коюндаш боло бересиңерби? Киндиктен өйдө чыгалбай, "оорукчан" коом болуп баратабыз! Сөксөк деле "энеңди сс...", "шерменде", "ж.п", "шуркуя"... Эмнеге? Улуусу деле, кичүүсү деле төшөктөн башы чыга элек. Бул нормалдуу көрүнүш да менин дүйнөм анормалдуу болуп атабы? Ырлар, клипттер, кинолор ушундай мээни чайкап атабы? Көкүрөктөгү өйүгөн жараңды айтсаң эле " Бул кызга витамин керек ", "Эрге тийиш керек" ж.б.у.с. Бул спорт катары эмес, бул нерсе сезим, сүйүү катары каралышы керек. Каралбагандыгынан улам таштандылар көбөйүп баратабы дейсиң. Сезимдин да ыйыгы, туу чокусу калбай калды. Шалпактап көрүнгөн мн махабат ойноп атып, пол жууган тряпкага айланды сүйүүңөр. Сүйбөй жасалган ымыркай, төрөлгөндө да сүйүлбөйт. Аял ашыгып сүйгөн адамына гана өмүр мн өлүмдүн кыл көпүрөсүнөн өтүп, боор этинен жаратып тукум бергиси келет. Ошол тукумду кастарлап чоңойтот. Аялдын көңүлүн тапсаң, сүйүүсүн, жүрөгүн, мээримин, коюнунун ысыктыгын берет. Ыйыктык мн кир дүйнө аралашып, баш оту билинбеген оорукчан дүйнөгө, оорукчан коомго айландык! Кир дүйнөңөрдү өтүнүч, мага жалгаштырбагылачы? Күлгүн көз айнегим кийилүү. Күлкүңөр келип атса дагы күйүтү ырахаты бар, ыйык, аруу махабатка ишенген күлгүн дүйнөмдө жашайм дагы эле. #жөнэлеойлор

02.04.2020
Далай аял затынын нукура сырткы жүзү чыга баштайт жакында. Кирпиксиз, боексуз, тырмаксыз. Өзүңөрдү нукура келбет мн кабыл алуу, жасалма эмес абалыңызды сүйүү мүмкүнчүлүгү келди. Өзүнүн нукура сулуулугун кабыл алгысы келбегендер, өзүнө төмөн баа бергендер укмуш шыбанат, боенот, сулууланат, бетин боек мн өзгөртүүгө, башка кыз болууга аракет жасайт. " Өздүк жүзүм эч кимге жакпайт, мени кабыл албай коет, шылдыңдашат" деп коркот кыздар. Өзүн сүйгөн адам өзгөлөрдүн баасына муктаж эмес. Өзүн баалаган адам башкаларга жагам же жакпайм деп коркпойт. Өзүнө ишенимдүү адам жигитим, сүйгөнүм, жолдошум таштап кетет деп коркпойт жана жакын адамынын үстүндө титиребейт. Өзүнө ишенген, өзүн сүйгөн адамдан ошондой энергия чыгат. Өзүн сыйлабасты, өзгөлөр да сыйлабаарын унутпаңыз. Жаныбарлар сындуу эле инстинкттер сүйлөйт, энергияны сезет, рухуңдан маалымат алынат. Өзүн сүйүүгө өзүн жакшы алып жүрүү, жасануу, сулуулануу да кирет, бирок ал чекти билет жана кааласа боегу жок да жүрө алат. #жөнэлеойлор

10.05.2020
Студент кезимде бир жылга жакын катуу оорудум. Негизи байкасам, катуу стресс болгондо астма кармайт экен. Ооруканаларда жаттым. Эч нерсе жардам бербей койду. Анан Улуттук хит парадка кастингден өтүп кетип иштей баштадым. Эсиме келип карасааам эле, оорум такыр кармай элек экен. Бир жолу дааратканага жетпейм. Төрт аяктайм. Көпкөкмүн. Анда ингалятор дегенди билбейм. Анан эле бир концертке "Алып баруучу жок. Кел тез" деп калды. Эфирге чыга элек кезим. Төрт аяктап аткан мн сахнада шаңшып жүрөм го чиркиндики. Бул психологиялык гана оору экен. Когда надо туруп кетем го!))) Катуу тамашадан соң да, оорудум. Турбай калдым. Аба - дем жетпей, жөргөлөп басам. Ошол учурда Туркиянын бир фильмине тартылып калып, алаксып, айыгып кеттим. Дагы бир стрессте көлдү кыдырып түрк телевидениеси үчүн берүү тартып чыгып кетип, дагы айыктым. Үйдө жатып, бышылдап, бырылдай берип эс ооду. Балам: " Ты так много болеешь. Ты меня пугаешь!"дейт. Алаксыш керек болуп атат. Күнү - түнү жүргөн съемкага алып барып койсо мени азыр. Укмуш сонун образ берип туруп. Бат эле чыкыйа түшмөкмүн. Адамдын ооруларынын баары сарсанаадан, түйшүктөн, кыжаалаттыктан, кайгыдан чыгат экен. Адам сүйүктүү иши мн алек болгондо, иштин процессине терең сүңгүп кеткенде көп кайгы -кападан арылып, өзүн жакшы сезет экен. Китеп жазсамбы же? Карантиндин бүтчүдөй түрү жок. Андыктан ооруп атсаңар, ушундай алаксыта турган жумуш тапкыла. Бат эле айыгасыңар. Баардык оорунун психосоматикасы бар. #жөнэлеойлор

27.06.2020
Текебердик адамдын эң жаман сапатынын бири. Ошол чыкты дегиче жан дүйнөңдү, ааламыңды талкалады дегендик. Аны тереңиңе катып, ордуна адамгерчиликти чыгарууга аракет кылып, күрөшүп жашайсың. Биротоло жоготуш кыйын экен. Текеберлигим бүгүн бошонуп кетти. Бирөөнүн көңүлүн оорутуу - өз көңүлүңдү төпөштөө экен. Биз бир ааламбыз. Бир уйдун мүйүзү сынганда миң уйдуку зыркырайт дейт го. Биздин жаратылышта ар ким өз өзүнчө деген нерсе жок экен. Текебердик кылдым, мүнөзүмдү көргөздүм, өктөм сүйлөдүм, бирок көз жашымды тыйдырыш кыйын болуп атат. Адамдарга жакшылык жасоо, адамгерчиликтүү болуу мн мен өзүмдүн жан дүйнөмө гана салым кошоорумду түшүндүм. Тил - душман. Бири бирибизди сындап, жектеп, жек көрүү мн бийиктикке чыкпайбыз. Көкүрөктү гана кирдетебиз. Кечирим сурап келейин. Кыйнап ийди көкүрөк... #жөнэлеойлор

27.01.2020
Аэропорттон "Чоң кыз сиз каттоодон өтүптүрсүз" деп эле өткөрбөйт. Көрсө, менден мурун Назира Айтбекова деген кыз катталыптыр. Аз жерден калып кала жаздадым. Аэропортто мени кытай экен деп кооптуу көздөрү мн карап атышат. Кашайып жөтөлүм кете элек болчу. Күрсүлдөгөн сайын элдин жүрөгү түшүп атат десең!)))) Бир орус чуркап келип, - Вы из China? деп сурады эле мен да жөн турбай, - На Вас чихнуть? - десем күлдү. ))) P.s. сүрөттө "Кухня" сериалында Айнура эженин ролун аткарган актриса Жаңыл эже! Атайы учурашканы келиптир. Жыргадык. Даже бийледик өлө!)

08.10.2019
Жаш кезиңде курчтук болот экен. Кайсы жерден жаңылам, кайсы жерден жаза басам деген түшүнүк жок. Жашооңдун аңгыл - дөңгүлүнө карабай, чуркап жөнөйсүң! Урушаарга жоо таппай, урунаарга тоо таппай, алкынып - жулкунуп, толкундай боюңду жарга уруп турган кезиң болот. Жашоо акырын нокто салып , улам бир тескейин көрсөтүп, нөшөргө, шамаалга бышырып атып баш ийдирип, жоошутуп алат экен. Жаштыгыңда жалын бүркүп турасың! Көңүл чордонунда болгуң келип, назарын бурдуруунун жолундасың. Жаш өткөндө ар бир кадамың абайлап арыштайт. Мурункудай көзүң жумулуу чуркабай, эсептеп - чоттоп, жети жолудан өлчөп анан жасайсың. Баарынын назары эмес бир эле адамдын көңүлүнө муктажсың. Ошол адамдын жылуулугу, мээрими жетиштүү. Физикалык жактан чоңойуу жетишсиз, моралдык жактан чоңойуу кажет. Айрым адамдар жаштыгы артта калып калса деле калжактап турат. Алар моралдык жактан чоңое электер го дейм. Жумуштабы, достуктабы, көңүл иштериндеби, айтор дайым өзүнөн эки эсе жаш өнөктөштөрдү издейт. Анткени акылына, көз карашына, деңгээлине теңдейт. Айрымдары болот. Жаш туруп, жан дүйнөсү карылыкта, акылманда...алар дайым улууларды издеп жүрөт. Улуулар мн баарлашат. Өзү теңдүүлөр баладай көрүнө баштайт. Дегеним, физикалык жаш курак менен бирге жан дүйнөнүн курагы теңме тең жүрө бербейт экен. Кимиси бат жетилет, кимиси кеч дегендей...эмнеси болсо да, жашоонун сабагынан кечикпей, учурунда үйрөнүп, кичүү муунга үрөн сээп калалы. #жөнэлеойлор

08.05.2020
"Мени сүйөсүңбү?" дей беребиз. Кайра - кайра уккубуз келет анткени. Сезгибиз келет көз карашыңардан, аракетиңерден. Анан кээде түн бир оокумда ойгонуп алабыз. Биз мн кошо мээдеги таракандар ойгонот.. "...а балким" деп башталат укмуш окуялардын башы. Таракандар укмуштуудай окуяларды чубап, көркөмдөп берет. Ага ишенип алып ызырынабыз, кызганабыз, айлаңарды алты кетиребиз. Кызык жанбыз биз. Бат алданабыз. Билип, көрүп туруп эле бир жылмаюңарга, жакшы аракетиңерге жөн эле жетеленип кетебиз. Көңүлүбүздү тапканга көлдөлөң болуп жайылып алганыбызды кантейин?! #жөнэлеойлор Бабырабай, укташ керек эле...

17.05.2020
Бир адамды караганда энергиясынан эле кандай адам экенин байкоого мүмкүн. Энергиялык жактан эки адам төп келүүсү абдан маанилүү экен. Эркектин энергиясы чоң бирок аялдыкы кичинекей болуп калса, эркек кадимкидей жүдөө тартып баштайт жана өзүнүн энергиясына жакын аялдарды издейт. Аялдын энергиясы күчтүү болуп, эркектики алсыз болсо, кадимкидей эркек чүнчүйт . Бийлик дароо аялга өтөт. Бирок ошол эле чүнчүгөн эркек өзүнүн энергиясына жакын , өзүнөн алсызыраак аял алса, ал кадимкидей эркектигин көргөзүп, үнү өктөм чыгып, бийликти колго алат. Эркек катары ачылат. Энергиясы күчтүү аял андан дагы күчтүү эркекке жолуга турган болсо, мурункудай айбатын көргөзгөн жолборс болбойт. Мыйоолоп астейдил басып, мышык түгүл мыйга айланып, аял катары ажары ачыла түшөт. Ошон үчүн карама каршы жыныстагы адам мн турганда кадимкидей аны изилдөө инстинкти иштей баштайт. Башка аялдарды билбейм, бирок менин учурумда ошондой. Күчтүү энергия сезсем, кылыктанып, ичиңдеги кыз ойгонуп, кыр көргөзө баштайт экенмин. Алсыз бирөө турганын байкасам, "үхүхү " эмес "ахаха" деп чыгып күлкүлөр, күрөшүп ойноп, өзүмдүн эркек тарабым чыгып, аны дос кыла баштайм. Жайыма койсо, кыздарга деле чогуу барчудаймын. Муну илим жактан тастыктай элекмин бирок баамым ушундай болду. #жөнэлеойлор

16.01.2020
Көптөн көп күткөн күнүбүз да келди! Эмгегиңдин үзүрүн экрандан көрүп, каткырып отурган кандай керемет? Мага роль берип, ишеним көргөзгөн @suiun_otkeev досума рахмат. Көйнөгүм аябай жакты! @ameli_store_kg чоооң рахмат! Соооонун көйнөктүн түрү бар. Туркиядан келет. @meerim_mambetisaeva табитиң сонун! Дагы көп кызыктуу көйнөк күтөм сенден. ♥ @aigera__vizazh макияж аябай жакты.♥ Элдин баарынан комплимент алдым. Чач жасалга @aiperi_hairstylist @aitolkun_makeup_studio рахмааат! #кыялкэштер фильмин шаардын баардык кинотеатрларынан көрө аласыздар!