23.04.2020
Жети жаштамын анда. Эртең мн үрүл таңда туруп, мектепке даярданабыз. Чачымды өрүп беришет үйдөгүлөр. Форма - фартугумду кийип, дептерлеримди салыштырат. "Ата - энем мени мектепке эмнеге ээрчип алат өзүм килейген кыз болсом? !" деп үйдөгүлөргө эки күндөн кийин уруксаат бербей койдум. Таң сөгүлө элек кезде үйдөн чыгам. Дамбада жашайм. Мектебиме чейин жөө бассам жарым саат - кырк мүнөттө жетем. "Дружба" деген сумкамды асынып алып, тепейип жөнөйм. "Ж" тамгасы орусча окулаарын кайдан билейин?! Кыргызча окуй коюп, үйдөгүлөрдүн кыраан каткырыгына калгам. "ЖУК ЖУЖИТ"тин баарын кыпкыргызча эле окучумун. "Дагы окуп койчу? " деп суранышат. Эмнеге каткырып, жыргап атышканын түшүнбөйм же? Кайра окуп берем. Ошол үрүл таң, жалгыз баскан жолдор дагы эле эсимде. " Бирөө жыга чаап кетет!" , "Сүйрөп кетет" деген түшүнүк жок болчу. Ал тургай "Ит каап алса эмне болот?" деп тынчсызданган болгон эмес. Иттерде деле ыйман бар окшойт! ))) Ошол таңдардагы башкалардан өзгөчөлөнгөн эң жарык, чоң жылдыз эстен кетпейт. Чолпон жылдыз экөөбүз тиктешебиз кечке. Көзүмдү жумуп алып Жараткан мн сүйлөшөм. "Мен деле ушундай чоооң жылдыз болсом ээ?"дейм. Башкаларга окшошкум келчү эмес. Эстеп алып, менин кыялым, каалоом, максатым ошондо эле калыптаныптыр деп таң калдым. Азыр да асманды карасам, балачагымдагы сырдашым өзгөлөрдөн өзгөчөлөнүп биринчи чыгыптыр. Жарыктыгын, сулуулугун айт! Көр тирилик мн алпурушуп жүрүп, унутта калган экенсиң го?! Мен чоңойдум. Ал ошол бойдон. Чыгармачылыгымдын эми гана башатында тургандай сезим келет. Балачагымда кыялдангандай мен дагы чоооң жылдыз болуп, бир күнү бадырайып тураармын ээ мекенимдин тарыхында? ♥ #жөнэлеойлор __________________________________________ Сүрөтүмдү телефондон колго тарткан @aigerimrabota2020 чоң рахмат! Колуңа береке! Ушинтип жасатып алсаңар болот.

27.03.2020
Ушул асыл адамдардын, ушул бийик кесиптин кадырына эми жеттик ээ? Алар биздин көзгө көрүнүш үчүн сөзсүз эле адамдар өлүп, карантинге жабылып, чүмкөнүп, үйдөн чыкпай калышыбыз керек беле? Балдарыбыз үйдө болуп, сабак окутуу эмне экенин, мекендештерибиз ооруганда медиктердин көзүн карап, жалдырап жиберип жатабыз. Өмүр бою эле алар каражанын карч уруп келе жатат. Көрбөптүрбүз...Кыргызстандагы адамдардын билимин, медицинанын абалы кандай экенин көрдүк! Мен ойлойм, ушул апаат бүткөн соң, оорукана жабдыктарын жаңылап, мектептерди салып, билим жаатта күчтөндүрүп, алардын маянасын көтөрүп, көбүрөөк салым кошуп, көбүрөөк жөлөп - таяйбыз деп! Маяна өңгөсүн коюп ушулардыкы көбөйсө, билимдүү жаштарыбыз көбөйөт жана калктын саламаттыгы мыкты болот! А бул өнүгүү жолунда эң башкы факторлор! 2020 - жылы жаңы шайланчулар, биз сиздердин программаңыздарда ушул эки пунктту күтөбүз!

23.04.2020
"Бир каалооңду аткарам!" деген сыйкыр болсо ушул доорго кайрылып, жок дегенде бир күн жүрүп келмекмин. Ар биринин сырын чубап, интервью алмакмын. Эс тарткандан бери эңсегеним ушул. Бир укмуш "Легенда" доору өткөндөй сезим. Дөө - шаалардын баары ушул доорго кептелип калгандай туюлат. Сабира Күмүшалиевадай болгум келчү. Ал катышкан кинолорду оозум ачып, элирип көрөт элем. Кино жаатына , театрга болгон болуп көрбөгөндөй сүйүүм ойгонду алгач. Алардын сүрөтүн көргөндө, театрга киргенде кадимкидей демим токтоп калат. Ал тургай алар баскан жер да өзгөчө көрүнөт. Сугумду артып, алар жөнүндө баарын билгим келген кооз дүйнө бул. Сапаттуу, таланттуу адамдардын баары бир эле мезгилде жашап, дүңүнөн кетип калгандай туюлат. Азыркы доордун деле өз мыктылары бар, бирок аларды сезбей, туйбай келатабызбы деп коем. Урпактар бизди кандай муун деп атап, кандай баа берет болду экен?

27.03.2020
Арстан Алай, Чыпалак, Гүлзат, Даниель, ЖК депутаттары, спикери, ырчы - чоорчулар, Мен,Сиз ж.б.- баарыбыз бир организмбиз. Бөлүп кароого мүмкүн болбогон бир организм! Өзүбүздү кемчилигибиз мн кабыл алганды билели. Кыжырданып атсак эгер бүгүн, демек, өзүбүздү кабыл ала элекпиз дегендик. Өзүбүзгө болгон баанын төмөндүгү. Бирөөнү басынтуу аркылуу өзүбүздү көтөргүбүз келип атат дегендик. Аты эң көп аталган, төпөш жегендерди жаздым. Алардын кандай сонун сапаттары бар. Көргүбүз келбейт негедир. Кабыл алгыбыз да келбейт. Коомдон сырткары башка планетадан келип калгандай көрөбүз. Эй, биз - бирбиз! Булар - биз! Биз деген булар! Өзүбүздү өзүбүз жаакка чаап атабыз! Өзүбүздү ашатып "Келесоо" деп сөгүп атабыз. Өзүбүзгө келген акаарат бул! Өзүңдү өзүң төпөштөсөң эле өйдө чыгып кетмек белең?? Ошол аты аталгандын баары ичибизде, жан дүйнөбүздө жашайт. Жан дүйнөбүздөгүнү кабыл албаганыбыз үчүн кыжырданабыз, сөгөбүз, өлтүрүп койгубуз келет! Мен качан өзүмдү сүйүп баштаганда бирөөгө да жаман сөз арнагым келбей калат! Бирөөнү жек көргүм келбей калат! Бирөөнү басынткым келбей калат. "Какашка" көрсөм дагы анын туура, жакшы жагын издеп калам. Төпөштөп башканы, өзүңдү акылдуу көрсөтүп атсаң, сенде да мандем бар дегендик! Ошо. Ошону эле айтып коеюн дегем! #жөнэлеойлор Өзүбүздү аяй көрсөтө бербейли деген сүрөт!

23.04.2020
Бир жакшы эркектин уругунан 30% эле балага өтүшү ыктымал. Кеп жатында, кеп энеде! Эненин 70% гени өтөт балага. Бир жакшы эркек 10 начар аял алса, оноонон он башка начар тукум чыгат. Бир жакшы аял онду төрөсө, мыкты тукум чыгат. Ошон үчүн өпкөңөрдү көптүрүп, өзүңөрдүн жана уругуңардын баасын көтөрбөй эле койгула! Тээ илгертен мыкты ургаачы бааланып келген! Аялдар, өзүңөрдү тарбиялагыла, өстүргүлө, мыкты болгула, дениңерди чыңдагыла! Бааңар укмуш жогоруласын! #жөнэлеойлор ______________________________________________ Бир экс депутат эже бир жакшы эркек он аял алсын деген экен. Онду эмес бирөөнү эле тыңдап карасаңар, он күчтүү тукум берет.

07.05.2020
Көз карандысыз болуу - эң чоң эркиндик. Бирөөнүн сүйүүсүнөн, бирөөнүн мамилесинен, жакындарыңдан, ишиңден, акчадан эркин болуп жана аларга багынып бербөө. Кээде бактыңды, жакшы маанайыңды бир адамга, бир ишке байлап коесуң. Ал жазмайын, жылуу сөз айтмайын, же ишиң болмоюн маанайың да, бактың да жок. Малай болуу, сүйрөлүү, эрки жоктук накта ушул. Жаратмандыкты үйрөткөн мектеп болсо ээ? Ал жакта өзүңдү өзүң бактылуу кылуу, сүйүүгө чулгануу, жыргалчылыкты жаратуу, Жаратканды сезүү деген сабактар өтүлсө. Күндө эки алып, бурчка турсам да окумакмын. #жөнэлеойлор

27.03.2020
Даниель Ажиев - коомдун күзгүсү (зеркало!) ал. Коомдун арасында андай Даниелдер өтө көп! Бала чагында сүйүү көрбөгөн, төпөш жеп калган, басынып калган, көп нерсеге жетпей кордук көргөн бала чоңойгондо ушундай болуп калат. Комплекси мн чоңоет. "МЕН " деп анан төш кагып, ичиндеги мендигин элдин баарына көргөзүүнү каалайт. Өзүн эч киммин деп чоңойгон, "невидимка" ордуна койгон бала баарына көрүнгүсү келет." Мени кыйын бала экен" деп ойлошсун, "Мени көрүшсүн!Жогорку баа беришсин. Эсептешсин" дейт. Анткени аны эч ким көргөн эмес убагында, басынтышкан. Бөтөнү эмес өзүн өзү да көргөн эмес. Көпчүлүгүбүз эле ошондой чоңойгомбуз. Бирок ар бирибиздин формабыз ар кандай. Эмнеге дүнүйө чогултабыз? Машинабызды мактанабыз? Кредит алып душман көзүнө көрүнөбүз? Балдарды таштап коюп , жаныбызды тишибизге тагып алып, чуркап акча чогултабыз, эки этаж үйлөрдү курабыз? Өзүбүз үчүнбү? Анан аны "Эл көзүнө", "Душман көзүнө" "Эл эмне дейт" деп атайбыз! Демек, өзүбүз үчүн эмес эл үчүн турбайбы! Баарыбызда "Элге жагынуу", "Эл мен жөнүндө жакшы ойлонуп калсын" комплекси ар бирибизде жашайт! Андай эмеспи? Балким ичибиздегини тырмап койсо, андан өткөн жиндилигибизди көрсөтөттүрбүз? Карантинде жөн эле жатпай, анда - санда күзгүдөн каранып деле жаталы, туугандар. Асмандан түшсөк дагы! #жөнэлеойлор P.s. текстти түшүнүп окуңуздар. Баланы мактаган да сөккөн да жокмун. Баарыбыз ошо баладай эле комплекси бар, оорукчан адамбыз. Биз да эл эмне дейт деп жашайбыз. Кайрымдуулукту өзүнө болгон бааны көтөрүш үчүн жасады. Жакшыбы, жаманбы, ким үчүн жасаса да жасады.

26.03.2020
Оюбуз өткөн чакта. Тээ артыңда качандыр калып калган элестериңди бирден барактап алып шыпшынып, бирде үшкүрүп, бирде жыргап, бирде сагынып, таптырбай кеткен эски күнүңдү камчылап алып өткөндүн өлкөсүндө адашы-ып жүрө бермей адатыбыз бар го? Кээде ой деген күлүк атыбызды чаптырып алып ойкуп бир кайкып, келечекке жүткүнүп, келе электе эле жетип барып, далай ишибизди бүтүрүп, шымаланып, чуркап, тердеп - кургап жүрө беребиз. Ойлорубуз бирде артта, бирде алдыга чаптырып адашып жүргөн кезде денебиз учур чакта максатсыз, супсак жашап жүргөн болот. Тамактын даамы, күнүңдүн кунары качып, бакытты мезгилден кубалаган бойдон жаштыгыбызды, өмүрүбүздү өткөрөбүз. Элестет өлүмгө кадам калган күнү карасаң эле жашоо ушунча таттуу. "Мурун эмнеге сезбедим экен? Атаганат, жок дегенде бир ууч убактым болгондо эмне?!" дээр белек бармакты тиштеп өкүнүп. Андайды элестеткенде денеңе майда бүртүкчөлөр чыгып, чыйрыга түшөсүң. Эсиңе келе калып, тирүү кениңе, жашап жатканыңа ушундай жыргайсың анан! Мынчалык Жаратканга жалынбаган чыгарсың. Шүгүр сөзүн айтканда жүрөгүң кошо сүйлөп жибергиси келет. Мен жашап атам дейсиң! Үй жыйнаганда да жыргап, ар бир кычыгын жууп, тамак жегенде тим эле тилиң ар бир даамын сезип, сезген сайын көзүң аңтарылып, ырахатка бөлөнүп, уулуңду жыттаганда мээримиң мн сүйүүң оргуштап, ичиңди кошо титиретип, китеп окуганда оюңду топтоп окуп, кино көргөндө жыргап көрүп жашап каласың. Жашашты билдик белек дейсиң анан? Тирүүлүккө эптеп тутунуп, акча кубалап, кырылып, жек көрүп, урушуп, бөлкө нанды бөлө качып жүрбөдүк белек дейсиң. Үймөктөп үйчүбүздү үйүп, көңүлүң толбой, көкүрөгүң ачка болуп жашадык. А толуш үчүн жөн гана азыркыңдан, учурдагыдан, майда нерседен ырахат гана алуу керек болчу экен! Бакытты кубалап, кандай гана ишти жасап, кайда гана жүрбөдүк....#жөнэлеойлор #бактылууадам #карантин #үйдөбол

22.04.2020
"Таш боорсуң, мерезсиң! " деп урушаар элеңиз. Билем, агай! Ага кошуп оройлугум да бар. Ойлондум, агай сөзүңүздү. Ал жөн гана тарыхтан алган сабагым экен. Тарыхтагы боорукер, мээримдүү, жумшак аялдарга коом катуу мамиле кылыптыр учурунда. Балким ал мүнөзүм мн өзүмдү сырттагылардан коруп аткан чыгармын. "Ой, агай, өзүм жалгыз бой келин болсом, жылуу карагандын баарына эле мээримдүү, боорукер боло берсем, эмне тамтык калат менден?" десем, бооруңуз калбай күлдүңүз. Өзүңүз болуп көрбөгөндөй жумшак, мээримдүү элеңиз. Балким, карындашыңызды өз дүйнөңүздөй тарбиялайм деген чыгарсыз... Сиз жазган күнү бизге майрам эле. Бири бирибизден "Агай бата кетирдиби?" деп сурачубуз. Сизден бата, тилек келген күнү ишибиз оңунан чыкчу анткени. Ырымдачубуз. Сиз жакшы жакка, жыргап кеткендей жүрөгүм тынч негедир. Көңүлүңүз ачыктай туюлат. Кеп узун жашашта эмес экен. Кеп маңыздуу, маанилүү, кызыктуу өмүр сүрүштө экен. Бул сизден келген дагы бир сабак болду. #жөнэлеойлор

21.04.2020
Тилин, оюн көзөмөлгө алып жашаш оорбу адам баласына? Арамданып, аңдып, тилдеп, каргап ... дейин десең пендебиз да. Жараткандын берген сыноосунан ар ким ар кандай өтөт. Тилин тарта албай убара болгону бар. Бирөө оюнун азабын чегет. Миң жолу жаңылабыз. Миң жолу оңдонобуз. Ката кыласың. Жаза басасың. Бетиң укмуш кызарат кылыгың үчүн. Анан экинчи кайталабай каласың. Бет кызарбаса, миң жолу кайталайсың, анан бир күнү ушундай чокуга жейсиң. Экинчи айранды үйлөп ичип каласың. Көрсө, ката, жаңылыштык сонун нерсе тура! Ошон үчүн азыр "Эмнеге ушундайбыз?" деп наалыбай калдым. Ушундай жол мн өтмөйүн оңдолуш кыйын болот. Бийик Адам болуш үчүн алгач паска түшүп көрүү кажет окшойт! Бала деле баарын оозуна салып, даамдап, жыттап, жыгылып, күйүп, чекесин жарып көрүп анан үйрөнөт да. Балага "Чайнек ысык. Күйүп каласың!" деп миң кайтала. Күйүп көрмөйүн билбейт. Жон териден өткөрүү кажет экен. Бирөөнү ушакта. Аябай! Сөөгүнө жеткире. Ушактаган адамың мн жүз көрүшүп, анын жан дүйнөсүн билип, анын терезесинен баш бакканда гана ыңгайсыз абалга түшкөндө гана бирөөнү билип - билбей сүйлөгөн кандай жаман экенин билесиң. Бирөөнү уруп көр. Кийин өзүң таяк жегенде гана кандай этиң ооруурун түшүнөсүң! Бирөөнүн ырыскысын жеп көр. Кудай кустурганда гана экинчи башканын ырыскысна көз артпай каласың. Текебер бол. Тепкиде калганда гана шүгүрчүлүктү үйрөнөсүң. Төбөгө жемейин, өзүбүз эле акылдуу болуп, айттырбай, этекке чаптырбай билгидей адатыбыз жок өңдөнөт адам баласынын. Кылгылыкты кылып, кыл жип мн бууп анан кыйындыкка өтөбүз. Ошон үчүн пенделиктин кылыктарына наалыбай, кейибей, кепчибей, өзүбүздү ак карга сезбей эле сырттан абай салып, башканынбы, өңүбүздүнбү жаңылыштыктардан жакшысын алып, сабак кылып, үйрөнүүбүз кажет экен... #жөнэлеойлор

05.05.2020
Адам баласы коркунучту тааныйт. Тааныганда дагы жазбай тааныйт. Коркунуч мн жаралып, коркунуч мн жашап, коркунуч мн өлүп атсак, тааныбай анан? Сүйүү өгөй сындуу. Билесиң, бирок сезбейсиң. Аны көп айтаарсың балким, бирок даамдап көргөнү, сүйүүдө төрөлүп, жашап, өлгөнү аз. Жокко эсе. Сүйүү эмес жан дүйнөдө коркунуч байырлаганы үчүн төрөлгөндө ыңаалап ыйлап, ызы чуу салып, коркуп келебиз. Сүйгөндө да жоготуп алсакчы деп коркунучка жамынып алып сүйөбүз. Балабыз төрөлгөндө да өзүң көргө эле көмүлүп калып тынчыбасаң, өмүр бою балаңдын үстүндө титиреп, коркунуч сыйдырып жашайсың. "Ден соолугу жакшы болсо экен. Аман болсо экен. Жакшы эрге, же жакшы аялга жолукса экен" ж.б. коркунучун сыйдырабыз. Эртеңибизден коркобуз, Кудайдан коркобуз, уятыбыз чыгып калып, ашмалтайбыз кетет деп коркобуз, жалганыбыз чыгат дейбиз, өлүп кетиштен коркобуз, элдин сөзүнөн, жада калса, мончок, тумар тагынып, көзүнөн коркобуз. Ачарчылыктан, же байлык топтоп алып жоготуп алыштан, алданып калыштан, сатып кеткенден, сүйүп калыштан, же жападан жалгыз калыштан коркобуз. Караңгыдан басыштан, уурдатып ийиштен, төпөш жештен, кээде сүйүнгөндөн, жыргагандан, жакшы күндү көрүштөн да коркобуз. Жакшынын артынан жамандык келсечи дейбиз. Коркобуз биз. Ата - энеңден,.бир туугандан, эриңден, аялыңдан...ж.б. көңүлүн калтырыштан, маанайын бузуп алыштан, тил угуштан, жаман көрүнүп калыштан, туура эмес таанылып калыштан коркобуз. Сүйүүнү каягына кыпчыдык? Сүйүү, ырахатка батуу, жыргоо, жакшы көрүү, жайдары болуу жокко эсе. Аларды өзүбүзгө ыраа көрүштөн да коркобуз. Коркунуч бар жерде сүйүүгө орун жок экенин билбейбиз. Эки көйнөктү кийип алган сыңары эки сезимди бир убакта сезүү мүмкүн эмес. Биз дайым коркунучту тандайбыз. Ал сезим мн жашаштын ыңгайын таап алганбыз анткени. #жөнэлеойлор

23.02.2020
Мырзалар, кыздар бою эки метр узун, курсагында кубиктери бар, кашы - көзү кара, мурду кырдач, отличник балдарды эле сүйөт деп жүрсөңүз, жаңылышасыз. Кыздардын табити ар башка, бирок кайраттуу, духу күчтүү, сөзүнө туруп, жоопкерчиликтүү болуп, камкордук көргөзүп турсаңар эле сүйүүбүз артпай анан?! Ошон үчүн курсактуулар, арык - торуктар, чачтуулар жана чачы түшүп калгандар, сулуулар - анча эместер, шыңга бойлуулар - жапалдаштар, айтор, сырткы келбетиңер, формаңар, сымбатыңар, бизди ойлондурбайт деле! Ар бириң сүйүктүү болууга татыктуусуңар! Ички начинкаңар даамдуу болсун башкысы! Коргоочуларым, коргооңорду сезип, кучагыңарда гүлдөйлү, жыпар жытыбызды чачалы, кумарлантып, ырахатка бөлөйлү. Сүйгүлө! Сүйүктүү болгон, эркелеген, эриниңерде ээриген анан от болуп ээритип, сымаптай куюлткан бизге өөөлө жагат! Жигиттер, аягыла, аяр мамиле кылып, канатыбызды кайрыбагыла! Назик болуп, башыбызды жөлөгөнгө, салмагыбызды берип, саамайыбызды сылаталы. Көңүлүбүздү көргүлө, эсептешкиле! Биз да сиздин көкүрөгүңөрдөгүнү таамай окуйлу, дартыңарга дабаа таап, жараңарды айыктырабыз. Майрамыңыздар менен!

04.05.2020
Бирөөнү катуу сүйөбүз. Бирөөдөн катуу коркобуз. Бирөөгө болушунча мээрим төгөбүз. Алар биздин жакындарыбыз көбүнесе. Ата - эне, бир тууган, бала, жарыбыз ж.б. Баардык көңүл, концентрация аларда. Ойлонуп көрсөм, жакындарыбызды сүйгөндөй Жаратканды сүйбөй, жакындардан корккондой Жараткандан коркпойт экенбиз. Көңүлүбүз дайым аларда болгон үчүн өзүбүз анан Жараткан бош калат экен. Боштук кайдан чыкты дейбиз анан.. Төрөлгөндө жаңы дүйнөнү изилдеп атып, жан көнүп калат окшобойбу. Көз дагы, көңүл дагы дайым сыртта. Бакыт жанымдагы адамдарда эмес экенин сезиш үчүн 34 жылым кетиптир. Жан дүйнөнү тынчтыгы, жыргалчылыгы алардан көз каранды эмес экенин кечигип сездим. Жаттама, жаны жок айтылган сөздөрдүн артында маансин аңдай турган болсоң, чоң ачкыч жатат. Ачкыч тынчтыгыңдын, бактыңдын, жыргалчылыгыңдын ачкычы. Жан жүйнөнү тынчтандыр. Тун. Анан көп нерсе көзгө көрүнүп, кулак иштей баштайт. Чалды куйду, кымгуут дүйнөдө чындыкты, акыйкаттыкты көрүш кыйын бп калат экен. Көкүрөктү тынчытып, жерге жакын түшүрүп туруп гана учканды үйрөнүүгө мүмкүн экен. Бүгүн түшүндүм. #жөнэлеойлор

02.05.2020
"Уулум, бул сенин таятаң" дедим сүрөттөн көргөзүп . "Айиий, сулуу киши турбайбы! " дедиң. Сен экөөбүз тең ага окшошпуз. Өзгөчө ырсактап тийишип, тамашалашып, какшык аралаш сүйлөгөн жагыбыз окшош ага. Музыкалык талантың, чопо чоордо ойногонуңан бери окшош. Атасына таарынган кыз жашоосунан бакыт таба албайт дешет. Ажырашканда гана кечире алуу күчүм ойгонду. Анткени таарына турчу дагы бир адам кошулуп, көтөргөнгө жүгүм оор болуп калды. Көтөргүм да келген жок. Уулуң турганда эркек аттууга таарынуу оңой эмес иш экен. Мен сени жакшылап тааныш үчүн, эркектик касиетиңди өстүрүп, тебелеп албаш үчүн аларды жакындан таанып, кабыл алып, кечирүүм керек эле. Аталар ар кандай болот экен турмушта. Жаралганыңа эле көмөк кошуп, жашооңон биротоло четтеп кеткени болот. Анын миссиясы жөн гана жаратууга жардамчы болуу. Ал тургай ал өзүнүн жоктугу менен болуп көрбөгөндөй эбегейсиз сабак берет. Кандай сабак бере алганын өзүнчө жазаармын. Айрым аталар үйрүлүп түшөт. Коруйт. Баласы үчүн дүйнөгө каршы чыкканга даяр. Аталар бар. Сенден алыс жашайт, бирок баласынан кол үзбөйт, жардам берет, жанында экенин сездирет. Аталар бар. Апасын да, балдарын да күм - жам кылып күндө төпөштөйт. "Ушундан көрө жер кучаткап жатса не?" дешет балдары. Жек көрүшөт. Аталар бар. Жер кучактап жатышат. Алар сөөлөтү, аты, качандыр тирүү кезинде калтырган элеси, баскан турганы мүнөзү мн тарбиялашат. "Атам мындай болчу! Атам тирүү болгондо..." деп тарбияланат алар. Аталар көп. "Ата" деген сөздүн түпкүрүн ар ким ар кыл кабылдайт. Аталуу кандай экенин билбейм. Атага эркелөө, анан сүйүүсүн сезүү кандай экенин да көргөн эмесмин. Бирок, мени жаратканга коңкон салымы үчүн ушундай ыраазымын. Ал менин жашоомдун бир бөлүгү. Кандай гана болбосун кабылдоого тийишмин...#жөнэлеойлор

02.05.2020
Ламифарен экөөбүз тең натуралдуулукту, нукуралуулукту тандайбыз!) Боексуз, жасалмасыз. Недавно я познакомилась с ЛЕЧЕБНО - ПРОФИЛАКТИЧЕСКИМ ПРОДУКТОМ ИЗ ВОДОРОСЛИ для внутреннего применения. Была наслышана о хороших отзывов потребителей и моих друзей. Решила попробовать сама, так как для меня этот препарат был находкой. А знаете почему? Ламифарэн отличается: -Точная направленность его воздействия за счёт уникального состава. -Могут употреблять даже дети и женщины, находящиеся в состоянии беременности. -Высокая усвояемость. -Не имеет противопоказаний и побочных эффектов. -В рекордные сроки восстанавливается нормальное функционирование всех внутренних систем. А для того, чтобы узнать в каких случаях вам поможет Lamifaren, переходите на страницу @lamifaren.kg

29.12.2019
Быйыл өлкөбүз үчүн кандай жыл болду? Менин оюмча жакшы жыл болду. Саясый баш аламандык, адилетсиздик, саткынчылык орун алган жердин каягы жакшы дейт чыгарсыңар. Бет каптар чечилди! Бул эң башкысы! Кимдин ким экенин, кандай сөөк кайсы жакта катылганын, иттин өлүгү каякка көмүлгөнү көрүндү! Көзүбүздү таңып келе жаткамбыз. Терең уйкуда болчубуз. Жаңыдан ойгоно баштадык. Жаңы күчтөр, жаңы жүздөр, өлкөнүн учун кармап, көмөк көрсөткүсү келгендер чыга баштады. Ою бузуктардын ээрден көчүгү ооп, кадам сайын ката кетирип баратат. Эскилердин эси ооду. Жаштардан, дилгирлерден, жаңы көз караштан үмүт зор. Кээде үмүтүң кесилип, көңүлүң түшөт. Анткен менен пендебиз. Үмүтсүз карайлап кайсы жакка чейин барат дейсиз? Кайра эле шамын жагабыз. Ооба, далай ката кетирдик. Эми биригүү, ынтымакташуу, бири бирибизге арка - жөлөк болуу, колубуздан тартуу заман. Буттан тартуу өттү. Ак пейилдик көкүрөктөргө себилди. Ичибиздеги актык бүчүр байлай баштады. Бул менин тереземен карагандагы көрүнүш. Күлгүн көз айнегимди кийип алган чыгаармын дагы, бирок көкүрөк ошого ишенгиси келди! Арамдар арамданган сайын таза абаны булгап жаткандай дароо таамай көрүнө баштайт эми. Тазалангандар көп болот анткени. Таңкы беште эмнегедир оюма үмүт жагылды. Жакшылыкты жандап жашагым келген каалоо ойгонду. Күндө кыйнаган аллергия, астма, грипп бүгүн жок. Gün doğmadan neler doğar demiştim dün. Yanılmamışım demek ki. Astımım gibi bütün kötüllükler kaybolur. Таң менен жарышып эмнелер гана жаралбайт?! Астмам, эки жумалык гриппим бүгүн тыптыйпыл. Эртеңки күндө далай оорудан айыгаарбыз. Өзгөчө жан дүйнөдөгү арам оорулардан! Кутман таң! #жөнэлеойлор #таңкыүмүт